فلوانس فيس ليفت زيرو ولا bmw318/2010 زبنفس السعر!!

**fdroubi** · 29-09-2013 10:47 AM

أحبائي، نويت أشتري عربية جديدة، وبعد المقارنات بين العربيات والتكلفة وإحتياجاتي والصيانة والتكلفة الدورية والتراخيص وصلت لقرار ان BMW318/2010 او C180Komp/2007.

بعد سؤال الزملاء نصحوني ب BMW علشان أحدث وأرخص (مع الأخذ بالإعتبار ان C180 تكسب في المواتير) وده بالنسبة لي مش مهم قوي BMW مواتيرها مش وحشة

السؤال الثاني بقى والأخير، يطلع عيني واتعب وادور شهرين او تلاتة لغاية لما الاقي حتة BMW بيتي ومحترمة؟؟؟ ولا أقصر وأخش على ال فلوانس الجديدة facelife with new Nissan CVT gearbox and AC??? واشتري دماغي

وطبعا الله اعلم في الحالتين سعر اعادة البيع بعد 5 سنين حتكون بكام سواء لل فلوانس او BMW

يا ريت نصيحة

**AhmedNaeem** · 29-09-2013 11:51 AM

متابع

**Silent~Dream** · 29-09-2013 12:57 PM

اداء وركوبه و ثبات و فرامل بى ام بس حاله نضيفه جامد و كشف فى التوكيل و كده ولو عايز اوبشنز و جوا المدينه و سفر قليل يبقى الفلوانس

**Hany Saad** · 29-09-2013 01:31 PM

المشاركة الأصلية كتبت بواسطة fdroubi

أحبائي، نويت أشتري عربية جديدة، وبعد المقارنات بين العربيات والتكلفة وإحتياجاتي والصيانة والتكلفة الدورية والتراخيص وصلت لقرار ان BMW318/2010 او C180Komp/2007.

بعد سؤال الزملاء نصحوني ب BMW علشان أحدث وأرخص (مع الأخذ بالإعتبار ان C180 تكسب في المواتير) وده بالنسبة لي مش مهم قوي BMW مواتيرها مش وحشة

السؤال الثاني بقى والأخير، يطلع عيني واتعب وادور شهرين او تلاتة لغاية لما الاقي حتة BMW بيتي ومحترمة؟؟؟ ولا أقصر وأخش على ال فلوانس الجديدة facelife with new Nissan CVT gearbox and AC??? واشتري دماغي

وطبعا الله اعلم في الحالتين سعر اعادة البيع بعد 5 سنين حتكون بكام سواء لل فلوانس او BMW

يا ريت نصيحة

فرق كبير فى الركوبة بين الأتنين....البيمر أوطى، أثبت، موتور أقوى بكتير و تجميع مختلف ، هتكيفك لو أنت من هواه القيادة الرياضية، جر خلفى و ده متعه تانيه و لكن ......معندكش ضمان، صيانة و قطع غيار مكلفة جداً جداً و كماليات أقل من الفلوانس لو هتجيب الفلوانس الهاى لاين

الفلوانس ركوبه هادية، نعومة فى المطبات على عكس البيمر، ثابته على السرعات العاليه و لكنها لا تقارن بثبات البيمر، وضعية قيادة أفضل من البيمر أنا شخصيا مش بحب الوضعية المنخفضة لأنى قصير حوالي ١٧٣ سم، ضمان ٣ سنين أو ١٠٠ألف كم فهتكون مستريح من المصروفات لمدة ٣ سنين، الفلوانس أوسع كمساحة خلفية و شنطة....تعتبر الفلوانس مناسبة لأسرة حديثة أو كexecutive car لرجال أعمال فى سن متوسط

طبعا كإحساس سواقة و شد الفلوانس مش معاك خالص فى المنطقة دى لأن الفتيس الCVT مش بيدى أى إحساس بالنقلات و كأنك سايق عربية كهربا....تتفوق البيمر و بإكتساح فى هذه النقطة

