بسأل على شقة إيجار بعين شمس

**Khaled Emam** · 21-09-2013 11:15 PM

السلام عليكم ورحمه الله
اخواتي الاعزاء
انا مقر شركتي بمدينه نصر
وكنت بفكر أتاجر شقة لأسرتي تكون قريبة من مقر شركتي
ولقيت الاسعار ماشاء الله وهمية
أقل شقة ايجار 1500 جنيه وكمان مساكن الظباط والعماير اللي ورا بنزينة وطنية
ورا الشبراوي
وخاصة اني بفكر اشتري شقة عالاحمر واشطبها على مهلي
لكن عشان اشطب وافرش ده هياخد مني وقت
لان الاهل في الصعيد
ومش ناوي انقل فرش لاني مش هسيب الصعيد كليا عشان الاهل

فكان حد اقترح عليا اسكن فعين شمس فالعرب
وبيقولي على متفرع من ش مصطفى حافظ شارع هناك اسمه العلواية
وايجارات بتبدأ من 650 جنيه وحاجات كده
حد يقولي ايه اخبار المنطقه هناك
هعرف اسكن
ولا هلاقي على عربيتي رسومات متحركة يوميا :d
ولو حد عنده اقتراح فمنطقه قريبة بين الاثنين
علما بإن المشوار هيكون يومي من م نصر الى مقر السكن
ومعايا عربية فاعتقد الموضوع هيكون سهل ؟
ولو حد يعرف ارقام سماسرة فالمنطقة يبقا كتر خيره
مستني ارائكم

**تامر.محمد** · 21-09-2013 11:23 PM

الشقة ال86 متر في زهراء مدينة نصر بتعمل حوالي الف جنيه
و ال96 بتعمل الف و شوية
دول مساكن ظباط لو المساحات دي تناسبك

**تامر.محمد** · 22-09-2013 12:44 PM

المشاركة الأصلية كتبت بواسطة khaled emam

انا مسمعتش الاسعار دي خالص ياستاذ تامر
والشقة اللي جابهالي السمسار فاخر دور فعمائر الظباط مأقل من 100 متر كان طالب 1500 جنيه
ومش عارف ليه

انا لسه كنت لافف في مكاتب العقارات قريب من كام شهر و كانت الاسعار اللي باقول لحضرتك عليها دي
ممكن يكون اللي جاب لك جاب لك شقق قريبة اوي من الشارع فعشان كده غالية

ممكن تسأل على شقق في (الالفينات) و دي ارقام العمارات يعني , دي العمارات بتبقى بعيدة عن الشارع شوية , يعني من 5 ل15 دقيقة مشي حسب العمارة على الاقدام و طبعا مش مشكلة خالص لو معاك عربية , لكن مستوى العمارات معقول اوي و الاسعار زي ما باقول لك كده

الحاجة اللي تخنق هناك بس ان الطلعة على الدائري على طول زحمة خصوصا في اوقات الذروة في الدراسة , و الناحية التانية نزلة الحي العاشر بتبقى على طول زحمة بس ارحم شوية من طلعة الدائري