مانيوال طبعا
أفضل فى القيادة وأرخص فى الصيانة
عرض للطباعة
مانيوال طبعا
أفضل فى القيادة وأرخص فى الصيانة
طيب كلام جميل يعني الموتور الجبار مش محتاج فيتس بردوا جبار (على حسب معلوماتي المتواضعة)
الفيراري اللي حضرتك بتتكلم عليها وخاصة الموديل الصاروخ Ferrari 430 scuderia الفيس في الدريكسيون يعني مش مانيوال خالص وادي صورة يمكن انا مش واخد بالي اليمين ازود السرعة والشمال انقص !!!!!!
http://www.zshare.net/image/18494398883dc991/
ومن الواضح كمان في الصورة ان مفيش دبرياج خااااااااااالص معنى كدة انه من مانيوال خااااااالص !!!!!
بردوا في الفيراري Ferrari 612 Scaglietti Coupe 2008 فيتيس اوتومايك !! ودي صورة كمان ليها يمكن انا بردوا مش واخد بالي!!!!
http://www.zshare.net/image/18495610ddf00966/
ودي صورة تانيه لنفس الموديل
http://www.zshare.net/image/184957091d28dbc7/
تاني فيراري انزو الجبااااااااااااااااارة فتيسها اوتوماتيك وادي الصورة!!!
http://www.zshare.net/image/1849608908efd476/
حيث انى بسوق ده وده وبمعدل شبه متساوى تقريبا وفى نوعيات متقاربة من الطرق اقدر اقول الآتى
1- مش كل الأوتوماتيك زى بعضه، يعنى مثلا هنلاقى ان الأوتوماتيك بتاع السيارات الكورية موديلات التسعينات (هيونداى-دايو- كيا) يجيب شلل ، سحبه بطيييييييئ جدا وبتحتاج انك تجيب البنزين على الأرض علشان العربية تتحرك ، لكن الأوتوماتيك بتاع اليابانى من اول التسعينات وبتاع الكورى الحديث (ما بعد 2004)(زى الفيرنا والماتريكس والأوبترا والإلانترا) تسارعه ميفرقش كتير عن المانيوال ، والعربية بالفعل بتطير من على الأرض مع لمسة بنزين لدرجة انك مبتعرفش تحكمها فى الزحمة غير بالفرامل، برضه فية تباين فى الأداء بين الموديلات الأوروبية والأمريكية المختلفة لكن بالفعل الجير الأوتوماتيك ديلوقتى غير التسعينات
3- تسارع الأوتوماتيك ممكن يكون اقل شوية من مثيلتها المانيوال لكن ده بيعوضه ان الفتيس بينقل فى وقت اقل كتير من اللى انت هتنقل فيه (جربتها 100 مرة انى اطلع حرق مع سيارة مانيوال، دايما هو بيتأخر عنى فى لحظة الطلوع ولحظة الغيارات، ممكن يعدى منى او يحصلنى او يتأخر عنى بعد كدة حسب مهارته فى القيادة، لكن بالفعل فى السرعات العالية مبتفرقش كتير)
2- الميزة الأساسية اللى بحسها فى المانيوال هى سهولة التحكم فى العربية فى الاختناقات المرورية فى شوارع مصر، او بكلمة اخرى بقدر اتحكم فى العربية المانيوال انى الزق فى ضهر العربية اللى قدامى علشان محدش يكسر عليها، وده بفضل وجود الدبرياش،لكن بالنسبة للأوتوماتيك لازم اسيب مسافة لأن لمسة البنزين بتخلى العربية تطير لقدام ولو ملحقتهاش بالفرمل ممكن البس فى اللى قدامى
3- مقابل هذة الميزة فأنه بعد القيادة لمدة نصف ساعة بسيارة مانيوال فى اختناق مرورى تحس ان الرباط الصليبى بتاع ركبتك الشمال هيطق خلاص،وطلعلك كاللو فى بطن قدمك اليسرى ، وكوعك اليمين جاله جفاف واعصاب كفك اليمين انت مش حاسس بيها ، بعكس السيارة الاوتوماتيك التى كل ما ينالك منها بعد الزحام هو حالة من الملل المرفه، لكن مهما كانت حالة الزحام انت مبتتعبش بدنيا لو العربية اوتوماتيك
