تقرير: تغيير الكاوتشات لBridgestone Sporty Style MY02

**mahmoud_afifi** · 25-09-2013 04:47 PM

السلام عليكم ورحمة الله

بعد بحث عن انواع كتير و عمل مقارنات ومشاهدة تقارير على المنتدى قررت اني اجرب الMY02. واكتشفت ان في اتنين MY02.
Sport Tourer MY02 و Sporty Style MY02. والحقيقه مش عارف الفرق بينهم لأني كنت هركب النوع الاول وماكنتش اعرف حاجه عن النوع التاني الي ركب. قولت مش مشكله يمكن الاسم اتغير بس. ياريت الي يعرف الفرق يقولنا.
و عاوز اعمل مقارنة بسيطه عن انواع الكاوتشات الي جربتها.
اول كاوتش هو الKumho Solus مقاس 185/65/15 الي نازل مع العربيه. تقريبا مالهوش أي مميزات خاصة في عربيه مافهاش ABS.
تاني كاوتش هو الKelly HP مقاس 185/65/15. هو صناعه بولندي بس محترم جدا وكان Traction A و Temp A.
المميزات:
-ثبات ممتاز
- صوت منخفض جدا مقارنة بالكومهو
- اداء فرامل ممتاز
- Structure قوي وده ظهر لما الكاوتش وقع في بلاعه ماحصلش حاجه انما الكومهو لما وقع في بلاعه تانيه عمل بلونه مع ان مقاس الجنط 15.
- عمر افتراضي طويل. قعد 60 الف كيلو وكان لسه فيه زياده بس الفرد نشفت قوي وبقت تعمل صوت على الطريق.
العيوب :
- كان فرده H واقصى سرعه ليها 210 (الكلام ده لهواة السرعات العاليه).

ثالثاً بقى البريدجستون Sprty Style MY02 بمقاس 195/65/15 وده المقاس الي بينزل للعربيه بره مصر وموصى بيه في باب السائق. الفرد صناعه تايلاندي Traction B و Temp A وبصراحه فاتني جدا اني اخد بالي من موضوع التراكشن وده فارق جدا في الغرز. بحس العربيه هتعوم مني مقارنة بالفرده الكيلي الي كانت اكثر ثبات عشان ناشفه انما البريدج طريه. هي كويسه لحد سواقته هاديه ومش بتاع جري.
بالمناسبه الفرد سرعه V (لحد سرعة 240) و وزن 91 (تقريبا 600 كيلوجرام مش متذكر بالظبط).

التجربه

- انا جربت الفرد الجديده تقريبا على كل السرعات لحد 160. هي كويسه ومابتعملش صوت بس موضوع الاحساس بالثبات بقى قليل رغم المقاس الجديد. بس يمكن عشان العربيه بقت اعلى حاجه بسيطه بالمقاس الجديد مش عارف !
- جربت الفرامل على الرمل وماشاء الله مابتزحفش بس ماعملتش complete lock للفرامل على الرمل عشان احكم.
- لسه ماجربتش الفرامل على أرض wet بس في الشتا هقدر احكم
- جربت الفرامل عشان اوقف العربيه من سرعة 150-160 لل0 على المحور لما الطريق وقف فجأه. ماشاء الله أداء الabs بس زحفت حاجه بسيطه في النص لما الفرامل عملت complete lock فريحت رجلي عن الفرامل حاجه بسيطه والحمدلله العربيه وقفت في مسافه انا شايف انها صغيره.

التكلفه:

الفرده سعرها تقريبا 560 بدون ضريبه :(((( بالاضافه لسعر البلوف والترصيص. والتركيب كان في Fit & Fix فرع عمارات العبور. وللأسف ماخدتش خصم لأني مش معايا استيكر المنتدى 

في النهايه اتمنى التقرير الناس تستفيد بيه خاصة الي فاكره ان كل كاوتشات البريدجستون ناشفه وغير مريحه. واي اسئله انا تحت امركم
وياريت تدعولي ربنا يباركلي في الكاوتشات ويكفيني شر الطريق والمسامير 
تحياتي

