إحساس رجرجة في الطلعة، يا ترى عيب ايه؟

السلام عليكم

العربية 504 Peugeot

لما آجي أطلع بالعربية على الأول ألاقي تقطيع كأن العربية بتتحرك قدام و وراء و بابقى دايس بنزين كويس و لما أسيب الدبرياج كله بيروح التقطيع
بيبقى ظاهر قوي لما أطلع بالعربية في الملفات زي مثلاً يو-ترن بيبدأ العجل يلف و يقف يلف و يقف يلف و يقف لحد ما اسيب دبرياج

أفتكر حاجة زي كده حصلت من سنتين كانت بتقطع و أنا محمل على الدبرياج و رحت بيها للميكانيكي عمل حاجة كده عند الكرونة و اتظبطت. بس ماعرفش عمل إيه بالضبط لأني ما كنتش باهتم بالتفاصيل أيام ما كان والدي متحمل مسؤلية المحروسة :)

يا ترى ده عيب إيه

ممكن يكون عيب دبرياج

فى الغالب ده طاقم الدبرياج محتاج تغيير

فى حاجه اسمها الفلنشه دى بتخللى العربيه تعمل رجرحه كدا بره و كمان بين النقلات هى تحت الفتيس بلزبط
روح خللى ميكانيكى ينزل تحت العربيه و يقولك بايظه ولا لا (لو بايظه بتلاقى الكاوتش اللى فيها متقطع او مهترىء )

فهد ، رجل النيل العظيم :)
هو احتمال الدبرياج خاصة أنه ماتعملش فيه أي حاجة من فوق الـ 10 سنين بجد
و اعذروني أنا مش خبرة قوي فبحثت عن أعطال الأسطوانة و طريقة اختبارها و أعتقد أنها سليمة (بتبطل لما أطلع عالرابع مع فرامل اليد) و العربية بتسحب كويس و صوتها ما بيعلاش يعني مش بتفوت
و لما جربت أطلع بالعربية جامد بتأمرك من غير تقطيع

فهل في حاجة تانية غير الأسطوانة؟


بليزر :)
هاشوف موضوع الفلنشة ده. أهو على الأقل يبقى شكلي مثقف قدام الميكانيكي بكرة


معلش حيرتكوا معايا بس حبيت أستفسر من أصحاب الخبرة و الواحد يستفيد

باشا اتاكد ان قواعد الموتور سليمه . ممكن تعمل الرجرجه دى . خد رأيى فى الموضوع ده جرب تزبط كهربا و هواء و بنزين و شوف ايه الحياه

قواعد الموتور ممكن تكون السبب

بص ياباشا زى ماقال الاخوه الافاضل ممكن طقم الدبرياج او الفلنشه اكشف عليهم

أشكركم جداً يا جماعة. مستني أخلص مشوار عابر للقارات بعد بكرة و أروح للميكانيكي أشوف إيه النظام

ملحوظة: بتبقى الرجرجة باينة قوي في المطالع. يعني لما تكون العربية واقفة في مطلع و آجي أطلع بالأول لحد ماسيب دبرياج

هاعرفكم النتيجة إن شاء الله

كده احنا بنلعب قبل ما نفكر فى طقم الدبرياج لانه كده الظاهر انه معترض ولازم يتغير جرب تزود كهربة العربيه و ان ظهر العيب هوه هوه بالذات فى المطالع يبقى طقم دبرياج لان

انا كمان عندى نفس المشكله " بس " لما العربيه بتسخن ... يعنى لما تكون الحراره على 90 تعمل الرجرجه ديه فى الطلعه الاولى و تروح بعد كده

الاسبوع الى فات فى يوم حر نار و الدنيا كانت زحما جدا جدا جدا بشكل غريب
الرجرجه ديه زادت جدا و حسيت بتنتيش بسيط مع التانى و التالت ... لكن انهارده بجرب العربيه تانى بليل و عداد الحراره معداش ال80 كانت ماشيه طبيعى جدا .

* ملحوظه ان طقم الدبرياج انا مغيره شهر يناير الى فات " يعنى اعتقد العيب مش منه " .

* قواعد الموتور عندى متقطعه لكن مش السبب " لان الرجه بتطلع مع السخونيه بس " .

- شاكك فى الاسبلاتير , طرمبه البنزين , الموبينه .

