حجزت الحمد لله النهاردة كورولا 2014 الفئه الثانية و الاستلام بعد شهرين ان شاء الله :)

انا كرولاوي اديم من موديل 94 و 2007 و 2008 الجنوب افريقي و كل عربية فيهم كان ليها مزايا و عيوب و اخرهم كانت 2008 الجنوب افريقي و مشكلة الفتيس الشهيرة و سعر البيع اللي بقي ضعيف جداً مع انها كانت اقوي و احسن موديل في التلت موديلات بس السوق هنا لية معادلات تانية خالص ذي مثلاً بلد التقفيل و موصفات خليجي ولا لا...

المهم دلوقتي مع اني حجزت بس لسة متردد لان بصراحة في ايجابيات و سلبيات

الايجابيات
1- الموديل الجديد شكلة حلو جداً
2- العربية حجمها و مسحتها كبيرة جداً
3- الكمليات كويسة مع اني كان معيا 2008 هاي لاين و كان فيها كل اوبشنز الهاي لاين في 2014 ما عدا الكاميرا الخلفية و الفرش الجلد قماش و الكاسيت التاتش و الاوتوبارك و البارك سنسورز
4- السعر بالنسبة للسوق دلوقتي كويس جداً بالنسبة لعربية مكونات و تكنولوجيا ياباني
5- التوكيل محترم جدا (فرع العباسية فقط) ودة عن خبرة 6 سنوات متتالية ابو رواش مش كويس و فية مشاكل و بالمقارنة بمشاكل التوكيلات التانية
6- ان شاء الله سعر اعادة البيع من احسن العربيات اللي موجودة (لو اسبتت نفسها زي المودلات الياباني)
7- توفير البنزين و التويوتا عموماً مشهورة في الموضوع دة
8- قطع الغيار اسعرها معقولة (قطع الغيار اللي بتستهلك زي تيل الفرامل و الفلاتر)

السلبيات
1- العربية تقفيل تركي هيخلي الناس تخاف تكرر نفس تجربة الجنوب افريقي و انا اولهم و خصوصا اني بعتها بسعر عربية نوبيرا او افيو مع احترامي للعربيتين بس يلا الحمد لله
2- لسة منزيلش الخليجي ملسه محديش عرف هتنزل الشكل الاوروبي ولا الامريكي و هتبقي تركي ولا ياباني ولا تايلاندي ودي من النقط المهمة في سعر اعادة البيع (موصفات خليجي ولا لا)
3- الخلوص بتعها قليل شوية 12.5 سم و اقل من الموديل السابق ب 3 سم مع ان دة ارتفاع اقل منطقة و هي علبة الشكمان مش منتصف العربية اللي ممكن يخبط في المطبات بس ديماً اللي بيجي يشتري لازم يشوف العيوب و المشاكل و يفضل ماسك فيها مع ان في عربيات محترمة زي المرسيدس السي مثلا ارتفاعها 10 سم بس عشان الثبات بس نعمل اية المصريين كدة موصفات خاصة:)
4- عدم استقرار سعر الدولار مع قرب السنة الجديدة واحتمال نزول الجمارك 4% حسب الاتفاقية الاوروبية ممكن ينزل السعر شوية ودة طبعاً مش مضمون!!!
5- قطع الغيار الجنوب افريقي كانت مش متوفرة دايما عند الموزعين بس موجودة في التوكيل وطبعاً لازم ندفع طبعاً 10% ضريبة مبيعات وخايف يحصل كدة في التركي
6- الفتيس الجديد CVT محدش جربة كتير بس عموماً التقيم المبدئي للي ركبها بيشكر فيه و في سحبه وده اهم شيئ لان ال CVT من مساوئه السحب خصوصا في الطلعه الاولي بس بعد كدة هو كويس جداً ويعتبر من احسن الفتيسات اللي تناسب السواقه عندنا في الزحمة و موفر جداً في البنزين اكتر من المانيول
7- الموتور اللي نازل dual VVTI مش Valvematic زي ما نازلة في تركيا مثلا في الكورولا مع العلم ان الموتور ال Valvematic 131 حصان مش 122 زي ال Dual VVTi بس برضة هو كويس مش وحش بس انا خايف يغيروة السنة اللي جاية او اللي بعديها خصوصاً انه نازل في الأوريس و الأفينسيس من فطره يعني اكيد موصفاتة تنفع في مصر و بياخد 92 برضة

اخيراً يا ريت كل واحد يقول وجهة نظرة في الموضوع و في الايجابيات و السلبيات وياريت كل اللي اشتري يقول تجربتة ويفيد التاني بخبرتة