الموضوع: تقرير تصليح كراسي الابيزا الامامية بالصور

بسم الله الرحمن الرحيم

السلام عليكم ورحمة الله وبركاته
أخواني الأعزاء في قسم سيات نايل موتورز
اسعد الله ايامكم بكل الخير

كلنا اشتكينا من هزة ورجة واصوات في ظهر الكراسي الامامية للابيزا والبولو والجولف كمان
النهاردة انا عرفت السبب والحل
تعالوا للموضوع من اوله
في البداية انا اشتكيت زيي زي غيري من ملاك الابيزا من هزة ظهر الكرسي بس كنت مكبر دماغي لان في عندي مشكلات اكبر من كدة تستحق التفكير فيها
لكن من حوالي شهر بنتي ربنا يخليهالي كعادتها بتحب تقف في النص بين الكرسيين وتتشعبط فيهم حسيت ان الكرسي بتاعي بيطق وبيريح لورا
جيت بلف البكرة عشان اعدل الظهر لقيت البكرة فوتت وبتلف علي الفاضي
اهلا هي بقت كدة؟

كبرت دماغي لما لقيت الكرسي ثابت في مكانه ومش بيرجع لورا
بس طبعا في دماغي ان الترس اللي ورا البكرة مفوت وماسك في نفسه في اي حاجة

النهاردة الظهر كنت راجع بظهري داخل شارع فوته
واتفاجأ بتاكسي فيرنا لازق في الباب بتاعي
انا طبعا مش شايفه في المراية اليمين ولا مراية الصالون
هووووووب فرامل جامدة جدا
وبسببها لقيت الكرسي عمل شقلباظ لورا

كدة مافيهاش تكبير دماغ ولازم اروح اعمله

روحت للسروجي بتاعي مالقيتوش (والحمدلله اني مالقيتوش لأني للأسف عارف امكانياته)
اتصلت باخويا وسألته علي سروجي وملاني رقمه ووصفلي عنوانه
روحت علي الوصفه وبسأل مالقتش اي حاجة من اللي اخويا قاله
بتصل - التليفون مقفول - وبردو الحمدلله اني ماعرفتش اوصله

سألت ولاد الحلال ودلوني علي سروجي تاني خالص غير معرفة اخويا

دخلت عليه وريته الكرسي
مسك البكرة وشدها - طلعت فأيده
حطها علي السقف وراح جاب العدة عشان يفك الكرسي
فك الكرسي وخده علي الورشة وانا كنت ببص علي البكرة
واكتشفت انها مجرد كافر وراكبه علي طنبورة بتمسك في الترس بتاع الكرسي بمسمار
وببص فجأة لقيت المنظر دة



ايه يا عم عادل اللي عمل كدة في الكرسي؟؟

المفاجأة


اصله هو نفس كرسي الابيزا الكوبيه وليه شداد عشان ينيمه
فوراً ترجمت الحوار
يبقي سبب الهزة - ان الشداد مرخي او ان المساكة بتاعة الشداد فيها مشكلة
وفعلا طلع الاتي



اللسان دة هو اللي بيمسك الكرسي عشان مايتكفيش علي وشه وهو نفسه لو فتحته بتميل الكرسي عشان تعدي لورا في العربيات الكوبيه
طبعا له واحد قصاده الناحية التانية والاتنين بيتربطوا ببعض علي شداد في جنب الكرسي كتجهيزات اضافية للكوبيه



شايف البكرة اللي انا مشاور عليها دي بالسهم؟
دي مربوطة بمسمار لو فكيت المسمار تتخلع البكرة
ممكن تغيرها او تلف حواليها اي حاجة بحيث تعمل تخشينة وتمنع الهزة بتاعة ظهر الكرسي

عملي الناحية الثانية
وفكينا الكرسي اليمين وعمل الجنبين بنفس الطريقة

طب امال ليه الكرسي قلب لورا ؟؟؟
اتاري الدراع اللي بيرفع الكرسي وينزله الترس بتاعه اتاكل وللاسف الشديد الترس دة مش بيتغير
دق عليه بالشاكوش عشان يعشقه في الترس المقابل ليه وفعلا الكرسي اتحكم وبقي مش بيقلب لورا


دة الجزء الأول والي كان يحمل مفاجأة ظريفة وحل لأحد المشاكل المزعجة لملاك الابيزا

حابب تكمل معايا التقرير ؟؟
كمل قراية

قولتله بالمرة علي ظهر الكنبة اللي مش بيفتح بسبب قطع الشداد بتاع اللسان اللي بيمسك ظهر الكنبة
قالي بسيطة

كان الحل انه يجيب السيخ بتاع السنتر ويمسكه في اللسان ويعمله سقاطة باب
والصور كفيلة بالشرح







بصراحة شغله عجبني وتفكيره عجبني

كمان خليته ركبلي فرش الشنطة (الموكيت والفيبر) لأني من ساعة الحادثة وكانوا مخلوعين ومرمين في شنطة العربية

اتمني التقرير يعجبكوا
وانتظروني بمشكلة جديدة وتقرير جديد


تحياتي للجميع
والله المستعان
،
،

يمكنكم متابعة اهم الموضوعات من خلال صفحة القسم علي الفيس بوك
http://www.facebook.com/SeatNileMotors