أنا نفس المشكله دي كانت عندي من فتره حوالي سنه وبعد ما طلعت روحي معاها اكتشفنا أخيرا ان السبب في طقم الدبرياج مع ان كل الاعراض الداله على مشاكل طقم الدبرياج مش موجوده عندي الا المشكله دي وكانت بتظهر معايا جداً في الحر أول ما اقف في زحمه مثلاً نص ساعه الاقي الدنيا باظت وتحصل الرجرجه دي معايا بشده والغريب انها كانت بتختفي او بتقل بشكل ملحوظ في حالتين
الحاله الاولى لو ريحت العربيه مثلا طلعت الشغل ونزلت وانا مروح الاقي الموضوع طبيعي جداً
الحاله التانيه اني اطلع من الزحمه وامسك طريق مفتوح مثلاً وامشي فتره الاقي الموضوع هدي جداً وراح ........وده كان مطلع عيني لئن على مابروح التوكيل عشان نشوف المشكله بيكون العيب راح تقريباً ............

عموماً جربوا الآتي لو حاصل يبقى اكيد طقم دبرياج زي عندي .
1-هل لاحظت ان الدبرياج تقل شويه ؟ يعني بقى اصعب من الاول في الدوسه.
2-شوف الدبرياج بيفصل فين فوق اوي ولا تحت اوي ولا تقريباً في نص المشوار بتاع الدواسه ؟ لو بيفصل فوق اوي يعني المشوار كله ماينقلش ويجي على اخر جته تلاقي النقله جت ......يبقى كده طقم دبرياج.

على فكره يا استاذ مهاب انا الموضوع ده حصل لي في عربيتي وهي جديده ولسه في الضمان .........هو شيء نادر صحيح لكن وارد ان يكون في عيب في الطقم اللي راكب حديث عند حضرتك.....عموماً شوف اللي قلت عليه وان شاء الله ربنا يقدم اللي فيه الخير.

وعلى فكره كمان انا كان شكي وقت المشكله دي برضه في الموبينه او الكويلات عندنا في الرينو او الكهرباء عموماً لكن الرد كان ان لو المشكله زي ما حضرتك بتفول كهرباء الرجرجه دي هتبان كمان في السلانسيه والعربيه واقفه مش بس لما نبدأ نتحرك.


استاذ abo_hosni حضرتك شوف برضه النقطتين اللي انا كتبتهم وان شاء الله نفهم ايه المشكله مع العلم ان انا برضه لغاية ما حلينا المشكله لم يكن هناك اي عرض من اعراض تلف الاسطوانه او الدبرياج زي ما حضرتك بتقول برضه وكنت باعمل نفس الاختبارات اللي حضرتك تفضلت وقلتها وكانت الشواهد كلها بتقول ان مفيش مشاكل عندي في الدبرياج ..............لكن في الآخر حصل اللي انا قلته في اول كلامي.

يا رب اكون قدرت اساعد حضرتك .........وان شاء الله نوصل لحل قريب ان شاء الله والعربيه ترجع زي الفل ..............

تقبلوا وافر تحياتي واحترامي.

استاذ رامى الف شكر على ردك المنطقى جدا

فعلا انتا وجهتنى لحاجه كانت غايبه عن بالى بخصوص الدبرياج .... ليه الدبرياج مايكونش مضروب !! لا فعلا بليه الدبرياج بعد شهر واحد بس بدأت تصوصو و لما رجعت للميكانيكى قالى ان البليه مضروبه ؟
بس قالى الدبرياج سليم

بس فعلا وارد جدا جدا ان يكون الدبرياج فيه عيب صناعه او مضروب ليه لا

المشكله ان الدبرياج ده لوحديه عكمه لان الموتور عندى لازم يتشال خالص بره العربيه

ربنا يسهل لو عرفت حاجه جديده فى الموضوع ده حبلغكم بيها

مره تانيه شكرا ليك يا استاذ رامى على شرح تجربتك

صحيح بالنسبه لبدال الدبرياج عندى فهو خفيف و زى ماهو من ساعة ماغيرت طقم الدبرياج

و بيفصل عند نص المسافه

الرجة من اما طقم الدبرياج خلاص وفى خدمة بعد 10 سنين
او ان زهرة الفتيس مش مربوطة كويس فى الموتور(فكت لوحدها مع الوقت و المطبات)
خد بالك اوى من موضوع الزهرة لو سايبة هتتكسر مع الوقت زهرة الفيات ب 150 جنيه و بتاعة البيجو اكيد هتعدى ال 300 جنيه

فعلا الموضوع ده عندى من يومين و الفتيس فيه عضه بسيطه بس انا حاسسها و قلت اروح البنزينة اشوف زيت الفتيس، مكنتش عارف السبب ايه بس كده فعلا فيه مشكلة فى طقم الدبرياج او الفتيس.

