طبعا العنوان شدك وخلاك تقول بينك وبين نفسك "هى العربيات كمان ليها رقم قومى؟؟!!"

طيب نبعد شوية عن العربيات ونرجعلها تانى

كل واحد فينا ليه رقم قومى مكتوب على بطاقة الرقم القومى واستحالة رقمك يتشابه مع رقم حد تانى, ومن خلال الرقم ده بنقدر نعرف تاريخ ميلادك واكيد الارقام اللى قبل تاريخ الميلاد ليها معنى تانى بس انا معرفوش, وكمان من خلال الكشف على الرقم ده بنقدر نعرف اذا كان عليك احكام او لأ (الفيش والتشبيه)

نرجع بقى للعربيات تانى:
العربيات كمان ليها رقم قومى استحالة يتشابه مع عربية تانية والرقم ده نقدر نعرف منه موديل العربية وسنة الصنع ولون العربية والكماليات بتاعتها ورقم الشاسيه واسمه VIN Code و كلمة VIN اختصار لـ Vehicle Identification Number او رقم تعريف المركبة وده بيكون محفور فى شاسيه العربية وممكن تلاقى نسخة تانية منه مكتوبة على استيكر او لوحة معدن مربعة وغالبا بتكون فى حوض العربية او الشنطة او القايم حسب نوع العربية (بالنسبة لعربيات الـVAG فولكس - سيات - سكودا - أودى بيكون مكانه فى دهر البطاحة الشمال تحت التوربيدو وقدام فلتر التكييف) وفى معظم العربيات الحديثة بيكون مكتوب تحت البربريز الامامى وتقدر تشوفه وانت واقف بره العربية


طيب تعالوا نطبق الموضوع ده عملى



ده رقم العربية دى



طيب بالنسبة لللوغاريتمات دى هنفكها ازاى؟؟؟

الشفرة دى مكونة من 17 رقم وحرف
هنقسمهم لـ 3 مجموعات
المجموعة الأولى: هتعرفك بلد الصنع وماركة العربية (وساعتها هتعرف العربية دى متقفلة فين زى مثلا يابانى تقفيل جنوب أفريقى - ألمانى تقفيل مكسيكى)

المجموعة الثانية: هتعرفك موديل العربية والموتور اللى نازلة بيه واذا كانت صالون او هاتش باك او كابروليه والفتيس مانيوال او اوتوماتيك واللون والكماليات

المجموعة الثالثة: سنة الصنع ورقم الشاسيه



فيه ارقام وحروف معناها ثابت عند كل صناع السيارات وفيه حروف وارقام تانية بتختلف دلالتها من صانع لأخر

يعنى بالنسبة لأول حرف أو رقم ده بيدل على بلد المنشأ وده متفق عليه دوليا

A, B, C, D, E, F, G, and H are made in Africa
J, K, L, M, N, P, and R are made Asia
S, T, U, V, W, X, Y, and Z are made in Europe
1, 2, 3, 4, 5 are made in North America
6 and 7 are made in Oceania
8 and 9 are made in South America

الحرف الثانى ده بيدل على نوع العربية وده برده متفق عليه دوليا

A Audi, Jaguar, or Mitsubishi

B BMW or Dodge

C Chrysler

D Mercedes-Benz

F Ford or Subaru

G General Motors, Pontiac or Saturn

H Honda or Acura

J Jeep

N Nissan

R Audi

T Toyota or Lexus

V Volkswagen (VW) or Volvo

S SEAT

1 Chevrolet

4 Buick

6 Cadillac

الحرف أو الرقم العاشر ده بيدل على سنة الصنع وده كمان متفق عليه دوليا

L = 1990
M = 1991
N = 1992
P = 1993
R = 1994
S = 1995
T = 1996
V = 1997
W = 1998
X = 1999
Y = 2000
2001 = 1
2002 = 2
2003 = 3
2004 = 4
2005 = 5
2006 = 6
2007 = 7
2008 = 8
2009 = 9
A = 2010
B = 2011
C = 2012
D = 2013
E = 2014
F = 2015

باقى الحروف والأرقام ليها معانى مختلفة عند كل صانع بتدل على موديل ولون وموتور وكماليات العربية ومحدش يعرف معناها غير اللى صانعها

طيب هو انا لازم أكون شغال فى التوكيل عشان اعرف اترجم الكلام ده واعرف مواصفات العربية؟؟!!

فيه مواقع كتير على النت تقدر تترجملك الكود بتاع عربيتك لأنها عندها قاعدة بيانات بأرقام شاسيهات العربيات, واللى بيميز موقع عن التانى هو ان تكون قاعدة بياناته شاملة عدد كبير من الماركات

لو أخدنا على سبيل المثال رقم العربية اللى فوق هنلاقيه مش بيقبل فى بعض المواقع وبيقبل فى مواقع تانية
وكمان فيه مواقع بتبين جزء من البيانات ولو عايز باقى البيانات يبقى تدفع لها فلوس

الموقع ده جايبلى المعلومات اللى محتاجها زى سنة الصنع والموتور والموديل ومكان التجميع ورقم الشاسيه

VIN Decoder - All vehicles (US and EU)

تقدر تبحث عن موقع يترجملك رقم عربيتك عن طريق انك تكتب فى جوجل مثلا: TOYOTA VIN code لو عربيتك تويوتا

طيب بعد الكلام الكتير ده كله نقدر نستفاد منه ازاى؟؟؟

لو عربيتك جايبها من الزيرو يبقى مش هتستفاد منه غير انك عرفت الارقام دى معناها ايه

لو عربيتك مستعملة يبقى هتقدر تطابق البيانات دى باللى مكتوبة فى الرخصة ولو جبت التقرير كامل يبقى هتقدر تعرف لونها الأصلى والكماليات اللى نازلة بيها

لو انت عملت زيى وروحت اشتريت نص عربية عشان تفضيه فى عربيتك يبقى ساعتها هتقدر تعرف النص ده موديل سنة كام والموتور بتاعه والكماليات اللى نازلة فيه

أشوفكم على خير