الموضوع: عايز اشتري حاجة في حدود 250 الف ومحتار بين حاجات معينة التفاصيل بالداخل واتمنى حضوركم

السلام عليكم لو تكرمتم انا عايز اشتري عربية في حدود 250 الف تلبي رغبة شاب يعني انا بدور على عربية فيها اداء وهاندلينج وموضوع التجهيزات الكتيرة ميهمنيش واسعار قطع الغيار متهمنيش بس المهم تكون قطع الغيار متوفرة كل اللي يهمني عربية ليها هاندلينج ومتعة واتمنى تكون بتستخدم بنزين 92 ويكون استهلاكها كويس او في المتوسط عشان انا حستخدم العربية يومياً كتير وفكرت اكتر من مرة اني اجيب مستعمل بي ام دبليو 525 تكون موديل 2008 كدا او 2009 لو قدرت علشان بس اضمن الهاندلينج او مثلا اجيب حاجة من الفئة التالتة تكون موديل 2010 او 2011 على سبيل المثال بس في ناس حظرتني من المستعمل مع انها ملهاش تجارب مع المستعمل بس حظرتني منه وخلاص ومش عارف اعمل ايه مع ان ال 525 حاسس انها معلقة في دماغي شويتين وشغلة تفكيري بس انا قلت اخد فكرة من حضراتكم وان شاء الله استفاد منكم يعني الاولى اجيب زيرو وتلبي رغباتي ولا الميزانية دي عايزة تذيد شوية عشان الاقي اللي انا محتاجه ؟ مستني سيادتكم وفي حفظ الله

حرام تجيب حاجة مستعملة بالمبلغ ده ممكن تزود شوية وتجيب bmw 116 وممكن تجيب ميرسيدس a200 الجديدة والميني كوبر وفي الاودي وممكن الفولفو والدودج دارت والبيجو rcz لكني لا افضل الاودي والدودج والبيجو لانها مالهاش سوق عندنا وممكن الرانجلير هتنفعك في الاوف روود والسفاري وده عربيات شبابي انما بالنسبة للباسات والاسترا والجولف والجيتا والبيجو والاسبورتاج فده عربيات اقتصادية وعائلية ومقدرش اعمل بيها ريس او دريفت او دونتس او بيرن اوت بمعني احنا مبنتكلمش في اول عربية للراجل احنا بنتكلم في العربية التانية او التالتة بتاعت الكروز والسفر والشد ولو عايز شغل نظيف وليك حد في الخليج خليه يخلصلك عربية حوار ونزلها تريبتك وربنا يوفقك