المستر والميس

**hugan** · 09-10-2013 02:01 AM

من فتره وفي موضوع شاغلني
لما كنت في ابتدائي واعدادي
كنا بنلقب المدرس بالاستاذ فلان
والمدرسه السيده بابله
وماكانش لقب المستر غير لمدرس الانجليزي في اعدادي
ولما طلعنا ثانوي
كان المدرسين الرجال
لقبهم بك بيه يعني
مفيش مدرس يتقال له ياستاذ او مستر في ثانوي دايما بيه
مش عارف ايه اللي حصل
ولادي واحد في اعدادي والثاني في صف سادس
والبنتين ابتدائي
كل المدرسين الرجال مستر فلان
والسيدات ميس فلانه
اقوله يابني مستر ايه وميس
جبتوا الكلام ده منين
اسمه استاذ او ابله
يقولي يابا انت قديم قوي مفيش الكلام ده
اقوله حتي مدرسين العربي والدين
قديما كان اسمه الشيخ
العيال مفبش علي لسانهم غير مستر وميس
حتي المواد الاجتماعيه
سموها دراسات
اجي اذاكر معاه تاريخ ولا جغرافيا
اقوله يابني هات كتاب المواد الاجتماعيه
يقولي مفيش حاجه اسمها مواد اجتماعيه
مش عارف انا اللي قديم ولا الدنيا انقلب حالها

**saddam** · 09-10-2013 06:10 AM

صديقي المواطن
التربية تبدأ.من.البيت وأنا حربي ولادي إني لا يمكن أزعل أو أروح أدافع عن إبني لو مدرس أو مدرسة شافته بيغلط وضربته وإعرف إنك لو جرأت أولادك على عدم إحترام المدرس فلتعلم إنك سبب خرابهم وبالتوفيق

ودمتم للنضال

**Ahmed_selmy** · 09-10-2013 09:45 AM

مستر وميس دى من زمان اوى ......احنا كنا بنقولها وعلى فكرة انا عندى 30 سنه يعنى مش صغير.....حضرتك بس اللى مش متابع.

**A_H_M_A_D** · 09-10-2013 09:59 AM

اعتقد ان الموضوع ده بدأ مع بداية انتشار مدارس اللغات , اكيد هم اول تلاميذ استخدموا المستر و الميس , وبعد كده انتشرت في بقية المدارس العربي و الحكومية كنوع من التقليد

مع ان ميس دي المفروض تتقال للأنسه بس , والمتزوجه مسز أو مدام , بس اهو تقليد وخلاص من غير تفكير

**kar!m** · 09-10-2013 10:46 AM

انعدام الهوّيه ..

**S O P H O S** · 09-10-2013 05:30 PM

لا ده التطور او ما يسمي بذلك
بس استاذ او مستر او بيه مش مهم
المهم يعلموا الاولاد صح ويرعوا ربنا فالجيل ده

**hugan** · 09-10-2013 09:44 PM

المشاركة الأصلية كتبت بواسطة eslamrace

لا الدنيا اللى انقلب حالها مش احنا اللى قدمنا ولا حاجه لان لو تلاحظ ايام الثانوى عندنا كانت علاقتنا مع الاساتذه منفتحه اكتر بس بحدود ومع وجود الاحترام دلوقتى طالب الثانوى بيبقى المدرس قلقان منه ولو مدرسه محترمه بيبقى المدرس العلاقه بينه وبين الطلبه علاقه منفعه ليس الا .
التعليم باظ وعمر البلد محتتصلح من غير البدء بالتعليم والاصلاح لو حصل مش حيفرق الطالب يقول للمدرس استاذ ولا مستر المهم انه حيطلع انسان محترم
ربنا يعينك على تربيتهم ويخليهم لك ويقدرك على اخراج جيل محترم فى الوقت اللى لازم تعتبر المدرسه فيه وسيله افساد لاودلادك مش وسيله تربيه مساعده ليك وحمل التربيه واقع عليك بس .
ربنا معاك.

معاك ان مفيش تعليم في مصر
والمدرسين والمدرسات شغالين علي تحصيل اموال من اكبر عدد من الطلبه
والعلاقه نفع واستنفع
اما نقطه المدرسه مكان لاصلاح الاولاد او افسادهم
بكل تاكيد مكان لافسادهم

المشاركة الأصلية كتبت بواسطة saddam

صديقي المواطن
التربية تبدأ.من.البيت وأنا حربي ولادي إني لا يمكن أزعل أو أروح أدافع عن إبني لو مدرس أو مدرسة شافته بيغلط وضربته وإعرف إنك لو جرأت أولادك على عدم إحترام المدرس فلتعلم إنك سبب خرابهم وبالتوفيق

ودمتم للنضال

نورت الموضوع صدام باشا
عمري ما ادافع عن ابني لو غلط سواء في الدرسه او خارجها
ودومت للنضال

**hugan** · 09-10-2013 09:50 PM

المشاركة الأصلية كتبت بواسطة ahmed_selmy

مستر وميس دى من زمان اوى ......احنا كنا بنقولها وعلى فكرة انا عندى 30 سنه يعنى مش صغير.....حضرتك بس اللى مش متابع.

ممكن فعلا انا مش متابع
لكن كنت في ثانوي فياواخر الثمانينيات مش كبير قوي
لكن انا ماشوفتهاش لحد ثانوي

المشاركة الأصلية كتبت بواسطة a_h_m_a_d

اعتقد ان الموضوع ده بدأ مع بداية انتشار مدارس اللغات , اكيد هم اول تلاميذ استخدموا المستر و الميس , وبعد كده انتشرت في بقية المدارس العربي و الحكومية كنوع من التقليد

مع ان ميس دي المفروض تتقال للأنسه بس , والمتزوجه مسز أو مدام , بس اهو تقليد وخلاص من غير تفكير

ايوه مدرسه الانجليزي في اعدادي كانت بتقول كده
الله ينور فكرتني والله

المشاركة الأصلية كتبت بواسطة kar!m

انعدام الهوّيه ..

هي دي مصر

المشاركة الأصلية كتبت بواسطة s o p h o s

لا ده التطور او ما يسمي بذلك
بس استاذ او مستر او بيه مش مهم
المهم يعلموا الاولاد صح ويرعوا ربنا فالجيل ده

شكر لمرورك
عايز اقولك ان ابني بياخد درس دراسات او مواد اجتماعيه
المدرس بيشرح له ان عبده النار قبل الاسلام كان اسمهم صائبه
سمعت الكلام ده وماستحملتش
بعد الدرس قولت لابني
قول للمدرس بتاعك ان عبده النار اسمهم مجوس
تخيل جهل المدرس وصل لحد فين

**ElectronicLife** · 10-10-2013 02:18 PM

انا عندى17 سنة وفى 2 ثانوى بسمبعرفش اقول مستر ولا ميس دى خالص مش عارف لية بحس انها ماسخة كدة :d المدرس استاذوالمدرسة ابلة وفى مدرسات كبار عندنا يعنى الى سنها بتعا حاجة و 50 كدة بنقولها يا حاجة :d