عربيتي اكسنت شكل قديم فيها مشكله غريبه

**Fady_HANA** · 19-09-2013 02:00 PM

العربيه عندي في مشكله غريبه ابتديت بعد ما عملت حادثه.
العربيه بعد الحادثه فيها نتشه بتحصل غالباً في النقله التانيه و سعات بتحصل في الاول
و النتشه بتتحول و بتبقى قويه جداً لما بشغل التكييف
رحت للمكانيكي و مش فاهملها
فبرجاء المساعده
و شكراً

**Haitham Basha** · 19-09-2013 02:27 PM

العربيه عندي في مشكله غريبه ابتديت بعد ما عملت حادثه ...!!!!
الحادثة كانت فين و كان فيه في التصليح مكيانيكا و لا لأ و آخر صيانة قبل الحادثة كنت عامل فيها إيه على شان نقدر نفيدك ...!

**Fady_HANA** · 19-09-2013 03:28 PM

هي الحادثه كانت في مدخل مصر اسكندريه الصراوي من ناحيه اسكندريه
العربيه طلعت على الرصيف الرصيف زي الحجر فتلعت على واحد و بعدين مكان الحجر التاني مكنشي موجود فالعربيه نزلت على الارض و الحجر التالت خبطها و هو اللي وقفها.
فاللي عملته اننا احتجت ان الماتور كله يتحل و للاسف عملت زرجينه عشان كان الفرده اليمين في الشاسيه متأثرة بالحادثه و بعد كده رجع ركب الماتور تاني
اللي حصل بعد كده لحظت ان صوت الماتور عالي+ النتشه و انا بجيب التاني في اول النقله عادي و بعدين تحصل النتشه و بعد كده النقله تجمع عادي+ الصوت العالي في الماتور كنت الحظه لما التكييف يشتغل و بعد ما صلحت التكييف النتشه زادت اوي
اما بخصوص قبل الحادثه فكنت بعملها صيانه عند مكانيكي و كنشي فيها حاجه تذكر
الحاجات اللي صلحتها في الميكانيكا 1 ريداتير+سربنتينه+مراوح الخاصه بهم
و الميكانيكي ساعه الحادثه اللي ان الدينامو فيه اتلاف لكن العربيه ماشيه و محستشي ان البطاريه خلصت مثلاً .
و طبعاً واضح من كلامي ان التصليح وصل لظبط شاسيه(بس تأثير الحادثه عليه ضعيف)+ميكانيكا+عفشه+بس مرجعتش على الكهرباء
اسف للكلام الكتير
و شكراً لاهتمامك

**Fady_HANA** · 19-09-2013 03:32 PM

الصوت العالي في الماتور كنت الحظه لما التكييف يشتغل و بعد ما صلحت التكييف النتشه زادت اوي
معلش بس اخيراً للتكيف عندي قصه
بعد الحادثه صلحته على طول اشتغل معايا و كان صوت الماتور بيعلى و بعد كده باز
فسيبته بايز و كنت بهتم بحل قصه الناتشه لغايت مقلت و لكن لم تنتهي و بعد كده لما صلحت التكييف النتشه زادت اوي
شكراً

**Haitham Basha** · 20-09-2013 03:45 AM

اخبار القواعد إيه . قواعد الماتور و الفتيس ؟
و التكيف المشكلة في السرنتينة و لا الكمبروسر ؟
الكهربا لازم تراجع عليها لأنها ممكن تعلي الماتور أو توطيه خد بالك ...

**Kokooaoa** · 20-09-2013 01:44 PM

متابع

**Fady_HANA** · 20-09-2013 11:42 PM

مساء الخير
هو بالنسبه للقواعد انا مفكرتش فيها قبل كده و مكشفتش عنها بصراحه
بس انا لما ابتدي فيها يوم الخميس الجاي ابتدي بالكهربائي او ارجع للميكانيكي تاني احاول معاه
و اكد على راي اني مروحش لبتاع التكييف دلوقتي انا بفكر ابتدي بالكهربائي
ايه رايك و الف شكر

**Fady_HANA** · 20-09-2013 11:43 PM

في ناس قلتلي دي بوبينه الكهرباء عشان كده عايز اروح للكهربائي ولا ممكن تكون حاجه في الماتور؟
بالنسبه للمرة التانيه بخصوص مشكله التكييف كان في الكومبرسيور كان باز و جبت واحد جديد
و انا حاسس ان النتشه و الصوت العالي هما اللي ورا بوظان التكييف في تاني مرة بس الميكانيكي قالي لا ملهاش علاقه
بس يا باشا اول ما صلحت التكييف و جبت الكمبرسور الجديد معلش في الكلمه العربيه اتهطلت كلمه بتنتش قليله

**Haitham Basha** · 21-09-2013 01:17 AM

المشاركة الأصلية كتبت بواسطة fady_hana

في ناس قلتلي دي بوبينه الكهرباء عشان كده عايز اروح للكهربائي ولا ممكن تكون حاجه في الماتور؟
بالنسبه للمرة التانيه بخصوص مشكله التكييف كان في الكومبرسيور كان باز و جبت واحد جديد
و انا حاسس ان النتشه و الصوت العالي هما اللي ورا بوظان التكييف في تاني مرة بس الميكانيكي قالي لا ملهاش علاقه
بس يا باشا اول ما صلحت التكييف و جبت الكمبرسور الجديد معلش في الكلمه العربيه اتهطلت كلمه بتنتش قليله

الكهرباء الأول ضبط كهربت العربية و بعدين الميكانيكي ... العربية 90% على حسب الكلام هتطلع كهربا ... يا باشا ولا يهمك تهطلت نضبطها و لا إيه :)

**Fady_HANA** · 21-09-2013 01:05 PM

الف شكر على اهتمامك
انا هبتدي فيها الخميس الجاي على طول و اكيد هقولك على اللي وصلتله
بس كان في حوار رعبني حسيته شبه قصيتي و هوده:-
http://www.nilemotors.net/Nile/375463-a.html