الارك اس اللي بستخدمه ده نسخه خام 4.2.2 ومبحسش فيه بلاج غير في الجيمز التقيله راماته 512
Sent from my Xperia Arc S using Forum Runner
الارك اس اللي بستخدمه ده نسخه خام 4.2.2 ومبحسش فيه بلاج غير في الجيمز التقيله راماته 512
Sent from my Xperia Arc S using Forum Runner
نظام تشغيل الاندرويد اصله واحد كلشركه بتاخذه تلعب فيه وتزود ابلكيشنز كتير و وواجهات الا فئه النيكسس بتاخد الخام دي زي ماهي
النوت ٣ غالبا هتنزله رومات كاستم بيور لو لقيت حاجه هبعتهالك
مش عارف ليه حاسس انكوا متحاملين اوى على الاندرويد :)
هو أكيد كل واحد وراحته
بس انا شايف الأندرويد وبالذات من اول الجيلى بين ممتاز جدااا وملبى جميع احتيجاتى وسريع جدا وسلس وكل حاجة
على العموم برده هيا وجهات نظر وتحترم بكل تأكيد :)
مش تحامل ولا حاجة
هو كل الموضوع إني جربت الios أكتر من سنة وكنت حابه ومستريح فيه جدا ولما غيرت للأندرويد من أول يوم حاسس إنه ملخبط وغير منظم وتطبيقات معظمها لا فائدة منها ومضروبة وإعلانات مزعجة على عكس الأبل ستور زائد موضوع السامسونج اللي من أول يومين بيهنج ده ويعمل ريستارت لوحده والميموري ال3 جيجا اللي في لحظة ألاقي أكتر من 80% مستخدم ولما آجي أفضيها توصل للنص بالعافية !!!
انت جبت الخلاصة ياباشا
حاجة كنت متعود عليها وتم تغيرها بحاجة تانية
طبيعى يكون فى خلل :)
بس غريبة حكاية انه بيهنج ده .. معايا النوت 2 والحمدلله شغال زى الفل ولا بيهنج ولا حاجة وعمره ماعمل ريستارت لوحده ابداا
والطبيعى ان النوت 3 يبقى احسن
وبالنسبة للبرامج انا معاك ان موجود برامج على الجوجل بلاى ملهاش اى 30 لازمة بس بالمقابل فى برامج كويسة برده وبتلبى الاحتياجات
وممكن تنزل البلاك ماركت وهتلاقى برامج محترمة اللى بفلوس
هو بس عشان انت لسه جديد على الأندرويد ومش عارف تتعامل معاه او معندكش خلفية عن مميزاته
وكمان انت جايب جهاز معبى مميزات عكس اى جهاز اندرويد تانى فطبيعى جداا اللى انت فيه
حاول تتعايش معاه وواحدة واحدة كده واستكشف مميزاته وهتلاقى نفسك معتش هتعرف تستخدم غيره حتى لو ابل نزلت شاشة 5 بوصة :)
أكيد طبعا أنا مقتنع بمقولة من جهل شيئا عاداه :)
لكن فعلا موضوع التهنيج ده حصلي أكتر من مرة ومفروض ان ده جهاز جديد وإمكانيات عالية يعني الكلام ده مينفعش يحصل فيه زائد إن حتى الكاميرا بصور فيديو لقيته بيوصل ل11 ثانية ويقوم مبطل تصوير وتطلعلي رسالة خطأ إيه سببها الله أعلم ! في حاجات كده بتحصل مينفعش تحصل وملهاش علاقة بإني كنت متعود على حاجة قبل كده وغيرتها لأنها عمرها ما حصلتلي وأنا معايا الآيفون لمدة سنة تقريبا فازاي كل ده يحصلي في أقل من أسبوع ؟! أكيد مش غلط فيا :)
عموما هي المنافسة بين الأندرويد والios صعبة ومتقدرش تحكم لنظام على نظام بشكل نهائي فكل نظام له مميزاته وعيوبه وممكن نظام كفته ترجح عن النظام التاني في حاجات وحاجات لكن الأكيد إن جهاز الآيفون كجهاز وهاردوير وstability مش زي السامسونج أبدا اللي بحس إنه عامل زي الأجهزة الصيني واللي يزودلك الإحساس ده الخط العربي الافتراضي اللي نازل فيه !! شركة عريقة زي دي وبتبيع أجهزة بالعبيط مش عارف تنزل خط عربي عدل بدل الخط بتاع الأجهزة الصيني دي ؟!