اقتباس:

---

المشاركة الأصلية كتبت بواسطة meeezo333eg

الرجة من اما طقم الدبرياج خلاص وفى خدمة بعد 10 سنين
او ان زهرة الفتيس مش مربوطة كويس فى الموتور(فكت لوحدها مع الوقت و المطبات)
خد بالك اوى من موضوع الزهرة لو سايبة هتتكسر مع الوقت زهرة الفيات ب 150 جنيه و بتاعة البيجو اكيد هتعدى ال 300 جنيه

---

ايه زهرة الفتيس ديه !! انا اول مره اسمع عنها

ياريت لو فى صوره ليها يبقى كتر خيرك , علاشان انا قريب جدا ان شاء الله حروح لميكانيكى و اشوف المشكله ديه ايه سببها ....... و عاوز اكون ملم بكل الاسباب الى فيها شك . علاشان اوفر على نفسى الفتى بتاع الميكانيكيه

عهينيا يا باشا
هصورهالك و ابعتلك صورها

عهينيا يا باشا
هصورهالك و ابعتلك صورها بالليل ان شاء الله

آسف على التأخير لأني حتى الآن ما رحتش لميكانيكي ولا عملت حاجة

اقتباس:

---

1-هل لاحظت ان الدبرياج تقل شويه ؟ يعني بقى اصعب من الاول في الدوسه.

---

لا زي ما هو. و أصلاً الدواسات الثلاثة عندي تقال مقارنة بالجديد :)

اقتباس:

---

2-شوف الدبرياج بيفصل فين فوق اوي ولا تحت اوي ولا تقريباً في نص المشوار بتاع الدواسه ؟ لو بيفصل فوق اوي يعني المشوار كله ماينقلش ويجي على اخر جته تلاقي النقله جت ......يبقى كده طقم دبرياج.

---

كلامك صح. جربت الآن و لقيته بيمشي أكتر من نصف المشوار قبل ما يسمح بالنقلة يعني قبل الدواسة بحاجة بسيطة. و لاحظت أن في عربيات زملائي بيفصل قبل كده بس كنت فاكره رجلاش و خلاص
(و عندي استفسار ساذج شوية في معنى بيفصل فوق أو تحت. يعني لما أضغط و يوصل آخر الدواسة ده معناه فوق؟ )

في أواخر رمضان كنت ناوي أشوف الموضوع ده عند الميكانيكي و طبعاً "مستبيع" في الدبرياج فعملت حركة قبل ما أطلع من الجراج شديت فرامل اليد و جبت الرابع و دست بنزين و بدأت أسيب دبرياج و أقرص عليه من غير ما أخللي العربية تطفي. يعني كأني بانظف الاسطوانة :) لحد ما شميت رائحة التيل المعروفة
قلت أنا كده قتلته خلاص أطلع بقى و المفاجأة ألاقي الطلعة ناعمة جداً!!! جربت كذا مرة و في مطالع مافيش مشكلة خالص. طبعاً كنسلت الميكانيكي. و بعدها جرب و العربية محملة 5 ركاب مافيش أي رجرجة نهائي زي قبل كده!!!
مافيش أسبوعين و الرجرجة ابتدت ترجع بس على خفيف و مع التحميل الزيادة. هل ده له تفسير زي عدم نظافة أو تراكم زيت على الحدافة أو الاسطوانة؟

والمشكلة دي عندي مالهاش علاقة بالسخونة أو طول المشوار

اولا :
لما تضغط و تجيب اخر الدواسة ده معناه تحت
و معنى انه بيفصل عندك فوق الدواسة بحاجة بسيطة انه مظبوط بس هل كان بيفصل اعلى قبل كده
و معنى اللى قلته ان الزهرة مربوطة سليمة و ملهاش دعوة بالقصة دى

طيب انا كمان بتظهر احيانا مشكله الرجه ديه....
بحس ان الرجه من تحت و مالهاش اي علاقه بالموتور....
يعني ببقي حاسس ان الطنابير مثلا بتلف علي الفاضي من غير الكاوتش بتقطيع:nerd4:
بتبقي رجه مع تقطيع في الطلعات علي الاول بس....
و العربيه نوعها اكسنت 2006

اقتباس:

---

المشاركة الأصلية كتبت بواسطة meeezo333eg

اولا :
لما تضغط و تجيب اخر الدواسة ده معناه تحت
و معنى انه بيفصل عندك فوق الدواسة بحاجة بسيطة انه مظبوط بس هل كان بيفصل اعلى قبل كده
و معنى اللى قلته ان الزهرة مربوطة سليمة و ملهاش دعوة بالقصة دى

---

شكراُ على التوضيح. و الدبرياج في نفس ارتفاعه لم يتغير من زمان

دابيكون من الديسك :k4: