تقريرى عن العربية Emgrand EC7 ... والرحلة من القاهرة الى الاسكندرية.
بسم الله الرحمن الرحيم.
تحية طيبة لكل اعضاء المنتدى الكرام
دا تقريرى عن عربيتى ال Emgrand EC7 موديل 2013 وقبل السفر كانت عاملة 4000 كيلو.
الرحلة كانت من القاهرة الى اسكندرية عن طريق مصر ـ اسكندرية الصحراوى وكذلك العودة
الرحلة باتجاه اسكندرية بدأت الساعه 4 الفجر
كان معايا 2 فى العربية وشوية شنط فى الشطنة ورا.
الطريق اخد حوالى ساعة ونص تقريبا من البوبات الى البوبات.
متوسط السرعة كان من 140 الى 150 كم/س.
اقل سرعة كانت 120 كم/س واقصى سرعة كانت 175 كم/س
الفجر بقة ومش فيه ردارات وكنت بتشقلب فى الطريق براحتى.
وكنا ماشين بالتكييف معظم الطريق.
وهنا تيجى اول ملاحظة. السرعة الزيادة ولا ليها اى تلاتين لزمة. كان فيه جماعة صحابنا جايين ورانا على سرعة من 80 الى 100 كم/س ووصلوا بعدينا بتلت ساعة تقريبا. فاعتقد ان فرق التوقيت مش يستاهل حجم المخاطرة اللى بتعرض نفسك ليها بالسرعة الزيادة.
وانا لو كنت جريت بالعربية دا كان فيه قدر من التهور بس السبب الرئيسى هوا انى اعرف اقيم العربية.
نيجى بقة للتقيم
بالنسبة للسحب فاحب اقول ان العربية بتتحول بعد تخطى حاجز 4000 RPM وخصوصا على النسب المتوسطة (الغيار التالت والرابع) .
العربية جابت معايا 175 على الرابع عند 5500 RPM تقريبا.
عزم الغيار الخامس بيبقى ضعيف لو جبته بدرى. قبل 140 كم/س مثلا.
تقديريا. العربية ممكن توصل ل 200 كم/س لو شبعت كل غيار للاخر.
العزم فى المطالع ضعيف جدا على الخامس وبالتالى لو حابب تشد لازم تنزل للرابع ووقتها مش هتقدر تعدى حاجز 175 كم/س تقريبا.
صوت الموتور مميز جدا. مش بينعر على الفاضى. لا الصوت بيديك احساس بالقوة.
الخلاصة الماتور ال 1500 مناسب للعربية وخصوصا على السرعات العاليا. وتأثير التكييف عليه معقول.
والحرارة مش بتتأثر مهما كانت السرعة.
بالنسبة لنظام التعليق فحدث ولا حرج. جيد جدا فى تقديرى. وبيدى ثبات ممتاز
العربية مش بتلعب مع مطبات الهوا وحتى ومع السرعات العاليه وطبعا دا بيتسبب فى شوية نشوفيه فى العفشة وبتبان مع عين القطة
بالنسبة للفرامل. فهى ايضا جدا وبتمسك كويس ومش بتحدف مع السرعات و ال ABS بيدى ثقة كبيرة وتحكم رائع مع الفرامل المفاجئة.
بس طبعا التيل سئ جدا والجنط كلو بيتحول للون الاسود منه.
نظام التوجيه والتحكم جيد. والباور معقول ومش خفيف مع السرعات. وانا بطلع من عربية وبعد ما عديتها. عربية جت ادامى وزنقت عليا ورديت الدركسيون الناحية التانية والعربية الحمد لله لمت نفسها بسرعة.
واخدت اكتر من عرزة تانية والحمد لله العربية رفعت راسى.
التكييف كان كويس جدا وتأثيرة على السحب معقول خصوصا على السرعات العالية.
الاضاءة الليلية جيدة الى حد كبير وبتكشف الطريق كويس.
وكذلك مستوى الرؤية فى المريات جيد جدا ومناسب لحجم العربية.
كرسى السائق ناشف شوية ومتعب فى السفر وخصوصا لو هتسافر مسافة اكبر.
لكن الصالون واسع وياخد من الحبايب الف ومرتحين جدا
وطبعا السنطة ممكن تنقل فيها شقتك كلها وهيا الاكبر فى فئتها على ما اتذكر.
استهلاك البنزين معقول. وطبعا انا شايف انه زيادة شوية على عربية بماتور 1500cc
قطعنا مسافة 200 كيلو بحوالى 18 لتر.
فى طريق العودة شغلت التكييف طول الطريق تقريبا. وكنت لوحدى. ومش حسيت بفرق كبير فى السحب او الثبات او استهلاك البنزين.
الخلاصة. انا شايف ان العربية ممتازة مقارنة بالاخريات اللى فى فئتها. وهيا عربية عائلية ومناسبة جدا للسفر.