4-المانيوال له ميزة الاستجابة للقيادة الاقتصادية، يعنى مثلا فى الطريق الدائرى آخر 2 كيلومتر قبل التقاطع اللى انت هتخرج منه على شكل منزل تقدر تمور العربية، الميزة دى غير متاحة فى الأوتوماتيك ، وبالتالى لو انت سائق اقتصادى تقدر تعمل بالمانيوال استهلاك افضل من الأوتوماتيك بحوالى 5-10%
5- المانيوال تقدر تدوره لو المارش او البطارية عطلانة، الأوتوماتيك مينفعش
6- تسقيط غيار فى الأوتوماتيك اسهل واسرع من المانيوال كتير جدا ، وبالتالى على عكس ما يظن البعض، استجابة الأوتوماتيك للطوارى فى الطرق السريعة بتكون سريعة جدا ولا تشغل السائق بالدبرياخ والفتيس وتترك له الفرصة للتركيز فى الحالة الطارئة الموجودة امامك
7- المانيوال بيدى للسائق حالة من الاحساس بالتواصل مع السيارة حيث يكون لكل طرف من اطراف السائق الأربعة دور فى القيادة وبالتالى يشعر بالإتصال مع السيارة بشكر افضل، وده بيحقق حالة افضل من الاشباع النفسى للسائق، بعكس الأوتوماتيك التى تقاد بيد واحدة وقدم واحدة وبالتالى تقل حالة التواصل بين السائق وبينها
الخلاصة: الأوتوماتيك افضل بكتير لمن يحتاج للسيارة لتسيير اموره ويتعرض بكثرة للطرق المزدحمة، المانيوال افضل لمن يحب القيادة فى حد ذاتها، بس ميزعلش من اللى هيحصل له فى الزحمة
:auto: بصراحة مصر عايزة السيارات الاتوماتييييييييييييييييي ييييييييييييييييييييييك علشان زحمتها زادت اوى وخصوصا في المواسم والمدارس والاعياد و.... و.... ولو في حد معدى ...و ...انهاردة مثلا وقفت على المحور حوالى نصف ساعة وكل ده رجلك على الدبرياج تقريبا واطلع واقف وكل يوم على ده الحال وربنا يستر.
.... لا اله الا انت سبحانك اني كنت من الظالمين ....
انا قلت فيرارى بتنزل يا اما علبة سيكونشال, يا اما مانيوال,
اللى انت بتتكلم عليه ده سيكونشال مش اوتوماتيك, و أنا قلت قبل كده انو بيعتبر مانيوال لكن مع محرك لتغيير السرعات, لكن فى تركيبه أقرب للمانيوال منو للأوتوماتيك, العلبة ديه اسمها F1 على ما اذكر, و هى تقريبا نفس العلبة المستخدمة فى سباقات الفورمولا واحد, و هى قريبة من بنية السيلسبيد بتاعة الفاروميو(أول علبة تروس ذكية عرفتها السيارات المدنية), لكن عمرك ما هتلاقى فيرارى باوتوماتيك عادى.
و رغم ذلك, معظم موديلات فيرارى متوفرة اما بطراز مانيوال عادى أو علبة تروس ذكية.
فى المحركات الكبيرة, مش هتحس بمشكلة الأوتوماتيك, لكن هذا لا يمنع أنك لو زودت نفس المحرك الضخم بعلبة تروس يدوية, أداء السيارة هيبقى أفضل.
أستاذ سبعاوى أنت محق تماما, لكن سرعة النقل فى المانيوال تعتمد على السائق, و مع التدريب, يصبح لدى السائق نوع من التوافق العصبى و العضلى لتغيير السرعة فى أجزاء من الثانية, و هو ما يحدث فى سباقات السرعة, حيث يستطيع السائق تغيير السرعة فى وقت لا يذكر تقريبا, و هذا يحتاج للتدريب, كما أن نوع السيارة يختلف اختلافا شديدا, فمثلا يجب أن تكون النسب قريبة من بعضها البعض, و لاحظت مثلا أن فى سيارة مثل ال128 النسب بعيدة تماما, لكن فى سيارة مثل الشاهين لاحظت أن النسب أقرب لبعضها البعض, مما يوفر بعض الوقت أثناء تحريك عتلة تبديل السرعات, و لو ان الشاهين تحتاج الى جهد عضلى أكبر لتحريك لتغيير النسب سريعا.
