الحقوني زيت العربية وقع عالارض

**drwaelmohammad** · 08-10-2013 03:15 PM

السلام عليكم ورحمة الله وبركاته
انا معايا لانسر كريستالة 99
انهاردة وانا مروح من الشغل لقيت تحت العربية زيت كتير جدا مكان ركنتها
بحط مقاس الزيت ملقيتش ولا نقطة زيت في العربية
جبت ميكانيكي جنب الشغل بص وقالي ده اويل سيل الكرنك ضرب وعاوز يتغير
هي المشكلة ظهرت بوضوح من حوالي 10 ايام لاحظت نقط زيت كتيرة شوية تحت العربية
بص عليها الميكانيكي وقال دي جاية من الاسبراتير وفكه وحطله جلبه وكمان فك وش المكنة وربط مسامير فيها كانت مهوية وكلام ممن دهاصلي ماليش خبرة ومعرفش اسماء المكونات قوي
المهم الزيت معادش ظاهر من فوق خالص والتنقيط قل جدااااااا من تحت الكلام ده من 5 ايام
انهارده بقى حصل كده
فايه رايكم؟
وهل اويل سيل الكرنك يوقع الزيت مرة واحدة كده؟ ولو مش هو ايه الاحتماليات التانية؟
وهل ممكن احطلها غيارة زيت عشان امشي بيها 40 كيلو عشان اوصل لميكانيكي كويس لاني اللي عندنا كلهم على ادهم:(
ولا الزيت طالما وقع بسرعة لو غيرت مش هيوصلني؟
انا خوفي ان الميكانيكي قال عشان يغير اويل سيل الكرنك هياخد من الصبح للعصر تقريبا لانه هيحتاج يحل الفتيس وانا صراحة خايف في حله وتربيطه الحاجات دي كلها يعك عكة مش مظبوطة في العربية

ايه رايكم شوروا عليا اعمل ايه؟
ولو تكرمتم بسرعة لان العربية مركونة في الشغل :(

**madman2002** · 08-10-2013 03:37 PM

ريح نفسك وهات ونش يشدها للميكانيكى اللى انت عايزه وتمن الونش بتمن جركن الزين اللى هتحطه ويقع على ما توصل

**MITSUKERO** · 08-10-2013 04:09 PM

ممكن تحط زيت و يقع عقبال ما توصل

الافضل ونش

خلي بالك لو فعلا اويل سيل كرنك يبقي لازم تجيبة اصلي لان المضروب بيسيح من الحرارة

انت مكانك فين ؟

**hamaka** · 08-10-2013 04:13 PM

المشاركة الأصلية كتبت بواسطة madman2002

ريح نفسك وهات ونش يشدها للميكانيكى اللى انت عايزه وتمن الونش بتمن جركن الزين اللى هتحطه ويقع على ما توصل

كلام 100%

**drwaelmohammad** · 08-10-2013 04:20 PM

جزاكم الله خيرا
انا في مركز اسمه اولادصقر
بتعامل مع ميكانيكي وعفشجي في دكرنس ده اقرب مكان في صنايعية كويسين حوالي ساعة الا ربع بالعربية
سؤالي هو ممكن اويل سيل الكرنك يوقع الزيت كله مرة واحدة كده؟
ولا ممكن يكون في مشكلة تانية تعمل كده؟
هل ممكن يكون فلتر الزيت ؟ لان من 5 ايام وانا بغير زيت العربية الواد قعد يفك في فلتر الزيت كتير وفي الاخر معرفش ونادى الاسطى بتاعه هو الي حله وركب الجديد
هل ممكن يكون عمل مشكلة في المكان اللي بيركب فيه الفلتر وهو اللي وقع الزيت انهاردة؟

**drwaelmohammad** · 08-10-2013 04:21 PM

والاصلي سعره كم تقريبا ؟ ومصنعية كام تقريبا؟

**MITSUKERO** · 08-10-2013 04:28 PM

بص تسريب الزيت ممكن يبقي من الفلتر او من الكرتيرة او من اويل سيل الكنك

المصنعية هي مصنعية فك و تركيب الفتيس حسب المكان يعني من 100 في الارياف او 150 الي 300 في القاهرة حسب المكان برضة داخل القاهرة

الاويل سيل ممكن يجيب عادي و يوقع الزيت كله

الاويل سيل الاصلي ب 100 او 120 تقريبا و موجود في التوكيل او في ورشة المتخصصون (دي هتبقي فاتحة اخر النهار) و لو تعرف تجيبة من التوكيل (الرواس طبعا لان دياموند معندهمشي حاجة كريستالة) هاته من التوكيل

ربنا معاك و ابقي قول لنا عملت ايه