صينى ايه بس :) طب انا راضى زمتك النوت 3 اللى معاك زى الصينى او حتى شبهه؟؟؟؟ :)
طب انت تعرف انى بحب الخط ده جداا وعمرى ماغيرته حتى أيام ما كان معايا ال S1 :))))))
الموضوع كله ياباشا اذواق وناس كتير اللى مش بيعجبه الخط ده بيتغير عادى مفيش مشكلة
وانت ممكن تغيره عندك من قائمة الضبط :)
وحكاية الكاميرا دى عجيبة برده ههههههههه انت بتعمل ايه بالظبط فى التليفون؟ :fdsa:
بص ياكبير انت ممكن تعمل فاكتورى ريست من الريكوفرى والجهاز هيرجع كأنك لسه فاتحه من العلبة
بس الحكاية دى بتمسح اى حاجة على الجهاز يعنى لو عليه حاجات مهمة لازم تعمل باكب
جرب وشوف :) تحياتى ليك ياباشا :)
ما هي المشكلة الأزلية ان مفيش خطوط عربي في القايمة ! أنا غيرته فعلا بس نزلت برنامج اسمه iFont ب1.28 دولار + 6 دولار جوجل خصموهم أونطة معرفش ليه ! علشان أقدر أغير الخط وللأسف مفيش ولا واحد متوافق في كل حاجة لأنها مش خطوط ستاندارد مع الجهاز
وموضوع الفاكتوري ريسيت ده مش هينفع طبعا علشان أنا ظبطت حاجات كتير فيه ومش لسة هعملها من الأول زائد إن الجهاز هنج من أول ما جبته يعني زي ما قلتلك مش عيب فيا أنا أنا ملعبتش في حاجة أنا الحمد لله ببقى فاهم أنا بعمل إيه ممكن يكون فيروس من التطبيقات بأه الله أعلم بس أنا منزل كذا برنامج أنتي فايروس وكذا برنامج memory optimization بس برده أحيانا لما بفتح أكتر من تطبيق في نفس الوقت بتحصل حركة التهنيج دي
متشغلش بالك أنا كده كده مفيش موبايل بيقعد في إيدي سنة وهحاول أتأقلم مع الجهاز السنة دي لحد ما ربنا يكرم وأبل تنزل حاجة بشاشة كبيرة يا إما هشوف HTC أو Sony أو أي حاجة تانية تكون أثبتت وجودها الفترة الجاية
1.ممنوع تعمل روت للنوت 3 لانه مقفول ب knox...ودي هاردوير مش سوفتوير ..فتح الروت هيتلف الجهاز وانت وحظك معاه
وطبعا اذا كان ممنوع الروت اساسل يبقي اتوماتيك مش هتقدر. تغير الروم.....لحين اشعار اخر من المطورين
2.اذا كان مقيش عليه ارقام بطاقات ائتمان وخلافه ...شيل مضاد الفيروسات......ضرره اكتر من نفعه بكتير. غير انه مفيش رووت فانت تقريبا مش محتاجه. وهو سبب مشكل الغلق والريستارت
3. شيل برنامج memory optimization ....ملوش لزمه من اول اصدارات الجيلي بين وهي مدمجه مع النظام اصلا
لازم تعرف ان الاندرويد مختلف عن الويندوز ...اللي شغال في الخلفيه دي ممكن تقول نواه البرنامج بس
4.لو مضيقاك البرامج بتاعه الخلفيه ممكن في الضبط من خيار المطورين تحدد عدد البرامج اللي شغاله في الخلفيه
سوا android او ios الاتنين مبنيين علي نواه لينكس
اللي بيقول الios. افضل ومتعوب عليه....للاسف غلط
الاندرويد افضل .....واصعب.....بمراحل لكن يعيبه انك عاوز تخلي نظام واحد لعشرات من احجام الشاشات و عدد مختلف من الرزليوشن
وعشرات الشركات وكل شركه منزله عشرات الموبيلات كل واحد بهاردوير مختلف بتعريفات مختلفه
والمطلوب توفق النظام وتعريفاته.....ضيف تعديلات الشركات نفسها....احنا لسه بعيد عن افتكاسات المطورين والكيرنلات والرومات والروت..
