الموضوع: سيارات ال mg

http://www.nilemotors.net/Nile/246875-mg-350-a.html

شفتها النهاردة فى فرع اباظه فى اسكندرية وكنت بقارن بينها وبين البيجو 301
اقسم بالله العربية دى فعلا تستاهل فلوسها
عربية تحففففففففففففففففففففففف فففففه
التقفيل بتاعها رووعه
تحس كدة انها مستحيل تكون صينى
فعلا مش كل الصينى وكان وراها الجيلى الجديدة الايمرجند والله العظيم بعد ما ركبتها قرفت منها
فعلا ال mg 5 تحفه فنية ميركبهاش غير واحد عاوز يركب عربية يحس فيها انة راكب جولف 6 بسعر كيا ريو

فعلا بدات افكر جديا فى انى اجيبها

المشاركة الأصلية كتبت بواسطة khaled_afandy

فعلا عربية كويسة و اعتبرها أفضل الصينى و افضل من البروتون و الهونضاى :)
ده كفاية البوية بتاعتها أحسن من الكورولا الجديدة!!!!
بس لازم التوكيل ينزل سعرها علشان الناس تبدأ فى الإقبال عليها

انا ابتديت ادرس ال MG 750 من سنة تقريبا والصراحة عربية اكتر من رائعة وهي اصلا روفر 75 دورو عاليوتيوب على تقارير عن الروفر 75 بنفس الشكل حتى التابلوه هو واسمعو وانبهروا بالتقييم

الشركة الانجليزية المنتجة مرت بأزمة مالية اشترتها شركة بي ام احتفظت لنفسها باسم ال ميني كوبر وانتجتها بمواتير بي ام وباعت الشركة الانجليزية لشركة SAIC اكبر شركة تصنيع سيارات في الصين وتصنع ماركات اوروببية زي المرسيدس والفولكس بنفس اسمائهم وبالمناسبة نفس الشركة دي اشترت فولفو بعد مرورها هي كمان بازمة مالية يعني فولفو دلوقت صيني بتتجمع ف السويد

اهم شئ بالنسبة لى الموتور ال 1800 تربو دا موتور جبااار وبيتصنع في انجلترا في مصانع MG اللى لسه في انجلترا

الصراحة انا كنت ناوي اشتريها بنسبة 95% لان كان معايا عربية اوكتافيا 1800 وكانت رهيبة ف الجري وبعدها جبت a4 برضه تحفة وجبارة بس حسيتها تقيلة عن ال 1800 وحبيت ارجع تاني لموتور 1800 وكمان تربو بس فضلت تتأخر شهر ورا التاني لحد ما زهقت واشتريت فانتازيا من 6 شهور

بس بعد ما اتفرجت عليها والله بأمانة العربية لا تقل عن الاوروبي نهائيا كفاية ان تصميمها نفس تصميم الرولز والجاجوار وبيسموه هناك cigar shape يعني شكلها بيضاوي الشنطة والكبوت مقوسين و مايلين لتحت ودا من وصف برنامج توب جير للروفر 75 والفيديو عاليوتيوب

اللى عاوز يعرف تجارب الناس مع العربية يدخل على مواقع سيارات خليجي لان العربية موجودة ف الخليج من سنين حتى ال750 ف الامارات نزل منها السنة اللى فاتت الشكل الجديد والخليجيين منبهرين بها جدا

بالنسبة للاسعار العربية بتتصنع في مصانع مرسيدس مصر بجودة عالية وموتور 4 سلندر 1800 تربو وكل الكماليات اللى فيها ب 200 الف وال6 سلندر 2500 ب 225 الف !!! مش كتير ابدا عليها مش فاهم الناس اللى بتدفع ف السيراتو 180 والكارينز والix 35 والسبورتاج 220 الف مستكترين 200 عليها ازاي صحيح مصري ولكن خاماتها روعة وماحدش يقوللى زيها زي الجالينا عشان الجالينا خاماتها تعبانة جداااا جنب ال 750

طبعا العيب القوي الظاهر هو التوكيل الضعيف وحملة الدعاية الباهتة الفاشلة اللى مش بتركز عالعربية ولكن على المطربة ، وفي كلام تاني اتقال ان التوكيل هو نفسه الوكيل السابق لكومودو ال 4*4 وطبعا معروف عنه انه لما العربية حصل فيها مشاكل والناس اشتكت بطل يستورد قطع الغيار وقفل الشركة وساب اصحاب الكومودو في حيص بيص وجري عالسعودية جاب شركاء جدد وخد توكيل ال MG

يا ريت لو حد عنده العربية يقوللنا التوكيل ومراكز الصيانة وقطع الغيار اخبارهم ايه

المشاركة الأصلية كتبت بواسطة redbull_30

اول ما بدأت الموضوع كنت مهموم بفكرة مفيش ناس عندها خلفية اول معلومة عن العربية بس حضرتك وبعض الاعضاء هنا لقيت عندهم معلومات مكنتش وصلالي .. بجد اشكركم
بس انا حابب اوضح لحضرتك شيء وهو ان العربية باذن الله هتنجح والسبب هيرجع لاصل تكوين العربية النضيف.. بالبلدي العربية مصروف عليها اوووي غير الحجات التانية

هي العربية اصلا ناجحة جدا بالخليج لانها زي ما انت قلت لاصل العربية لانها واضح جدا انها مش صيني بالمفهوم المصري للصيني العربية بتصميم ومواتير انجليزي وهو دا قلب لاعربية ودا اللى بيدي الاحساس بالفخامة والخامات العالية الجودة عكس الصيني من نوعية الفاو والليفان والكلام العرة دا اللى مالوش اصل اوروبي او ياباني دي حتى جودتها اعلى من البريليانس ومن حيث خامات التابلوه والصالون احسن من الكيا والهيونداي ومع ذلك الناس بتستكتر السعر وتغض البصر عن اصل التصميم والخامات عالية الجودة وقايمة الكماليات العالية اللى فيها

زي ماقلت نجاحها ف مصر يعتمد عالتوكيل عشان يوصل المستوى الرفيع للعملا ف مصر شوف انت نفسك بتفكر تجيبها ومافيش عندك ولا عند معظم العملا ف مصر اي معلومات مهمة عن السيارة بينما اسأل عنها ف الامارات وقطر والسعودية شوف بيقولو عليها ايه دا حتى طوروها السنة اللى فاتت ونزلوا منها شكل جديد بعد نجاح الشكل القديم

الصراحة التوكيل كتيان جدا وياما عربيات روعة اتظلمت ف مصر بسبب توكيل كتيان مش بيسوق العربية وراضي ياخد فتافيت من السوق مع انه لو شد حيله شوية ممكن يكتسح زي السوبارو الامبريزا وال xv بتوع ابو غالي معاه الماظ ومش عارف يبيعه وانا مثال حي لواحد ما ركبش غير الاوروبي ال 20 سنة اللى فاتو وكنت بقارن بين الفانتازيا و ال mg 750 وكنت مستعد اجيبها لولا لكاعة التوكيل وكل ما اكلمهم ماحدش يعرف حاجة والرد الوحيد اللى كنت باخده تابعنا كمان شهر ... كلام زحلقة والسلام ودا اللى خللاني احس انهم كفته زي ابو غالى مش قد الشغل التقيل ومش عايزين يتوسعوا