الموضوع: هو ايه اللى بيحصلى ده

السلام عليكم
اليومين اللى فاتوا دول انا حصلى شوية حاجات كده غريبة ( الحمد لله على كل حال ) هفضفض معاكو فيها شوية .
اولا انا معايا عربية BYD 2007 عاملة 120000 كم اشترتها من حوالى 3 شهور وانا لما اشترتها صاحبها قالى السيور متغيرة من قريب ابقى غير على 140000 كم ( منه لله ) طبعا انا ما اخدتش بالنصيحة بتاعته ومن حوالى اسبوع كده ابتديت رحلة الصيانة والبحث عن ميكانيكى كويس يشوف العربية محتاجة ايه بجانب الصيانة الاصلية من تغيير الكاتينة وخلافه المهم وبناء على راى الاعضاء هنا فى المنتدى استقريت على الاسطى حمدى الفنى فى ورشته الورشة الرخمة المتواضعة ( زى ماهو مسميها ) .
المهم روحتلو يوم الاربعاء اللى فات وشوفنا ايه المطلوب وكان فى صوت غريب جاى من ناحية الدينامو وفعلا قالى ان الدينامو عاوز يتغير .
وبعد ما عرفت ايه هو المطلوب مشيت من عنده عشان اجيب المطلوب وتانى يوم (الخميس) روحت للكهربائى عشان اشوف قصة الدينامو دى وفعلا اللمبة كانت منورة فى التابلوه والكهربائى قالى يتغير وقد كان طلعت على بتوع الاستيراد وجبت دينامو لانسر استيراد ب 300 ج ( حليته من على ماكينة ) وروحت للكهربائى وركبنا وبدو العربية سمعت صوت صريخ السير المهم بطلت العربية والكهربائى شد السير شوية الصوت راح فعلا .وكنت رايح مشوار قريب من البيت وهو اصلا الكهربائى كان قريب من البيت برضه وبعد ما اتحركت بالعربية لقيت اللمبة بتاعت الدينامو نورت تانى كلمت الكهربائى قالى بطل العربية شوية وبعدين دور وفعلا ريحت العربية شوية وبعدين دورت ومشيت اللمبة قامت منورة تانى وسمعت صوت [COLOR=rgb(255, 0, 0)]فرتكة ايوة كان حاجة بتتفرتك [/COLOR]وعلى طول روحت راكن على جنب وبطلت العربية وفتحت الكبوت وبصيت على السيور ملقيتهمش سير الدينامو مش موجود من اساسه وسير التكييف موجود منه حته المهم كلمت الكهربائى قالى شوف حد عندك يركبلك السيور( وانا الحمد لله كنت شارى السيور اليوم اللى قبليه لانى كنت بجهز للصيانة ) والحمد لله كان قريب منى كذا ورشة ميكانيكى وكهربائى ومشيت بالعربية شوية صغيرين من غير السيرين (هو ده ممكن يعمل مشكلة ) لغاية الورشة وركبتهم ودفعت مصنعية تانى ولكن الحمد لله .
يوم الجمعة روحت ش دمشق كنت عاوز اجيب طقم دبرياج وبعد لف ودوران الحمد لله جبته وروحت لشخلول جبت منه شوية حاجات تانى وبعدين روحت على البيت قبل الحظر والعربية كانت ماشية تمام .
يوم السبت وما ادراك ما يوم السبت كان فاضلى طقم بوجيهات بس ملقيتوش عند شخلول ملحقتش اجيبه يوم الجمعة من عند حد تانى عشان الحظر المقرف ده فقلت اجيبه السبت بدرى وبعدين اطلع على الورشة ولاجل الحظ قلت انزل التوفيقية اجيبه من هناك على طول واطلع على الورشة ولاجل الحظ برضه الطريق كان زحمة موووووووووت ويادوب بنمشى تاتا تاتا وانا ماشى حسيت ان الدبرياج تقييييييل والغيارات ( الاولانى اللى كلنا كنا ماشيين عليه ) بيعض جامد .
مش عارف حسيت ان فى مصيبة هتحصل ولكن هروح فين وسط الزحمة دى وبعد شوية العربية بطلت ودورت دارت ولكن ببرجلة شديدة وكلها بتترجرج وشميت ريحت شياط ودخنة وطبعا انت عارف لما تقف فى حتة زى دى وزحمة جدا محدش هيسمى عليك المهم بعد ما دورتها ركنت على جنب وبطلت وفتحت الكابوت لقيت دخان وشياط استنيت شوية لغاية لما هديت وقعدت ابص على الفيش والسلوك والضفيرة لكن كله تمام قمت مكلم الاسطى حمد قالى خليها تبرد وشيل كابل البطارية وحطه عملت كده فعلا وبدور دارت ويادوب طلعتنى من عند الاسعاف كده لغاية امام وزارة الخارجية وقامت حالفة ماهى دايرة تانى يمين شمال مفيش سيبتها تبطل وشيلت الكابل وحطيته ادور مفيش كلمت الاسطى حمدى قالى بص على الكرنك والطنبورة وحاجات كده وبعدين قالى شوف سير الكاتينة ( انا كنت شاكك فيه من الاول ) ولانه متغطى معرفتش اشوفه .
المهم جبت عربية قطرتنى بعد ما قعدت حوالى ساعتين امام وزراة الخارجية وكل شوية واحد من الامن يطلعلى لكن بصراحة لما شافو الموقف صعبت عليهم وجابولى ميه ساقعة من عندهم وبعد كده طلعلى واحد من الحراسات الخاصة وطلب منى الرخصة (كنوع من انواع التامين) وانا بصراحة قمت اديتهاله وقالى اول ما الونش يجبلك وتيجى تمشى انا هديهالك على طول .
وفعلا اول ما العربية جات اخدت الرخص وطلعت على الورشة وان شاء الله النهارده هعرف ايه اللى تم ( لان امبارح الاحد وهو قافل )وهوافيكم باللى حصل وهعمل تقرير مفصل بالصيانة الى تمت والاسعار ان شاء الله بس ادعولى ان الموضع يبقى بسيط .
اسف على الاطالة

