الموضوع: ازاى انظف تانك البنزين؟

أنا عملتها مرة فكيت الكنبة الخلفية,,
وخلعت الغطاء اللي فوق طلمبة البنزين, وفكيتها وشلتها برة العربية براحة عشان مبوظش العوامة وقرايتها بعد كدا,

جبت جركن كبير نضيف, وجبت أزازة فاضية نضيفة وناشفة وقسمتها نصين,
وحطيت نص في الجركن من فوق أكنه قمع, والنص التاني بقيت أعبي بيه من التانك وأكب في الجركن,

وطبعاً كنت جايب جركن أحتياطي بس انا كنت مخلي العربي فيها ربع تانك بس عشان متهلكنيش في العملية دي,

وفضلت أفضي لحد ما أيديا وصلت لقعر التانك ومبقتش خلاص بطلع بنزين كتير في نص الازازة التحتاني اللي بعبي بيه من التانك,,

وجبت فانلة قطن قديمة عني,, أوعي تستخدم الفوطة الحمراء بتاعت العربيات ولا أي فوطة مشعرة عشان أرضية التانك خشنة ممكن تسيب فيه وبرة ورواسب ودي هتسد لك فلتر البنزين,

الفنلة اللي بنلبسها تحت الهدوم أو أي حاجة زيها التنضيف بيها ميسبش رواسب ولو اتقطعت برضه مش هتعمل وبرة,

ومديت أيدي كلها جوا التانك ولفيتها يمين وشمال من فتحة الطلمبة ونضفتة كويس جداً, ومكنش وسخ أوي,,
ورجعت كبيت البنزين فيه براحة من الجركن,, وركبت الطلمبة براحة ووصلتها وقفلت فوقيها الغطاء والكنبة,

وبس كدا,,
كنت مصور صور لما عملتها هشوفها فين وأحطهالك هنا.

المشاركة الأصلية كتبت بواسطة hemtey

الف شكر يا غالى بس كنت عايز اعرف مفيش اى مواد بتتحط فى التانك تنضفة اصل انا خايف وانا بفك الغطاء يحصل حاجة لطلمبة البنزين او العوامة او معرفش ارجعهم تانى زى ما كانو

أولاُ الغطاء اللي قبل طلمبة البنزين دا متخافش منه لأنه بعيد عنها ومش هيأذيها,,
ثانيا لما تيجي تفك الطلمبة يبقي بحذر وأنت بتطلعها من قلب التانك عشان متخبطتش أو متأذيش العوامة وتديك بعد كدا قرايات بنزين غلط,
لو مش هتعرف تعملها وخايف بلاش تعملها,, لو عايز تجرب جرب بس خد بالك,

أخر حاجة ميفضلش أنك تحط أي مادة جوا التانك, لأن التانك أصلاً أرضيته خشنة
ومعاج ضدأ الصدأ وضد التأكل وضد الحريق وحاجات كتير كنت قريت عنها بس دول اللي فاكرهم,
فمنصحكش تحط حاجة فيه وممكن تروح في جنب ومتعرفش تنضفها أو تنشفها وتتخلط بالبنزين أو يكون فيها ضرر علي جسمة الداخلي نفسه,

التانك يكفي أنك تنضفة بس بقماشة متيسيبش رواسب ولا تفتل زي الحاجات اللي بتعمل وبرة,
وانا لما فكيته كنت زيك مفكر أني هلاقيه فيه رواسب كتير ووساخة من البنزينات الحلوة اللي في بلدنا, بس مكنش فيه أي حاجة لان البنزين مهما كان وحش بيتحرق,, والشوائب الفلتر بيمكسها,,

أما لو فيه شوائب كبيرة شوية أو ورقة أو حاجة غريبة هيكون سهل عليك تطلعها في عملية التنضيف دي, وتمسح بس كويس بفانلة أو بحاجة متسيبش وبرة وهيبقي زي الجديد.