حد اتصل بيه الرقم ده 24139500

**aliabutaleb** · 23-09-2013 01:34 PM

ممكن جداً يكون الجهاز القومي لتنظيم الاتصالات نترا.
هما على طول بيعملوا استطلاعات راي للمشتركين في شركات المحمول

**أبو صلاح** · 23-09-2013 07:13 PM

المشاركة الأصلية كتبت بواسطة الجنرال

برافوا .. ده كلام سليم

انا شغال فى المجال ده (ابحاث التسويق) وخبرتي كلها فى شركات الموبايل .. بالعكس انا اشجع كل واحد انه يرد على المكالمة ويقول رأيه بصراحة جدا وياخد راحته جدا فى الكلام

لان الكلام اللى بتقوله هو ده اللى بروح انا شخصيا واقوله لشركات الموبايل وانفخهم عليه .. وبالتالي بيحسنوا شبكتهم او عروضهم او اي حاجة تانية

وياما وقفتلهم حاجات بعد ما صرفوا عليها بسبب اراء العملاء بتوعها ..

انا ممكن اشرح كل حاجة ليكو .. بس انا ضد مبدأ انى مقولش رأيي

ملحوظة: انا معرفش الرقم ده بتاع اي شركة وهحاول اشوف .. لكن انا بتكلم على المجال عموما

شكرا ياباشا
وياريت تفاصيل اكتر

**الجنرال** · 23-09-2013 08:54 PM

المشاركة الأصلية كتبت بواسطة mohamed_selim

المشكله انه بيتكلم و مش عارف بيكلم مين و يبدا يسال عن معلومات على الرغم انه فى اول المكالمه بيقول انه بيتصل بناء على تفويض من شركة المحمول .... فى اللحظه دى بقوله خد المعلومات من الشركه و تعالى اسال عن رايى بس مش هديك معلومات !

ده حقيقي .. لان شركة الموبايل لو بعتتلي ارقام الناس وبياناتهم يبقي كده هيا اخلت بشروط العقد اللى بينك وبينها (عدم افصاح معلوماتك لاي جهة) وبالتالي احنا اللى بنجيب المعلومات

احيانا بتدينا داتا بيز وارقام موبايلات ناس عملوا حاجة معينة احنا عايزينها .. مثلا اشترك فى عرض بتاع رمضان .. وهما عايزين يعرفوا ايه رأي الناس اللى اشتركت فى العرض وايه اللى عاجبها وايه اللى مش عاجبها .. ونعرض عليها عرض جديد هينزل من الشركة علشان نشوف ايه رأيها

او مثلا عايزين نكلم ناس مشتركة على باقات انترنت علشان نشوف الشبكة عاملة ايه .. كده يعنى .. لكن لا يمكن ابدا ان الشركة تدينا معلومات العميل .. لان ممكن بكل سهولة (لو شركة ابحاث مش محترمة) تاخد البيانات دي وتبيعها (لان فيها الاسم والعنوان والبطاقة وكذا كذا كذا) او تستغلها استغلال سيئ (ابتزاز .. سرقة .. احتيال)

لكن لو واحد معاه رقم موبايل بس.. خلاص شوف هتعمل ايه برقم الموبايل

علشان كده احنا اه معانا تفويض من شركة الموبايل .. لكن مش معانا اي داتا عن العملاء اللى بنكلمهم

نقطة تانية: وهي ليه في الاخر بنسأل اسئلة شخصية (السكن والدخل والممتلكات والتعليم وغيرها)
لان ثقافات الناس مختلفة .. وكل واحد مستواه الاجتماعي والمادي والتعليمي بياثر على نظرته وتقييمه للامور

فمثلا: واحد دخله على قده او عنده مشاكل مادية وتعليمه شهادة ابتدائي .. اكيد معندهوش مشكلة لما الشبكة تفصل اثناء المكالمة .. على عكس واحد معاه شهادة جامعية وشغال فى شركة .. على عكس واحد تاني رجل اعمال وصاحب شركة

كل واحد نظرته وتقييمه بتفرق .. بس كده

**أحمد كمال** · 23-09-2013 09:20 PM

المشاركة الأصلية كتبت بواسطة mohamed_selim

المشكله انه بيتكلم و مش عارف بيكلم مين و يبدا يسال عن معلومات على الرغم انه فى اول المكالمه بيقول انه بيتصل بناء على تفويض من شركة المحمول .... فى اللحظه دى بقوله خد المعلومات من الشركه و تعالى اسال عن رايى بس مش هديك معلومات !

بالعكس ده معناه ان الشركة ادت له الارقام بس و ما ادتلوش معلومات حفاظا على سرية معلوماتك من التسرب لطرف تالت (شركة الابحاث)

**أحمد كمال** · 24-09-2013 07:39 AM

المشاركة الأصلية كتبت بواسطة mohamed_selim

جميل ... اضمن منين اللى انا بكلمه ده فعلا من احد الشركات دى ولا نصاب ؟ او ان الشركه دى محترمه فمضمون اديهم معلومات ولا ممكن المعلومات دى تستخدم بطريقه مش مظبوطه؟

ما تديلوش اسمك و لا عنوانك و لا اي حاجة يستدل بيها عليك شخصيا

بس ممكن معلومات عامة

زي منطقة السكن, مجال العمل, العمر ....... الخ

**الجنرال** · 24-09-2013 10:17 AM

المشاركة الأصلية كتبت بواسطة mohamed_selim

جميل ... اضمن منين اللى انا بكلمه ده فعلا من احد الشركات دى ولا نصاب ؟ او ان الشركه دى محترمه فمضمون اديهم معلومات ولا ممكن المعلومات دى تستخدم بطريقه مش مظبوطه؟

اعتقد ان الناس قالت على الطرق المعتادة:

1- يا اما تتصل بالشركة بتاعت الموبايل وتسألهم
2- يا اما تبقى حريص فى اجاباتك وخصوصا الاجابات الخاصة (اديهم المعلومات لكن عامة .. مثلا الدخل بتاعك كام .. قوله من 5 الالاف الى 10 الالاف مثلا .. متديهوش رقم معين .. يسألك انت ساكن فين .. قوله فى المهندسين ومتقولش الشارع ولا العمارة .. لما يسألك الاسم قوله الاسم الثنائي محمد احمد مثلا ) كده يعنى
3- انك تعرف منه اسم شركته وعنوانها (بتاعت الابحاث الى شغال فيها) وتعمل سيرش عليها وتدخل على الويب سايت وتشوف
4- في بعض الاحيان ممكن يوقفك فى الشارع ويملى معاك الاستمارة .. في الحالة دي تقدر تشوف هو بيكتب ايه (واحيانا بيطلب من العميل اللى قال الاجابات انك تمضى على الاستمارة وانك موافق على الاجابات بتاعتك)

في الاخر .. الضمانة الوحيدة هو انك متقولهوش على معلومات شخصية قوي