**mahmoud_afifi** · 29-09-2013 02:32 PM

انا شايف المرسيدس برستيج اعلى وموتور اقوى من الbmw
شكل داخلي احلى من الbmw ودي اذواق
العيب بقى انها موديل اقدم شوية بس صدقني في المرسيدس مابيبانش الموضوع ده خالص. لغاية دلوقتي في موديلات قديمه في المرسيدس ولسه بتشد الواحد
وممكن بإضافات بسيطه زي تغيير الشبك الامامي والجنوط للمرسيدس يبقى شكلها رياضي ورائع

.... انا طلعت الفلوانس من المقارنه لأن المرسيدس والبي إم category اعلى

**Hany Saad** · 29-09-2013 02:34 PM

المشاركة الأصلية كتبت بواسطة fdroubi

والله كلامك موزون خصوصا اني انا من الناس بتوع التوكيل يعني البي ام نفخ وكمان السفر بيكون مرة في السنة، بس بعد 5 سنين يا ترى الإعتمادية وسعر البيع حيكون في صالح مين؟

لو حضرتك هتعمل صيانة فى التوكيل، الفلوانس هتبقى بحالة الزيرو، و أكيد البيمر كمان، إعتمادية متقاربة فى الأتنين يعنى بتركب القطعة و تنساها طالما قطع غيار أصلية، سعر البيع مش فى صالح حد، الأتنين بيقعوا جامد فى البيع و إن كان الفلوانس مسكه سعر مش بطال دلوقتى بمقارنة بأختها الميجان ii و ذلك لإنتشارها و قلة أعطالها و الناس فى مصر أبتدت تفهم ثقافة الحساسات و صيانة التوكيل لأن الميجان كانت من أوائل السيارات تقدما فى هذا المجال مقارنة بمثيلاتها وقت نزولها....
المرسيدس و الأوكتافيا فى الأوروبي هما اللى مسكين سعر و طبعا الكورى و الياباني زى هيونداى و كيا و تويوتا، غير كده كله يتساوى....أركب و أنبسط و بعد الخمس سنين ربك يعدلها، محدش ضامن بكره

**mahmoud_afifi** · 29-09-2013 04:57 PM

المشاركة الأصلية كتبت بواسطة fdroubi

الفكرة مش موضوع فئة أعلى من التانية وده طبعا مفهوم ضمنيا. الفكرة ان الثلاتة بيقعوا في فئة سعرية واحدة. والمشكلة هي الزيرو مقابل المستعمل (ده لو لقيته نظيف). وطبعا ال Image مطلوبة...

بناءا على تعليقي، ايهما افضل اختيار؟

وجهة نظر حضرتك وصلت . بس انا بقارن من حيث العربيات والامكانيات مش الفئه السعريه وإلا كنت دخلت عربيات تانيه معاهم في المقارنه بنفس السعر.

وكده حضرتك الي تقرر الي يناسبك سواء جديد او مستعمل لأن دي بتختلف من شخص لأخر.
انا مثلا مش بثق في المستعمل غير في عربيتين. المرسيدس والبي إم لأن اصحاب العربيات دي بيهتموا بيها وغالباً معظم الوقت في جراج بالتالي البويه الخارجيه مش متبهدله.

تاني نقطه انك ممكن تودي العربيه لcar care محترم يرجع العربيه زيرو بالاضافه لإنهم بيعقموا العربيه من جوه (اصلي موسوس شوية في موضوع التعقيم والنضافه)

على فكره انا مش بعيب في الفلوانس حاجه بالعكس دي جميله جدا بس شايف ان السعر ده كتير عليها في حين انك ممكن تعلى في الفئه وتجيب حاجه احسن و prestigious اكتر.
وطبعا دي اراء والاختلاف في الرأي لا يفسد للود قضيه :) وربنا يكرمك للإختيار الافضل