السلام عليكم.........معلم فعلا يا حاج صبحى وتفكيرك ممتاز ويا ريت تشوف لنا طريقة بالمرة نعرف بيها اذا كان فيه تسريب فى المواسير اللى جاية من التنك علشان انا ناوى اعمل الحكاية دى لان الاستهلاك عندى فى حدود180كيلو/20لتر مع وافر الشكر
عرض للطباعة
وعليكم السلام ورحمة الله وبركاته
بسيطة عاوز تكشف على المواسير كلها نفس الشرح السابق مع استبدال التانك بزجاجة بنزين يعنى حنفك خرطوم التغذية من ماسورة التغذية اللى فى صدر العربية ونحطه فى زجاجة البنزن و حنفك الخراطيم من العوامة ونقفلها كويس بمسمار10 مثلا.... نقفل خرطوم التغذية وخرطوم الراجع وشغل طلومبة الكهرباء وجرب متسورة ماسورة اضغط فيها وانزل تحت العربية لو لقيت ترشيح بنزين يبقى وصلنا للمشكلة لو الكل تمام يبقى خلاص تمام....
9ك/ لتر جوة البلد استهلاك ممتاز وخصوصا لو مثبت اتجاة بوابة الهواء لعمة الكاربراتير على البارد لكن فى الطوالى ممكن توصل ل10.5 ك /لتر ؟؟
فعلا ياباشا انا قصدى مقاس الفلر والمقاس الأصلى 0.1 مم مش 0.3 مم ده كتير قوى ويخلى تاكيات العربية تخبط وترزع كمان على فكرة انا اشتريت فيلر تركى وظبطت الموتور بنفسى وجربت ال0.2 بس لاقيت افضل ظبطة 0.15 مم الموتور بقى بارد وصوتة واطى لكن لما جربت 0.1 مم العربية بقت طلقة والموتور مالوش صوت نهائى بس الموتور سخن زيادة شوية وطبعا خير الأمور الوسط فرجعتها ل0.15 تانى وماشية 10/10 بالبنزين ال80 كمان ولله الحمد تحياتى !!
يا جماعة أنا كدة هبتدي أتلخبط تاني فى موضع الاستهلاك
مثلا أنا يوم الخميس قاطع حوالي 200 كيلو دايركت على مشوارين 100 رايح و100 جاي ولطريق بردو فيه وقفات وفيه مكسر وزيادة على كدة 25 كيلو زحمة على مكسر يعني المجموع 225 كيلو والعربية أخدت 15 لتر أعتقد كدة الاستهلاك تمام
تعالي بقي المشاوير الداخلية على شاكلة الــ 25 كيلو الزحمة ......... لومشيت بالكتير 150 كيلو يمكن احط صفيحة بنزين كاملة ( 20 لتر ) ......... دة بقي ليه تفسير
تقريبا كده عندي مشكلة في الاستهلاك، لانها بتعمل معايا في الطوالي 180 كيلو في الصفيحة..
الميكانيكي قاللي الكاربراتير محتاج يتظبط علشان فيه دخنة سودا وكمان البوجيهات بتسود بسرعة.. هل كلامة ده صحيح؟؟ ولو صحيح اروح لمين كويس بتاع كاربراتير في القاهرة او الجيزة؟ ولا اشتري كاربراتير جديد؟
نصيحه اخويه غير الكربراتير احسن بواحد استيراد معدل استهلاك عربيتى للبنزين بشع كان صفيحه لل 100 كيلو روحت للى بيقولوا عليهم اساتذه كرباتيرات فى شبرا وادفع يا معلم ورايح جاى 3 ورش للتصليح وفى الاخر وصل المعدل صفيحه لل 140 كيلو طبعا معدل صعب وللعلم فى الطوالى وان شاء الله ناوى اغيره بواحد استيراد بس مستنى اخلص من دخله المدارس
انا كان عندي هسهس في عربيتي من استهلاك البنزين الغير عادي
وصرفت كتير علي الكربراتير صيانه وبيكات وظبط
في الاخر روحت للميكانيكي قولتله يكونش الاسبراتير عاوز يتظبط
قالي لا
قولتله طيب اظبطهولي
قالي مش محتاج
قولتله اظبطه علي مسؤليتي او اروح لواحد تاني يظبطه
المهم ظبطهولي
ومن ساعتها الاستهلاك بقي زي الفل
وربنا يعوض عليا في اللي صرفته
فعلا مش غريبة علاقة استهلاك البنزين مع ضبط الابرتير والكهرباء عموما لأن لو الكهربا واطية والاسبرتير ماخر شوية دالا بيخلك تفعص دواسة البنزين علشان العربية تشد وتمشى وبيبقى دا على حساب استهلاك بنزين اكثر اما لو كهربا السيارة مظبوطة (الاسبراتير مظبوط )دا حيخليك يدوبك تلمس دواسة البنزين حتلاقى العربة بتنط زى الفراشة....*
وشكرا لزيارتك استاذ شنورى لقسمنا المتواضع........