الموضوع: مقارنة بين انواع الجي امات

ازيكو يا رجالة

من فترة كدة كنت جربت كذا جي ام على الصب اللى كان معايا فقلت اقولكم الاخبار عشان اللى حابب يشتري يكون عارف على الاقل مميزات وعيوب كل نوع

الانواع اللى جربتها :

1- بايونير 820 وات 2 شانيل (380rms)



2- كينود 720 وات 4 شانيل - الموديل القديم - (340rms)



3- سيمفوني - المصري - 400 وات 2 شانيل (300rms)

الجي امات دي اتجربت على :

1- صب كيكر امريكي
2- صب بايونير 1400 دبل كويل
3- سماعتين بايونير 550 وات

عشان ماطولش عليكم هتكلم على كل جي ام واللى لاحظته من خلال التجربة دي

البايونير

الجي امات البايونير عموما مش منتشرة اوي في مصر وارجح ان عدم انتشارها بسبب سعرها الغالي !! لكن عموما الجي ام البايونير نقاءه عالي جدا !! بيجيب تردات في البيز الكينود والسيمفوني ماجبهاش ! مشكلته ان خرجه ضعيف جدا مقارنة بالسيمفوني والكينود ومش بيستحمل !! يعني على الرغم انه اعلى جي ام في الوات والقدرة الفعلية الا انه التجربة اثبتت ان خرجه اقل من السيمفوني والكينود بكتيير !! الى غير انك تحس انه جي ام حافظ مش فاهم !! ؟ يعني مهما تعلي توطي درجة البيز ثابتة


السيمفوني

السيمفوني جي ام بتاع رزع وهبد !! اقوى واحد في الخرج لك ان تتخيل ان السيمفوني ال 400 وات كان مطلع قوة اكبر بشكل ملحوظ من الكينود ال 720 وات والبايونير ال 820 وات !!! بس هو اقلهم في درجة النقاء !! ؟ فعلا فيه فرق كبيير في النقاء بينه وبين البايونير !!! بيطلع بيز غشييم وخلاص !! مشكلته انه لما بيسخن ممكن يفصل وطبعا اعطاله كتيره


الكينود

يعتبر الوسط اللى هو بين البينين لا هو قوي زي السيمفوني ولا ضعيف زي البايونير !! نقاءه ممتاز بس مش زي البايونير والفرق ممكن مايكونش ملحوظ

الكينود من وجهة نظري هو احسن جي ام موجود في السوق المصري حاليا خصوصا الموديل اللى قبل اللى موجود حاليا ال 720 وات ال 4 شانيل


طبعا كل واحد فينا ليه صوت معين بيحب يسمعه !! فيه اللى بيحب الصوت المكتوم وفيه اللى بيحب التربلات وفيه اللى بيحب الهبد والرزع وفيه اللى بيحب البيز الناعم وعشان كدة ممكن تختلف الاراء

لكن من وجهة نظري

احسن جي ام للبوازيك هو السيمفوني
احسن جي ام للسماعات هو البايونير
احسن جي ام 4 شانيل للسماعات وصب هو الكينود

وللاسف مافيش جي ام في السوق حاليا ممكن يقوم صبات دبل كويل بكفاءة الا السيمفوني وسعتها انت مضطر تستغنى عن النقاء

فاللى بيفكر يجيب صب دبل كويل حاجة من 2 مالهمش تالت

ياما يجيب جي ام محترم من برة / او يشتري جي ام مستعمل نضيف (لانه مش بيتباع في مصر جي امات محترمة)

ياما يختصر المشوار ويجيب بازوكا ويركبلها جي ام سيمفوني بدل مايدفع في الصب كتير وفي الاخر مايعرفش يلاقيله جي ام محترم يقومه

الجي امات اللى موجودة حاليا في السوق

بايونير 820 وات 2 شانيل (590 جنيه)
بايونير 400 وات 2 شانيل (في رنج ال 400 جنيه مش عارف كام بالظبط)
بايونير 720 وات 4 شانيل (680 جنيه)

كينود 350 وات (في رنج ال 400)
كينود 500 وات 2 شانيل ( 550 جنيه بس من فترة مش عارف دلوقتي عامل كام)
كينود 720 وات 4 شانيل (750 جنيه برضوا من فترة ومش متاكد من سعره دلوقتي)
كينود 1000 وات 2 شانيل (مش موجود الا عند السجان ب 1250 )

سيمفوني 350 وات
سيمفوني 400 وات
سيمفوني 500 وات
سمفوني 600 وات
سيمفوني 700 وات ومعلش مش عارف اسعارهم لاني مش بعترف بالسيفموني كجي ام اصلا ولو ادهولي ببلاش مش هركبه

سوني 350 وات
سوني 600 وات وماليش تجارب مع السوني بصراحة فمعرفش برضوا عنه حاجة

اتمنى اكون افدتكم