وافتكاسات الشركات نفسها زي القلم وايشي شاشه اموليد و ips و مطويه وtft و..وووو
كل ده بنظام واحد ....بصراحه كتر خيره
في المقابل نظام واحد لهاردوير واحد لرزليوشين واحد في حجم شاشه واحد من شركه واحد...
يبقي سبب ضعف الاندرويد. هو سبب قوته) تنوع الشركات والاحجام والشاشات ...والاسعار ; )
لو مهتم اوي بالسلاسه.هات النكسس او الجلاكسي او ال. one الاصدار الخام للاندرويد
هتلاقيه في نفس سلاسه الايفون....بس هتخسر حاجه زي القلم ودي هتعرف قيمته بعد فتره من الاستخدام...
هههههه عسل يا بوب والله فعلا نفس الاحساس اللي جالي بالنسبة للخط لما قلبت في جهاز واحد صاحبي معاه النوت ٣ الخط دا فاشل آخر حاجة بالنسبة للعربي وبعدين المشكلة إنه معاك بقي تصفح ومواقع وغيرة يعني حاجة تضايق آخر حاجة دا بالنسبة ليا أنا كمستخدم لل IOS بقالي أكتر من ٦ سنين بلا مبالغة وفعلاً أنا معاك إن أبل بتستهبل ف جهازينها الاخيرين ال 5c & 5s وعدم تغيير حجم الشاشة اللي أكيد أكيد هيغيروها ف جهازهم الجديد ٦ السنة اللي جاية ولكن الحق يقال هو صغير بس كورباج يا وردة هههههه بردة رغم أن التطور مش فارق بين ٥ وال ٥s كمستخدم عادي قصدي المستخدم الطبيعي هنا ف مصر اللي مش فارق معاة بصمة أو غيرو هو أغلب الناس بتفرق معاهم حجم الشاشة وزن الجهاز البطارية كدا يعني انما لو إديت الجهازين لشخص عادي والله أخرة يقولك الفرق بينهم الزرار بتاع البصمة المهم خلاصة القول إن أبل بقت المنافسة بالنسبالها كبيرة مش زي زمان لما كان الايفون لايوجد جهاز للمقارنة معاة أيام نوكيا وزراير نوكيا دلوقتي سامسونج شغالة بتنافس بطريقة رهيبة لدرجة إنها بتعمل كل الأحجام والاشكال والالوان الفرق بين جهاز والتاني لا يتعدي نص بوصة أشي اس فور واس ثري واس فور ميني وثري مني ونوت وميجا وقلبتها أيسكريم هيا شوية وهتتشقلب لأبل ف الشارع بتقول للزبون معاك كام وهتاخد الف ماشي إتنين شغال تلاتة عندنا اربعة تلاقي خمسة أكيد عندناهتاخد يعني هتاخد وأغلب البرامج اللي علي الايفون زي الفيبر والواتس آب وانستجرام والفيس والتوتر وغيرهم موجدويتن علي الاندرويد نرجع لجهاز حضرتك النوت٣ واللي الشاشة بتاعتة بصراحة كانت هتخليني أغير الايباد بتاعي وأجيبة علشان السوبر أيموليد يتاع النوت ٣ ومش هتصدقني لو قولتلك إنه فعلا الخط العربي بتاع التصفح ف الاندرويد هو اللي رجعني عن حركة التغيير اللي كنت هدفع فيها كام ألف زيادة ههههه أنا فعلا إنبهرت بتطور الاندرويد وخصوصا بعد إفتكاسات الاخ تيم كوك في تغيير شكل ال IOS7 وتغيير الايكونات لفلات والاستايل العجيب اللي خلاني أفضل علي IOS6 وأعتبرة أسطوري مينفعش يتحدث دا كان آخر نظام كامل شامل محترم من أبل أنا هفضل ٦ وقفت أنا هنا خلاص ومش هعمل. أبديت تاني إن شالله ينزلو ١٧ مش ٧ فينك يا ستيف جوبز ، خلاصة الكلام جهاز حضرتك جميل جدا ربنا يباركلك فيه وأكيد فية برنامج ينزلو يغير الخط دا ويخلية Arial زي خط ال ios حضرتك معاك ماستر بيس أوف تكنولوجي بلا منازع آخر ما توصلو إليه ف التكنولوجيا من شركة سامسونج وهو أفضل جهاز فعلا ولا اس فور ولا فيرو وزي ما حضرتك بتقول سنة استخدام وغيرو هوإرجع تاني لوطنك الحبيب أبل يمكن ربنا يهديهم ويعملو حاجة كويسة السنة اللي جاية
الف الف مبروك على جهازك الجديد و ربنا يباركلك فيه.
