المشاركة الأصلية كتبت بواسطة amrelsaqqa
انا كان تفكيري في موضوع الالوان ده عملى شوية
------ الابيض جميل جدا عليها بس ما ينفعش لكذا سبب بالنسبة لى :
الاعتقاد السائد ان الابيض تاكسى وده من ضمن مشاكله ان الناس ممكن تشتغلنى وتشاورلى ع الطريق خصوصا لو جاى من بعيد
عربياتنا في البيت كلها كانت لونها ابيض قبل كدة في السعودية (مازدا ونيسان وشيفروليه كابرس ) وفي مصر (بيجو 504 و تويوتا كورولا 2001 ) كلهم كانوا ابيض ، فخلاص لازم اغير بقى زهقت من الابيض ..
مش عملى في الخدوش والخبطات خصوصا في الاكصدامات
درجة اللون بتتغير او بتصفر ومش دى المشكلة ، المشكلة لو احتجت ترش جزء ، بتفكك خالص من الكود ولازم تعاير اللون على اللون الفعلى اللى العربية عليه ، ودى مش بتظبط 100% وعملية صعبة
طبعا مش ميتاليك والميتاليك بيدي شياكة للعربية
--- الاسود غير عملى بالمرة في اي عربية ولا انصح به في مصر ومع البيجو بالاضافة لعيوبه المعروفة من امتصاص للحرارة ومنظره السيء مع الخدوش وسهولته في السرقة ! فهو مصغر العربية جدا ومش مبينها
--- البترولى مش لايق عليها من وجهة نظري والدرجة بتاعته مش عاجبانى
-- الشامبين اول لون شوفته وما عجبنيش من اول مرة بس بعد كدة حبيته واكتشفت انه احلى لون فيها وحجزته كرغبة اولى
--- الموكا في الصور جامد جدا ولكن في الحقيقة غامق زيادة عن اللزوم وزي ما قلنا العربية دى عايزة الوان فاتحة ولكن هو لون شيك فعلا
--- الرصاصى او الفيرانى ما شفتوش في الحقيقة غير يوم الاستلام وبصراحة جميل جدا خصوصا مع الهايلاين وعامل شغل مع النيكل اللى فيها
--- الفضى تقليدى جدا طبعا ولكن رائع على العربية زي الابيض ، والميزة فيه ان مش باين اللمعة بتاعت ورنيش الفبريقة اللى بتكون منقطة دي ( ما بحبهاش )
ومدي شكل فخم للعربية وده كان رغبتى التانية في الالوان
بعد ما اخترت الشامبين والفضى ، حسيت برضه انى محتار بينهم وبعدين تمنيت تيجى الفضى ، وبعدين قلت لا انا مش هتمنى حاجة معينة ، زي ما تيجى بقى واللون اللى هييجى هرضى بيه وهعتبره اختيار ربنا
سبحان الله اللى جت بعد 15 يوم طلعت فضى قلت يلا الخيرة فيما اختاره الله وتوكلت على الله فيها
ولونها تحفة فعلا بس عيب العربية دى حاجة
جايبالى كمية حسد وعين رهيبة والناس كلها بتشوف العربية وتبرق لها
لدرجة ان العربية اتخبطت تانى يوم وهى واقفة واتحكت تالت يوم حكة رخمة جدا في الرفرف الخلفى يمين وانا ماليش اي ذنب فيها :(
رابع يوم عدى بدون اصابات في الصاج فرحت ، تخيلوا ايه حصل ، فردة الكاوتش اللى لسة ما مشيتش 300 كيلو اتقطعت من حتة ازاز مجرد ما وقفت بالعربية قدام البيت ، وبعدها بنص ساعة برضه نضارتى وقعت ع الارض واتكسرت
الحمد لله على كل حال