الموضوع: هو ايه اللى بيحصلى ده

المشاركة الأصلية كتبت بواسطة salah_86

باشا ربنا يكون فى عونك بجد بس الراجل اللى انت اشتريت منه العربية لو كان على علم بعيوب العربية ومصارحكش باللى فيها يبقى منه لله

حسبى الله ونعم الوكيل فيه

المشاركة الأصلية كتبت بواسطة حمدى الفنى

ايه الى بيحصل ده

فية اية بس ياسيد المعلمييييييييين
اية اللى حصل..
ماهو هايقول..هايقوووول..
هو مودى تقلان علينا شوية...عشان التقريريبقى..جامد جدى احنا قاعدين اهو ..مستنيين الفرج..قصدى التقرير..
وان غدا لناظرة لقريب

المشاركة الأصلية كتبت بواسطة حمدى الفنى

ابو جنى واحشنى والله براحتو يرد ما يردش هو قال لما افضى وفوجات انو فاضى وبيسال على الفتيس الاتوماتك براحتو انا بس كنت عاوزو يرد على الى شككو فالموضوع ده الى مخلينى مهتم

عشان الاسطى حمدى ميزعلش منى
ولو ان السؤال عن الفتيس الاوتوماتيك اسهل بكتير من عمل تقرير ومش محتاج وقت بس ما علينا
انا فعلا مكنتش فاضى الفترة اللى فاتت وكنت بدخل على المنتدى تخاطيف كده .
وبعدين انا كتبت هنا فى الموضوع ده ان العربية وقفت اكتر من 3 ايام تانى بسبب طبب المياه وبعدين كوعة المياه (والتسمية الصحيحة هى شجرة المياه الالومنيوم ) وبعدين سير الدينامو يعنى انا مش من اول ما اخدت العربية من الورشة وهى ماشية معايا لا العربية وقفت كذا يوم .وكنت بوافيكو اول باول بالتطورات اللى بتحصل .
وبعدين بالنسبة للعضو اللى كتب مشاركة هنا وشكك فى موضوع الصبابات انا رديت عليه فى وقتها .
المهم نيجى بقى لاستكمال الموضوع
تذكرة بسيطة كده بالموضوع وهو ان الدينامو بتاعى باظ وجبت واحد استيراد لانسر وركبته عند كهربائى حمار ( هتعرفو ليه حمار بعد كده ) وبعدين سير الدينامو والتكييف قطعوا بيه بس كنت قريب من البيت وعملتهم والحمد لله وتانى يوم كنت جهزت كل قطع الغيار المطلوبة اللى قالى عليها الاسطى حمدى ووانا فى الطريق اليه سير الكاتينة اتقطع بيه ( وقدر الله وما شاء فعل ) وقطرت العربية لغاية الورشة ولما فكينا الوش لقى فى 2 صباب فيهم بوش زيادة وبالتالى كان لازم تدخل الخراط (وكل الكلام ده اتقال قبل كده فى اول الموضوع لكن دى تذكرة بسيطة عشان الموضوع طول شوية ) المهم وبعد ما اخدت العربية من الورشة وقلت هجربها عشان اعمل التقرير تانى يوم روحت عشان اغير سير الدينامو بواحد جديد عشان انا كنت مركب واحد قديم عند الاسطى حمدى عشان الجديد اتقطع وقلت بعدين ابقى اغيره وغيرته واتقطع بيه وبعدين دخلت فى قصة المياه والطبب وشجرة المياه وده استلزم ان العربية تقف كام يوم والمهم الحمد لله كله خلص على خير والاسطى حمدى عمال يستعجلنى فى التقرير هههههههههههههههههههه.
المهم الكهربائى طلع حمار لانه ما اخدش باله من موضوع الطنبورة بتاعت الدينامو الاصلى والدينامو الاستيراد وده طبعا بهدلنى انا وغرمنى تمن 3 سيور دينامو ده كمان ناهيك عن الوقفة والعطلة وغيره .
العربية دلوقتى وبعد فترة من استلامها اقدر اقول :-
1 - ما شاء الله زى الفل وكان مفيش حاجة حصلت فيها .(ربنا يديمها نعمه )(وقولوا ما شاء الله ).
2 - صوت الموتور انا حاسس انه هدى بشكل ملحوظ .
3 - سحب العربية تقريبا هو هو قبل كده ( مش عارف انا حاسس انه قل عن قبل كده بس مش متاكد وهشوف القصة دى مع الاسطى حمدى لما اروحله ).
4 - حاجة مهمه حصلت وهى واحنا بنغير طقم البوجيهات كان فى بوجيه معصلج ومش عاوز يطلع ولا حتى بالطبل البلدى (فى كاوتشة نزلت عنده ومش عارف منين وحاولنا نطعلها اول مره لكن معرفناش وساعتها كان النور مقطوع والوقت بقى متاخر وانا كنت فرهضت والاسطى حمدى كان جاب اخره ) والمهم اتفقنا انى هجيله بعد يومين نشيك ونغير البوجيه ده وقد كان هو طلعه بطريقة احترافية وهى انه هوى سن البوجيه شوية وبعدين قالى دور واول ما جيت ادور لقينا البوجيه بيتنطر من العربية وهو كان عامل حسابه وحاطط دواسة جلد فى سقف الكبوت من جوه عشان البوجيه مينقرش فيه .(ودى حاجة انا شوفتها بعينى و كان لازم اذكرها عشان مبقاش بابخسه حقه) .
وفى حاجة تانى وهى لما كان بيغير الكاتينة كان فى حتة صاجة كده معفنه وليها سنون محطوطة جنب البلية هو شالها وقالى دى ساعدت ان السير يتقطع اسرع وقال انها ملهاش لازمة وفعلا شكلها ملهاش لازمة وقال انها فى الموديلات الجديدة متشالة (ودى برضه تحسبله ).
وفى حاجة تانى وهى ان فى مسمار وش سلندر كان مش لاقيه وقعدنا ندور عليه ومالقيناهوش وهو بصراحة وبدون كلام كان رايح يفكه من عربيته ويركبه عندى (هو طبعا اتضايق ان حاجة زى دى ضاعت من عنده وكان هيتجنن وعشان يرضينى كان هيفكه من عنده من غير حتى انا ما اقله )ولكن انا كان فى تقريبا حاجة ناقصة تانى فاخدت التاكسى بتاعه وروحت جبتها واشتريت مسمار استيراد وركبناه والحمد لله بدون تعطيل لا ليه ولا لعربيته التاكسى .
ولو انى ليه ملحوظة عليه صغيرة وهقولها وهى انه لما غير الطبب بتاعت الموتور من قدام وكانت خربانة ومتاكلة من الصدا كان لازم يبص على بقيت الطبب ( اللى ورا كمان ).
والشجرة بتاعت المياه دى انا لاحظت انها بتجيب مياه وانا عنده لما كنت بستلم العربية وقلتله عليها قالى لا مبتجبش ولو ان ساعتها كانت بتجيب بسيط جدابس كانت بتجيب .
الفكرة فى الملحوظة دى انى اضطريت انى اروح عند ميكانيكى تانى قريب يعملى الشغل ده لان العربية وانا رايح للاسطى حمدى عشان يشوف موضوع المياه ده كانت بتفضى مياه على طول ومعرفتش اكمل بيها على الدائرى وانا رايحله وطبعا خفت ليحصل مشاكل تانى ولفيت ورجعت على طول .
وبصراحة انا مكنتش عارف الميكانيكى التانى هيبوظ فيها حاجة ولا ايه وخصوصا انها لسه طالعه من عمليه جراحية ولكن الحمد لله ربنا ستر وجت سليمة .
قطع الغيار اللى اشترتها مش كتير وهى كالتالى "-