1. بالنسبة لمشكلة التهنيج فدي حاجة مش طبيعية طبعا، انا معايا الاس 4 اللي مواصفاته اقل من النوت 3 و عمره ما عمل حاجة زي كده نهائي. انصحك تعمل Factory reset حتى لو حتخسر التظبيطات اللي عملتها عشان تستمتع بالجهاز بعد كده.
2. بالنسبة للفونت، الخط بيتغير عادي جدا من
Settings > my device > display > font style
3. اتأكد انك منزل اخر ابديت للسوفتوير من
Settings > more > about device > software update
الجهاز ممتاز جرب بس الحاجات اللي قولتلك عليها و ان شاء الله حتنبسط.
هههههههههههه يعني لقيت حد زيي أهو أخيرا :)
أنا اشتريت برنامج للأسف عشان موضوع الخط ده ونزلت خطوط حلوة فعلا بس للأسف ولا واحد عايز يظبط معايا في كل حاجة ! تلاقيه كبير في حتة وصغير في حتة وهكذا حاجة تقرف بصراحة
أنا هستنى آيفون لو غيروا الشاشة وخلوها حتى 5 بوصة بس هرجع للوطن تاني أكيد :) فضلوا زي ما هما هقدم طلب هجرة وأحجز تذكر ذهاب بلا عودة هههههههههه
عملت كده فعلا بالنسبة للخط بس بيغير الخط الانجليزي بس مش العربي بس انا نزلت برنامج بفلوس وبحاول أشوف خط مناسب أهو وبخصوص التهنيج بقاله فترة شغال معقول ربنا يهديه علينا يارب :)
الف مبروك على الجهاز وانا معايا ايفون ٥ وفعلا أخدت قرار أنى أجيب النوت ٣ خصوصا أنى كان معايا النوت ٢ قبل الايفون
بس المشكلة أنى مش لاقى نسخة ال 4g إللى هى n9005 وليست n9000
ياريت حضرتك تقول لنا انت اشتريت اى نسخة
طيب هنستأذنك تستخدمه شويه وتدينا ريبورت عنه
وموضوع الجير (الساعه) بتاعته ايه نظامها ؟؟
+1111111111111
انا مستغرب جدا من موضوع التهنيج والريستارت اللى بيحصل ده !! ؟
انا معايا S3 اللى هو اضعف من ال Note 2 اللى اضعف من ال Note 3 اللى مع حضرتك !! ؟ و مع ذلك مش بيحصل فيه لا تهنيج ولا ريستارت ولا اي حاجة
واما موضوع مقارنته بال I phone !! فانا اختي معاها I phone 4s ولما بمسكه !! معلش فيه فرق كبير بينه وبين ال S3 :T_thum1[1]:
وال S3 معديه بمرااحل وفارق عنه كتيير في الفخامة والشياكة والشكل والبطارية وكل حاجة
ياراجل ده كفايا العذاب اللى بنتعذبه عشان ننزل اغنية ولا نغمة ولا اي حاجة من ال Pc لل I phone !! ؟
وياسلام لو شفت فيديو ولا صورة عجبتك على موبايل واحد صاحبك وعايز تاخده منه !! ؟ هنا بتحس انك معزول عن العالم :crying2:
انا بس مش عارف ليه سامسونج بتنزل اصدارات كتير كدة ورا بعض !! ؟ انا حاسس ان كل موبايل مش بياخد حقه
ال Note 2 ملحقش ينزل عشان ينزله ال Note 3 !! ؟ حاسس انها هتعمل زي نوكيا كل يومين موبايل جديد وفجاءة محدش هيسمع عنها حاجة
مش فكرة بيزعل ناس !! بس النهارده سنة مابين كل موديل والتاني يعتبر قليل جدا !!!
