البطارية و كود الكاسيت لوجان اوتو 2012
السلام عليكم يا شباب
عربيتى لوجان 2012 اتوماتيك - عاملة 16 ألف كيلو
النهاردة مشيت بالعربية من فيصل لحد الدقى و ركنتها فى الدقى 3 دقائق بالظبط عشان أدخل أولادى الحضانة.
طلعت من الحضانة العربية حالفة ما تدور - اتصرفت و جبت واحد معاه وصلة للبطارية و وصلناها بعربية تانية و بردوا العربية و لا الهواء.
إتصلت كتييييييير بخدمة العملاء و وصيت ناس كتير تكلمهم لحد ما الحمد لله قدرت أوصلهم بعد ساعة كدة - المهم بعد كام مكالمة كدة خدوا فيها البيانات - مهندس محترم كلمنى و قالى ده عيب بطارية و أنا هاجيلك من "أبو رواش" و صور الرخصة لحد ما أجيلك.
بعد ساعة و نص كدة الحمد لله المهندس جى و جاب معاه بطارية و فى ظرف دقتقتين فك البطارية القديمة و ركب الجديدة و شغل العربية و خد صورة الرخصة و قالى السلام عليكم - سألته فى رسوم و لا حاجة قالى لأ و مشى.
معلش طولت عليكم بس عندى كذا سؤال:
1- هل موضوع البطاريات اللى بتبوظ ده منتشر فى اللوجان؟
2- فى طريقة اكشف فيها على البطارية الجافة و لا لأ عشان ما اتعرضتش للموقف ده على فجأة كدة؟
3- إزاى أتأكد انهم ركبوا بطارية جديدة - عشان صراحة معرفتش هى نوعها ايه بس تفرق عن التانية انها عليها شعار رينو ؟
4- الحاجة الأهم بقى إن الكاسيت إتصفر و مش عارف أشغله و مطلع 4 أرقام كدة غالبا عايز كود و أنا مش عارف أجيبه منين؟؟
أنا أسف على طول السلامة و أرجو المساعدة