ربنا يعينك ويقويك وان شاء الله تتصلح وتبقى عال العال

المشاركة الأصلية كتبت بواسطة salah_86

ربنا يعينك ويقويك وان شاء الله تتصلح وتبقى عال العال

امين يارب - وشكرا لمرورك الكريم

المشاركة الأصلية كتبت بواسطة حمدى الفنى

تم فك وش السلندر وبالكشف والبحث تبين وجود اعوجاج 5 صبابات وتمت المعاونة من قبل حمدى الفنى واستخدام الحرفة والفنية كى لايتم ضرر مادى اكثر من ذالك تم استعدال الخمس صبابات وفريزة وروديه وجلد صباب وتقفيل الوش على نفس جوان السلندر لائنو صاج اصلى ويجوز استخدامو اكثر من مرة ولسنا بحاجة لتغير طقم صباب لائن العوج بصيط ويمكن استعدالو

يا جماعة هو الاسطى حمدى ميقصدش بانه وجد 5 صبابات معووجة انها معووجة العوج اللى يجيى فى دماغنا ( مش خربانة يعنى ) حتى انا صاحب العربية نفسى اتخضيت لما قالى كده لكن طبعا هو فهمنى بعدها ان الاعوجاج يكاد لا يكون يذكر ( على حسب كلامه ) يعنى تقريبا مفيش اعوجاج ولكن هو عمله زى ما تقولو كده زيادة توكيد عشان النسبة البسيطة جدا جدا دى تتمحى تماما ( وهو يشكر على ده ).
انا لو كنت شاكك فى ان الموضوع فى عك او اى حاجة مش مظبوطة كنت جبت طقم صباب جديد ولكن طالما ان المشكلة بسيطة ومش هتتعبنى بعد كده ولا هتعيب العربية يبقى ليه ماهى مش تكاليف على الفاضى وبعدين الاسطى حمدى ظبط الاداءوقالى مفيش داعى لطقم صباب جديد وانا كنت عنده امبار ح واستلمت العربية وبجربها وان شاء الله انزل التقرير من اول ما روحتله لغاية ما استلمت العربية منه بعد التجربة .
وشكرا