فرضنا انا واحد اشتريت النوت 2 بعد مانزل بشهرين تلاتة !! ؟ يدوبك مش هيكمل معايا كام شهر والاقيه قدم ونزل النوت 3 !! ؟ وسعره نزل حبة محترمين بسبب نزول موديل احدث
فالواحد بيدفع مبلغ كبير اه عشان تاخد قصاده اوبشنز وموبايل محترم بس فيه جزء من الفلوس عشان الشياكة والبرستيج وعشان تبقى ماسك موبايل حديث
يعني لو تبص لل I phone تحس ان كل اصدار فيه بياخد حقه
هو اه بينزل في النص تعديلات زي ال s / c
بس بيفض برضوا الموديل الاساسي هو هو !!
يعني ال Note 2 يعتبر مات لما ال Note 3 نزل !! ؟ انا اللى هيخليني ادفع 4500 طب مازودهم ل 5500 واجيب الاحدث بالمرة !!
انا لما جيت اشتري ال S3 ماكنتش ناوي اجيبه اصلا !! انا كنت ناوي ادفع 3000 بعدها قلت طب ماللى يخليني ادفع 3 الاف !! ازود شوية واجيب الاحدث
وجبت ال S3 وكان عامل سعتها 4550
والمشكلة انك بتحس ان الفروقات مابين الاصدارات مش كتير بعكس الاول
يعني لما تبص للفرق مابين ال Note1 وال Note 2 هتحس انه فعلا فيه فرق
ولما تبص للفرق مابين ال S2 وال S3 هتحس انه برضوا فيه فرق ملحوظ
بعكس لما مسكت ال S4 !! ؟ شوية اضافات عبيطة تحس انها مالهاش لازمة ؟ قالك تحرك الهوا يحرك الصورة ؟؟ بذمتك دي مين هيستخدمتها ؟؟
والفرق في السرعة مش Critical لان ال S3 اصلا سرعته كويسة مايعتبرش بطئ
بصراحة من غير زعل النوت 3 يدى الايفون 5 بالجزمة وانا استحالة ارجع للـ ios تانى
الله يبارك فيك يا باشا
أنا جبت الإصدار n9000 لأن ده اللي بينزل مصر الإصدار التاني مش عارف بينزل مصر ولا لأ بس أنا مش شايف إن في فرق جامد بين الاتنين أساسا
بصراحة لحد دلوقتي مش قادر أنسجم معاه ومع الأندرويد باعتبار إني آيفونجي قديم :D الحاجة الوحيدة اللي عاجباني فيه هي الشاشة الكبيرة بوضوحها العالي غير كده بصراحة بحن للآيفون بس يكبروا الشاشة وطبعا دي وجهات نظر في النهاية عشان محدش يزعل :)
موضوع نقل الملفات والنغمات والكلام ده مفيش أسهل منه عن طريق برنامج بديل للآيتيونز المقرف فعلا اسمه iTools برنامج خفيف وصغير ومجاني ورائع بمعنى الكلمة حتى برنامج Kies بتاع سامسونج مش بنفس سهولته وروعته
وموضوع نقل الملفات من جهاز للتاني فالإصدار الجديد من الios في أوبشن جديد اسمه AirDrop بيسمح بتبادل الملفات بين جهازين آيفون
أما موضوع إن سامسونج بتنزل إصدارات كتير ورا بعض فأنا شايف إن دي أكبر ميزة في سامسونج لأنها بتلبي احتياجات كل الفئات اللي عايز شاشة كبيرة بتعمله اللي عايز شاشة صغيرة بتعمله اللي عايز وسط بتعمله وبين كل إصدار وإصدار سنة أنا شايفها مناسبة جدا لأن غالبا مفيش موبايل بيقعد في إيد حد أكتر من سنة أنا عن نفسي واحد بزهق من الموبايل من أول شهر :D
وجهة نظرك وأحترمها وإن كان غيرك مخالف ليها طبعا ولولا اختلاف الآراء لبارت السلع
الله يبارك فيك
بس أنا شايف إن طالما معايا ضمان فمن حقي أتمتع بيه حتى لو شاريه بفاتورة غير ضريبية لأني مش برجعه للمحل يصلحه أنا بديه للتوكيل نفسه وطالما الضمان ساري مش من حقه يقولي المحل اللي انت شاري منه فاتورته مش ضريبية !