فى النهاية فانه لا يمكننا أن نقول بأن الاوتوماتيك يغير النسب بشكل أسرع, لأن المانيوال ليست له سرعة محددة, بل تعتمد على السائق فى الأساس و توافقه العصبى و العضلى, و القليل من السائقين يستطيع أن يغير النسب بسرعة فائقة , بالاضافة الى التعود على السيارة و طبعا طبيعة علبة التروس و تصميمها.
Lexus IS-F اوتوماتيك بتنقل فى 0.1 ثانية. بيتهيألى مفيش انسان يقدر ينقل بالسرعة دى.
بالنسبالي المانيوال ممتع جدا
ساعات لما اركب عربيه اتوماتيك احس بالراحه التامه
لكن برضه عندي المنيوال المفضل
مش ناوي اركب اتوماتيك غير لما يبقي عندي 45 ولا 50 سنه لو كنت لسه عايش:)
انا بفضل المانيوال مبحسش إنى سايق غير لما أغير بين الجيرز و ألعب فى الفيتيس
أما حتة هما أخترعوا الأتوماتيك ليه
فدا كان عشان الدبابات والعربات المدرعة طبعا دا مش حيهموا لو دخل فى شجرة حيكمل المهم و جدوا فى الحرب العالمية الإولى إن الدبابات و المدرعات ذات ناقل الحركة المانيوال صعبة القيادة و ليست خفيفة الحركة و كتيييير جدا كان الى سايق يتلخبط بين الجيرز و يبوز الدنيا خاصة إنه بيبقى بيتحرك ت بيسوق تحت ضغط نفسى جبار و محدش بيتعرضله فى الحياة اليومية من سائقى المانيوال و كمان السواق حيركز فى النقل ولا التوجيو ولا فى القذايف الى جياله المهم طور الجيش الأمريكى ناقل الحركة الأتوماتيك عشان يستخدم فى العمليات العسكرية و كمان محدش ينكر سهولة قيادة الأتوماتك عن المانيوال و بعد كدا إستخدموه فى العربيات المدنية كنوع من الكماليات
بس هى دى حكاية الأتوماتك
فيه خلط بين المسميات يا جماعة...
كلنا عارفين الفتيس المانيوال و لا غبار علية: الفتيس اللى السواق بيختار الترس اللى يعجبة و العربية فيها دبرياج
و زمان اوى مكنش فيه اوتوماتك غير:الفتيس اللى بينقل لوحدة و العربية مفيهاش دبرياج
دلوقتى الفجوة اللى بين النوعين دول اتملت بحاجات كتير منها الفتيس التعاقبى sequential اللى لغى الدبرياج لكن بيدى السواق فرصة اختيار النقلة اللى على مزاجة و نظريا بياخد ميزة النوعين و مؤخرا ظهر الفتيس الCVT اللى بياخد مميزات التلاتة... عدم وجود دبرياج و اتاحة فرصة للسائق لاختيار النقلة اللى عايزها و النقل الاوتوماتيكى زى الفتيس الاوتوماتك التقليدى
و من هنا بداء الناس تقسم الفتيسات حسب وجهة نظرها... يعنى اللى مش بيلاقى دبرياج يقول اوتوماتك و اللى يلاقى زرار + و - يقول مانيوال و اللى يلاقى CVT يقول كلشنكان
الفكرة فى المقارنة بين الفتيسات لازم تكون على الاداء بشكل عام مش بس زمن النقلة او اختيار النقلة
يعنى لما فتيس اوتوماتك ينقل فى 0.1 من الثانية دى حاجة هايلة لكن لو منقلش خالص يبقى انجاز... و بالتالى يبقى الCVT احسن فتيس فى الدنيا... تعالى طلع عربية CVT مع عرربية مانيوال لازم الممانيوال حتاكل الطلعة باى حال من الاحوال....ليه؟؟
