معروض عليا فلوانس هاى لاين فئة تانية

**ALARB** · 29-09-2013 06:27 AM

السلام عليكم اعضاء المنتدى الكرام
معروض امامى رينو فلوانس هاى لاين فئة تانية عاملة 53 الف كيلو
حالتها نقول جيد جدا
تمنها 115 ممكن نخلصها على 110 الصراحة انا الى معايا 100000 بس ممكن نتصرف فى الباقى ياريت رايكو اتكل على الله ولا بلاش مستعمل اصل واحد دخل فى موضوع انا كنت عاملو قالى بلاش مستعمل و خليك فى الجديد وطالما معاك 100000 هاتها بنظام الوديعة
والصراحة انا مش فاهم نظام الوديعة ده عشان كده دورت فى المستعمل اية رايكو ياشباب اعمل فى الحيرة دى

**nodey** · 29-09-2013 09:01 AM

طالما ربنا مقدرك ومعاك مبلغ محترم ليه متشتريش حاجو زيرو وتحس بحلاوتها معلش الموضوع عامل زي للي بتزوج بكرا واو يتزوج ثيب اعذوزني علي التشيبه \
بس فعلا الحاجة الجديدة ليها طعم تاني بلاش مستعمل بالمبلغ ده
ربنا يوفقك

**Hany Saad** · 29-09-2013 09:36 AM

معلش أنا بس حابب أضيف شىء للموضوع.....مش القصة هتجيب أستعمال و لا زيرو..... القصة هتقدر على مصاريف صيانة العربية و لا لأ.....زى ما بيسموها بره الrunnning cost أو مصاريف التشغيل.....الفلوانس عربية رائعة طبعا و لكن و مثل كثير من السيارات فى فئتها و خصوصا الأوروبية تعتبر صيانتها مكلفة.....يعنى عند حضرتك صيانات دورية كل ١٠٠٠٠ كم بحوالى ٨٠٠ جم فى المتوسط للصيانة الواحده و صيانة ال ٦٠٠٠٠ كم بحوالى ٢٥٠٠ جنيه أو أكثر ....تيل فرامل أمامى فى حدود ٥٥٠ جم و بالتركيب يعمل ٧٥٠جم و تيل خلفى بالتركيب يعمل ٩٥٠ جم ....طبعا دى أسعار تقريبيه و لكن وجب التوضيح قبل الشراء علشان تبقى الأمور واضحه....واحد زميلى كان معاه نيسان صنى و بعها و جاب سكودا أوكتافيا أستعمال و رغم أنه حس بفرق شاسع و رغم أن العربيه ريحته جداً إلا أنه مقدرش على مصاريفها و بعها.....
أنا بس بوضح لحضرتك الأمور قبل أتخاذ القرار و ربنا يوفقك فى إختيارك

**Eng_hatemfathy** · 29-09-2013 10:22 AM

تيل امامى ب 600 جنيه وصيانة ال60 الف ب3500 جنيه تقريبا والعربيه دى فيرانى وفى الرحاب على ما اعتقد والاستهلاك ده كتير على المبلغ ده-انت كده معاك عربية شغالة 4 سنين استهلاك عادى (14 الاف فى السنة زى حالاتى)
العربية لازم يتكشف عليها فى التوكيل قبل متقرا فاتحة
والفلونس اللى معروض على كونتاكت كله فى اشكاليات بس دى بصراحة مرحتش لان صاحبها قفل التليفون فى الوقت اللى قلتله انى جايله فيه وفضل قافله طول الليل وتانى يوم كمان
استخير واتأنى وربنا يوفقك

**mohamed_rhem** · 29-09-2013 10:49 AM

لسه شاري واحدة لواحد صاحبي برضه نفس الحاله

اكشف عليها في التوكيل الكشف بحجز مسبق بيتكلف 500 جنيه

**Eng_hatemfathy** · 30-09-2013 09:00 AM

المشاركة الأصلية كتبت بواسطة alarb

والله ياجماعة الحيرة كده زادت اكتر الصراحة انا مبقتش عارف اعمل اية المشكلة انا عايز حاجة عائلية ل 5 افراد لو فكرت اجيب حاجة زيرو فى حدود 100000 هتبقا مشكلة زى اللوجان مثلا هتبقا ضيقة من وراه وحتى الاوبترا الى كنت بفكر فيها بقت ب 117000 وده الى بيخلينى افكر اجيب حاجة افخم بدل الاوبتراطالما هاحط مبلغ زى ده \ ده اذا عرفت اجيب المبلغ ده لانى الى معايا 100000 وممكن بالعافية يوصل ل 110000 والله مش عارف احترت المشكلة ان فى واحد طلع فكرة نظام الوديعة وبيقولى هاتدفع تقسيط بس حاجة بسيطة حاولت افهم نظام الوديعة ده اتلغبط وبقيت فى حيرة اكتر والله الواحد مش عارف يعمل اية

بص حضرتك فى معرض فى شارع النصر فى المعادى بيقسط اسلامى ومن غير بنوك
فحضرتك ممكن تدفع ال 110 مقدم وتجيب حاجه فى رنج ال 150 او 160 والباقى على 3 او 5 سنين
وكده قدامك فرصة عربية جديدة وكبيرة والعربيات قدامك هتبقى نيسان شكل جديد او شكل قديم (بينزل منها لحد دلوقتى) واوبترا وكروز وسيراتو وفلونس اول فئة وممكن توصل ل 169 كرولا خليجى 2013 يابانى تانى فئة-المعرض ده دايهاتسو بس بيجيب اى عربية انت تختارها
وربنا يوفقك