سلام عليكم
انا معايا fsv gls 2013، وتقريبا العربيتين متشابهتين الى حد كبير فى الكماليات واعتقد ان الاختلاف الاكبر فى الشكل هى طبعا الكروس مش بنفس وسع السيدان بس برده مش ضيقه قوى والشنطه بتاعتها كويسه انا كنت بقارن الصراحه بين الاتنين وانا بشترى بس انا فضلت السيدان لانى بحب الشنطه تكون واسعه ومضرش احط حاجه من الشنط فى الصالون وخاصه انى مجوز ومعايا اطفال
بالنسبه للثبات بتاع السياره انا بصراحه كان اخرى بيها 130 (متعقد من حادثه كنت عاملها :) ) وكان ثباتها جميل بصراحه ما شاء الله حتى فى الملفات بتكون ثابته جربتها فى ملف وكنت على 120 وكانت لذيذه بصراحه وهى العربيه عموما انت بتحس انها تقيله وراسيه مبتحسش انك راكب حاجه خفيفه يعنى
وبصراحه انا بعد الحدثه كنت مصمم شويه اجيب عربيه فيها اى بى اس وبصراحه هو اختراع جامد جدا وده من الحاجات اللى عاجبنى فيها
العفشه بتاعت العربيه يمكن تكون ناشفه سنه بس مكتومه فى المطبات (مبتسمعش دربكه كتير) ، اما البنزين انا التانك عندى 55 لتر جوه البلد بيمشى 420 كيلو تقريبا من غير التكيف بالتكيف بيكون 400 تقريبا
على الطريق بيقل تجربتى انا فولت مره وسافرت من طنطا الى القاهر ورجعت وكملت بالتفويله مشيت تقريبا 600 كيلو (طبعا الاستهلاك نسبى على حسب ما انت بتحرق على الغيارات)

فى النهايه لا خاب من استخار وشوفها طبعا بعينك فى اى معرض وربنا يكرمك للاختيار الافضل