لان ببساطة اى فتيس مفيش بينة و بين الموتور دبرياج بيكون فية torque converter و دة بالنسبة لى الفيصل بين المانيوال و الاوتوماتك
و نتيجة وجود الtorque converter اللى بطبيعتة بيفقد بعض الوقت فى نقل الحركة عن الدبرياج التقليدى... و بالتالى لو تخيلنا 4 عربيات زى بعض تمام بس واحدة مانيوال وواحدة اوتوماتك و واحد تببترونك وواحدة CVT و حطناهم فى سباق صغير حيحصل ايه؟؟
اى عربية مانيوال تاكل الطلعة من الCVT و الاوتوماتك و التيبترونك و كل الاختراعات و دة راجع لعدم وجود اى فقد فى الحركة بين الموتور و الفتيس (فيه فقد طبعا بس هامشى جدا مقارنة بالtorque converter)
ساعه لما نخلص اولانى و نيجى ننقل للتانى بتاع المانيوال لازم يدوس دبرياج و ينقل الفتيس و يسب دبرياج... معرفش اسرع سواق فى الدنيا ياخد قد ايه لكن اعتقد انه اكتر من 0.1 ثانية و بالتالى التيبترونك حينقل اسرع... الاوتوماتك العادى ممكن يكون سريع زى التيبترونك بس الله اعلم حينقل عند كام RPM... الCVT حيقطعهم هما الجوز لانه مبينقلش اساسا و بالتالى مفيش اى فقد فى قدرة الموتور دا غير ان الموتور اصلا على RPM عالى طول الوقت و بيطلع اقصى قدرة
نفس السيناريو حيتكرر فى التالت و الرابع و بالتالى المانيوال حيفقد زمن اكبر فى عملية نقل التروس... لكن ممكن المانيوال دة يكون 6 نقلات قصيرين و الاوتوماتك 4 نقلات فقط و بالتالى تسارع المانيوال حيبقى اكبر على الرغم من فقد الوقت فى النقل من ترس لاخر...hالتيبترونك برضة ممكن يكون 6 نقلات و لو فعلا زمن النقل فيه اسرع كتير من زمن النقل اليدوى ممكن يعوض الفرق اللى خسرة فى الطلعة... برضة الCVT مقطع الكل لانة مبيضيعش وقت و شغال باقصى قدرة طول الوقت و اعتقد حيكون عوض الوقت اللى ضيعة فى الطلعة
يعنى فى الاخر الCVT اما فى المقدمة او متساوى مع امانوال و التيبترونك اما مع المانوال او لازق فيه و الاوتوماتك التقليدى مع نفسة
لما تيجى كل الناس دى تفرمل بتاع المانيوال اقل واحد حيجهد فراملة لان موتورة بيفرمل العربية معاه دا غير انة ممكن يسقط نقلات و يقف اسرع منهم كلهم
لما ينزلوا من عربياتهم حتلاقى بتاع المانوال مشدود جدا لانه متابع الRPM طول الشدة و بيستعمل رجلة الشمال و ايدة اليمين باسرع ما يمكن... فى حين ان بتاع الاوتوماتك و الCVT نازلين عادى خلص و ممكن يكونوا ناموا فى وسط السباق... بتاع التيبترونك اخرة حيطرقع صوابعة و شكرا
اكتر واحد انبسط من التجربة هو بتاع المانيوال لانة حس انة بجد بيجرى و بيبذل مجهود فى حين ان الباقى معملوش اى حاجة جديدة تختلف عن رحلتهم اليومية للشغل
و هما مروحين من خلال ميدان التحرير ووسط البلد بتاع الCVT و التيبترونك حيقلبوا اوتوماتك عادى و بتاع المانيوال حيلعن اليوم اللى طلع فيه رخصة
يعنى من الاخر كل حاجة ليها ميزة و عيب و الفيصل فى النهاية هو رغبة المشترى و صاحب العربية
MMamdouh
MMamdouh
وصف ولا أروع ومعلومات قيمة للغاية