**Kareem.ElAraby** · 25-09-2013 05:06 PM

انت تاني هنا كمان
مبروك عليك يا باشا الجزم الجديده للالنترا
ربنا يكفيك شر المسامير و الاخرام
و مبروك عليك انت كمان

**mahmoud_afifi** · 25-09-2013 05:06 PM

المشاركة الأصلية كتبت بواسطة Eng.Mina

الف مبروك علي الكاوتش الجديد انا ان شاء الله علي اول السنة ناوي اجيب turanza gr90 وحاليا معايا my01 وكويسة مفيش مشاكل منها . اختيار موفق والغالي تمنه فيه ومبروك مرة تانية :)

الله يبارك فيك يا مينا باشا :)
الTuranza Gr90 حلوه جدا ماشاء الله بس غاليه شوية . وفعلا معاك حق الغالي تمنه فيه
نورت الموضوع

**mahmoud_afifi** · 25-09-2013 05:07 PM

المشاركة الأصلية كتبت بواسطة Kareem.ElAraby

انت تاني هنا كمان
مبروك عليك يا باشا الجزم الجديده للالنترا
ربنا يكفيك شر المسامير و الاخرام
و مبروك عليك انت كمان

ههههههههههه مش عارف ليه انت دايما بشوفك في كل حته حتى قبل ما اعرفك في جينز كار برضه في وشي

الله يبارك فيك يا كيمو وعقبالك ان شاء الله

**khaabas** · 25-09-2013 05:16 PM

بس انتا ظلمت الكومهو سولو انا لسه رامى النكسين المقرفين اللى نازلين فى العربية مع انهم لسه مكملوش 25.000 وجبتهم وغيرت المقاس من 70/175/14 لـ 65 /185 وكان سعر الفردة 380 جند بس دى الفيتنامى موش الكورى ومتفرقش اصلا فى حاجة عن بعض وولاسف علشان المقاس دة مينفعش كنت هجيب بمشيئة الله الكومهو اكستا
اللى عاوز اقوله ان الكومهو موش وحشه اقوى كده شغالة يعنى

ومن راى اليكوهاما احسن من البريدج :)

والف مبروك يا برنس :)

**mahmoud_afifi** · 25-09-2013 05:27 PM

المشاركة الأصلية كتبت بواسطة S O P H O S

الف مبروك يا باشا ..

الله يبارك فيك يا كبير

المشاركة الأصلية كتبت بواسطة khaabas

بس انتا ظلمت الكومهو سولو انا لسه رامى النكسين المقرفين اللى نازلين فى العربية مع انهم لسه مكملوش 25.000 وجبتهم وغيرت المقاس من 70/175/14 لـ 65 /185 وكان سعر الفردة 380 جند بس دى الفيتنامى موش الكورى ومتفرقش اصلا فى حاجة عن بعض وولاسف علشان المقاس دة مينفعش كنت هجيب بمشيئة الله الكومهو اكستا
اللى عاوز اقوله ان الكومهو موش وحشه اقوى كده شغالة يعنى

ومن راى اليكوهاما احسن من البريدج :)

والف مبروك يا برنس :)

الي عمل الكومهو السولس هو الي ظلمها :D
بقى دي فرده يا راجل ؟ جرب حط نوع محترم وانت هتاخد فرامل كويسه من العربيه دي. الاكستا حلوه برضه بس قولت مش عاوز أجرب لسه.

اليوكوهاما مش أحسن من البريدجستون. يمكن احسن من بعض الاصدارات في بريدج انما بريدجستون عندها مثلا الPotenza Adrenalin مالهاش زي. كنت عاوز اجيبها بس الراجل قالي اقل مقاس بينزلها 16 :((

والله يبارك فيك يا كبير :)

**khaabas** · 25-09-2013 05:46 PM

طيب ايه رايك يا كبير وقبل ما ركب كنت بشوف كل كاوتشات العربيات اللى ركنت تحت البيت ههههههه اللى شجعنى بقى لقيت بى ام اخر فيرجن :) مركبها اه والله بس مقاس اكبر طبعا
فالصراحة انا كعاطف انبسطت هع هع هع