1- طقم سيور دنجل كورى اصلى من واحد معرفه فى التوفيقية بيشتغل فى السيور ب 150 ج.
2 - بلية الكاتينة تايلاندى من عند الاعتماد فى ش دمشق ب 100 ج .
3 - تيل امامى كورى من شخلول ب 55 ج.
4 - قاعدة امامية من شخلول ب 50 ج .
5 - شجرة المياه من شخلول ب 90 ج .
6 - طقم بوجيهات NGK 16 صامولة ثابتة من عند محمد احمد فى ش السودان ب 60 ج.
7 - الطبب ودى من عند الخراط اللى عند ورشة الاسطى حمدى ب 10 ج الواحدة ومن عند الميكانيكى اللى جنب البيت جابها ب 5 الواحدة وهى اساسا عند شخلول ب 3 ج الواحدة .(مش مهم)
8 - مصنعية الخراط بطقم جلد الصباب 200 ج .
9 - مصنعية الاسطى حمدى فى الحوار ده كله 350 ج.(خصم لنايل موتورز طبعا )
10 - مصنعية الميكانيكى التانى بتاع الطبب اللى ورا وشجرة المياه 80 ج .عشان فك المنفل والمرش كمان .
11 - دينامو استيراد لانسر ب 300 ج .
اتمنى انى اكون قدرت اشرح بالتفصيل الممل التقرير بكل ما حصل فيه .
واسف لو كنت اتخرت فى التقرير ولكن غصب عنى وعلى راى الاسطى حمدى لو كان فى حاجة مش مظبوطة كانت من تانى يوم هتتنشر وكده هههههههههههه .
واى استفسار انا والاسطى حمدى طبعا فى الخدمة .

المشاركة الأصلية كتبت بواسطة hugan

مش مهم المصاريف والتعب
اهم حاجه ان العربيه ضبطت
وتقدر تسوقها بعد كده بدون مشاكل

الحمد لله وعلى اد كده بقول جت بسيطة برضه

واسف لو كنت اتخرت فى التقرير ولكن غصب عنى وعلى راى الاسطى حمدى لو كان فى حاجة مش مظبوطة كانت من تانى يوم هتتنشر وكده هههههههههههه .
-----------------------------------------------------------------
كنت متأكد ...مع انى كنت شاكك....هههههههههههههههه
الله بنور عليك ..ياميدو باشا..
وربنا يجعلها آخر الأعطال..وتتمتع بعربيتك..
ظلمت الراجل ياحمدى..كان مزنوق ومش عارف يكتب التقرير
دايما تجيبو لنفسياتكو الكلام كده..هههههههههه.
حبيبى يافنى (مخترع المانوال بدون دبرياج )

المشاركة الأصلية كتبت بواسطة ابوجنى2112

واسف لو كنت اتخرت فى التقرير ولكن غصب عنى وعلى راى الاسطى حمدى لو كان فى حاجة مش مظبوطة كانت من تانى يوم هتتنشر وكده هههههههههههه .
-----------------------------------------------------------------
كنت متأكد ...مع انى كنت شاكك....هههههههههههههههه
الله بنور عليك ..ياميدو باشا..
وربنا يجعلها آخر الأعطال..وتتمتع بعربيتك..
ظلمت الراجل ياحمدى..كان مزنوق ومش عارف يكتب التقرير
دايما تجيبو لنفسياتكو الكلام كده..هههههههههه.
حبيبى يافنى (مخترع المانوال بدون دبرياج )

الله يخليك يابو جنى يا كبير