الموضوع: تقييم للداستر 2014 :)

السلام عليكم

الحمد لله استلمت رينو داستر 2014 وهيا عاملة دلوقتى 800 ك ( لسة بيبى) ودة تقييمى ليها
اة قبل ما نبداء هيا 4*4 فل اوبشن والفرق بينها وبين 2013 الكاسيت البلوتوث والفرش الهاند ميد والخياطة فية احمر والطارة والفيتيس الخياطة فيهم احمر مخلين شكلها تححححححححححححفة مع الخامات ال 3 الى فى الكرسى بالوانهم

اولا : الشكل

من برة العربية شكلها ملفت وجميل واللوان الفيبر والالمونيوم والعتب وبارات السقف مع لون العربية مدينها شكل جميل جداا ( فخيم يعنى ههه)
من جوة ( اكبر نقطة جداال على العربية ) التابلوة نفس شكل اللوجان بس الخامات غيييييييييييييييييييير خالص والتقفيل احسن 100 مرة والتابلوة اكبر كمان يعنى دة حاجة ودى حاجة تانى خالص بس الشكل بس
اة الناس الى بتقول التابلوة فاضى
بصو العربيات الاوف رود والفور باى فور مش معمولة للمنظرة والشكل الفاجر هيا بتكون عملية ومن جوة لازم تكون بسيطة ووخفيفة دة علشان يقللوا من تكلفة العربية والوزن لان العربية نفسها حجمها كبير ودى سكة كبيرة مش هاندخل فيها
بس شوفو كدة شكل التابلوة للرانجلر والشيروكى والفيتارا والتريوس
دة بتاع الجيب بس سيبكو من الشاشة وشوفوا باقى التلبولة هاتلاقوة عادى والله

http://media.caranddriver.com/images...s-1280x782.jpg
دى الداستر :
http://www.tflcar.com/wp-content/upl...ter-dci-01.jpg

دلوقتى بعد ما اخدنا لفة فى باقى العربيات الى اغلى منها بكتير عرفنا ان الداستر مش وحشة من جوة خالص بالعكس دى ممتازة بالنسبة لسعرها


نروح بقى على الاداء : ( انا ما التزمتش بقواعد تليين العربية لانى سالت فى التوكيل وعرفت انها متلينة فى المصنع )
بس العربية بعد اول تغيير زيت ليها ادائها بيتحسن بنسبة 40 : 60 % ودة الى قالهولى مهندس الصيانة فى التليفون
السحب : مممممممتتتتتتاز على العربية انا كان معايا قبلها صنى اوتو ولانسر اوتو ومش حاسس انى راكب حاجة اقل فى السحب خالص خالص يعنى التسارع لحد ال 120:130 ممتتتاز
من 130 : 165 دى اعلى سرعة وصلتلها كان كويس اوى وكان ممكن ازود لولا الطريق كان مش حلو

التكييف : جميل اوى وادائة فوق الممتاز ومش بياثر على السحب غير حاجة بسيطة اوى زى باقى العربيات الى جربتها مش بيتقل العربية خالص على عكس عربيات كتيير فى حجمها زى التريوس مثلا ( العربية مع اخويا والفرق بينهم كبييييير علشان محدش يقولى حاجة)

العفشة : انا العربية الى معايا 4*4 بس العفشة ماشاء الله عليها جميلة جداااااااا وادائها احسن من كل العربيات الى جربتها وسوقتها بتفكرنى بعفشة البيجو 3008
وافضل من الصنى والانسر والتريوس جدااا لو التريوس هانقيمها 7 من 10 يبقى الداستر 15 من 10

الثبات : ممتاز لحد ال 140 فى الطرق المستقيمة وبتحس ان العربية ماسكة نفسها اوى ولحد ال 160 بتكون اخف بدرجة ملحوظة بس مش بتخليك مقلق منها بالعكس بتكون واثق فيها

اما لو فى ملفات ومنحنيات ماجربتهاش غير فى دخلة اكتوبر من على طريق الواحات كنت على 110 والعربية كانت ماسكة نفسها معايا بس مش حلوة اوى يعنى لو كنت اخدتها على 80 كان هايبقى افضل بكتييييير

الصالون الداخلى : واسع ومريح اوى ليا وللورايا ( انا 184 سم و125 كيلو ) يعنى احجام ديناصورات
مش اى كلام والعربية مريحة جداا
بالنسبة لازرار الشبابيك الى فى التابلوة يومين وهاتتعود عليهم ولما تركب عربية تانى هاتلاقى نفسك بتحط ايدك على التابلوة علشان تنزل الازاز 
وفية اماكن للزرار فى كل الابواب لو حابب تركبهم من غير ما تقطع وكدة بس صدقونى مالهومش لازمة
الشنطة واسعة بشكل غير عاااااااااااااادى ( امبارح كن مودى حاجات للمزرعة فيها كانو 2 شيكارة قمح الواحدة 70 ك 4 علب دهان حوائط كبار وعدة العمال ) معلش والله صعبت عليا بس كنت باليل ومالقيتش عربية اوديهم فيها
وكان فية مكان احط فيها اكتر من كدة
الاستيبن والكوريك كلهم موجودين فى امكانهم ومقفول عليهم بيخلوا الشنطة منظمة كدة ومش متبهدلة

اة وكمان الاضائة والفونيس بتاعة العربية تححححفة وتقدر تتحكم فى ارتفاعهم من العربية من جوة

امممم بس كدة دى نقط تلخط المشاكل والعيوب الى قابلتنى فى العربية :

1: لون كفر المراية سيلفر ومش ماشى مع اللون الموكا للعربية بس ب امانة ماشى مع لون العتب والبارات على السقف بس كان نفسى يكون موكا
2 : كان نفسى يكون فيها سماعات اكتر هيا فيها 4 سماعات فى الابواب وصوتهم حلو ومتقسم صح بس علشان انا متعود على الساوند سيستم الى كان عندى ف حاسس ان دول قليلين
3 : مفيش مسند للذراع للسائق
4: اماكن التخزين قليلة يعنى يدوب باحط التليفون تحت الهاند بريك وعلبة السجاير والمفاتيح فى مكان الكوبايات ومفيش غير مكان للزجاجة المياة بين الكرسيين باحط فيهم معطر للجو
5 : كان نفسى يكون فية لمبة للصالون للكنبة الخلفية


بس كدة مش فاكر حاجة تانى اسالونى وهاجاوب واسف على الغلطات الاملائية الى فوق دى اصلى والله كنت لغات واخر سنة فى هندسة اهو مش عارف الفرق بين الالف والياء وال ى بطة ووزة والحاجات دى

اخوكم محمد

التوب سبيد فى الكتالوج 175 بس انا جبت بيها 180 او 178 وممكن تجيب اكتر لو انا حاولت
والامبير اخرة 210 ك