الفرق بين نسخه ال 4g وال 3g كبيره مش صغيره بخصوص المعالج
لا يمكن مقارنه معالج سامسونج بمعالج زى سنابدراجون 800 الموجود فى نسخه ال 4g
الميزه الوحيده اللى فى معالج سامسونج عن كوالكوم يمكن فى عمر البطاريه اطول شوية
لكن البروسيسور الكوالكوم احسن كتير جدا طبعا
على فكرة
معظم مشاكل اجهزه سامسونج بتبقى من النسخ اللى بتحط فيها معالجتها (سخونه وتعليق وكراشات)
تحس انهم عايزين يدخلوا المجال دة بالعافيه مع ان فى شركات احسن منها بكتير ومينفعش تتقارن معاها مهما عملت
من وجهه نظرى سامسونج بتعمل شاشات حلوة وسوفتوير ممتاز لفئة النوت فقط
اللينك ده في مقارنة بين الإصدارين
Product Comparison - Cell Phone - Samsung Galaxy Note 3 N9000 vs Samsung Galaxy Note 3 N9005
ملخصها إن النسخة n9005 أفضل من الn9000 في سرعة نقل البيانات (4 مرات أسرع) لأنه بيدعم ال4G اللي مش موجود أساسا في مصر ! وفي البروسيسور (20% أسرع) وفي تسجيل الفيديو (4 مرات جودة أعلى)
لكن لو بصيت هتلاقي إن موضوع سرعة نقل البيانات فضلا عن إنه غير متاح في مصر فمش هيفرق معاك كمان مع السرعات البطيئة عندنا فمش هتفرق معاك إن النسخة n9005 بسرعة 150 ميجا في حين التانية بسرعة 42 ميجا !
ثانيا موضوع البروسيسور أنا شايف إن بتاع الn9000 ممتاز جدا وال20% الزيادة في الإصدار الn9005 مش هتشعر بيهم على الأرجح في مقابل إن ده هيخلي بطارية الn9005 تستنفذ أسرع من التانية لأن الاتنين نفس السعة 3200 mAh
ثالثا موضوع تسجيل الفيديو الn9000 بيسجل فيديو Full HD بجودة 1920x1080 يعني مش محتاج أصور بجودة أكتر من كده خاصة إن التصوير بجودة أعلى من كده هيستهلك كارت الميموري ومساحة الفيديو الواحد هتزيد 4 أضعاف تقريبا عن التاني وبرده مش هتشعر بفرق بين الجودتين
فالخلاصة إن النسخة اللي نزلت مصر مش بطالة والنسخة التانية متستاهلش الفرق اللي في حدود 250 ريال يعني 475 جنيه تقريبا والله أعلى وأعلم
وعلى كل حال اللي عايز يشتري أي واحد من الاتنين ومش مهم معاه موضوع الضمان ممكن يجيب النسخة ال4G ب5225 جنيه تقريبا وال3G ب4750 تقريبا من السعودية
https://online.axiomtelecom.com/ksa/...?name=note%203
الفكره باة ان النسخه ال 4جى تقريبا خلصت فى السعوديه انا سال عليها هناك دة غير ان سعرها دلوقتى فى المحلات 3000 ريال يعنى ممكن تبقى اغلى من اللى هنا كمان
وبالنسبه للنسخه ال 4جى مش حتنزل مصر بضمان اصلا اللى بضمان ال 3جى بس
انا بجيب واحد لاخو مراتى علشان كدة متابع اسعاره وعمال اسال على احسن سعر لية