ليه حوادث كوبري أكتوبر كلها أموات كده ؟
دي ياشباب رابع مره أشوف واحد ميت علي كوبري أكتوبر بسبب حادثه
ودي كانت يوم الأتنين اللي فات الساعه 11 صباحا
وأكيد في حد منكم شافها وهي كانت بعد نزله الحدائق بحوالي 50 متر
وهي أن عربيه شاهين بيضاء خبطه راجل كبير في السن وكان راكب فيسبا
نتائج الحادث
الفيسبا متدمره
الرفرف والكبوت بتوع الشاهين ضايعين
الزجاج الأمامي اتفرتك (تقريبا الراجل طار من الفيسبا ودخل فيه)
والأهم
الراجل مرمي علي الأرض وتوفي اللي رحمه الله لأن دماغه كانت مفتوحه
ودي 4 جثه اشوفها علي اكتوبر
ياناس اهدو شويه في السواقه بقي حرام عليكو
مع العلم اني بستخدم كوبري اكتوبر من شبرا الي مدينه نصر فقط
والأهم بقي اللي انا عامل الموضوع ده علشانه
الحادثه لما حصلت انا مقدرتش اقف بس كل اللي عملته نزلت اديت للناس جرنال علشان يخطوا بيها الراجل علشان دماغه كانت مفتوحه والمنظر سيء
وبعدها مشيت لحد المطلع بتاع صلاح سالم اللي هو الناحيه التانيه
ولقيت 4 ظباط واقفين فوق الكوبري وموقفين الطريق علشان في حد مهم طالع الكوبري
والناس كلها زهقت وسابت عربيتها وخرجوا منها من كتر الوقفه (واللي وراه مصالح يولع) مش بس كده انا نزلت وبلغت الظابط بالحادثه تخيلو يرد يقولي ايه
حاضر ثواني بس الباشا يعدي وهبلغ عنها قولتله الله أما اني صايم وسيبته ومشيت وانا بدعي عليهم كلهم لدرجه اني نزلت من الكوبري ولفيت ورجعت شبرا تاني بس من تحت الكوبري لأني مقدرتش اروح المشوار من اللي شوفته واللي حصل