هيونداي إلنترا ٢٠١٣ gls dab abs - إنطباعاتي بعد أول ١٥٠ كيلو
أولا و قبل كل شيئ الشكر واجب لرجالة نايل موتورز :
micho129، Haitham Basha، saddam، Silent~Dream، FOREX EAGLE، mahmoud_afifi، profimh، M I D O، tameraast، Maghraby1987، dadapharma، Ultramisho،
بجد مش عارف من غير نصايحكم و خبرتكم كنت عملت إيه... :B4_388:
ثانيا مهم تعرفوا ان عربيتي السابقة كانت دايو لانوس كنت شاريها زيرو برضو من ١٠ سنين لأن أكيد دا ليه مؤثر على آرائي
الحمد لله إستلمت العربية من حوالي ٦ أيام و هي GLS DAB ABS و الحقيقة كنت ناوي أجيب الفئة الأقل في ال GLS اللي من غير ABS بس غيرت رأيي في آخر لحظة بناء علي نصائحكم و دا كلفني ٧٠٠٠ جنيه زياده فا ياريت تلموا أي حاجة لأخوكم اللي فلس :crying2:
طبعا مش محتاجة كلام العربيه واسعه سواء قدام أو ورا و شكلها فخم جدا من بره و التابلوه و الكونسول شيك و مبهجين جدا بإستثناء عيب سخيف و هو ضوء الكاسيت اللي في رأيي عالي جدا و مافيش حاجة علي حد علمي ممكن توطيه علي عكس ضوء العدادات و باقي التابلوه و الكونسول.
كمان أماكن التخزين الكتيره في العربيه حاجة مفيده و عمليه جدا المكان الوحيد اللي باحس انه مالوش لازمه هو المكان اللي ورا مكان الأكواب.. اعتقد عاملينه للموبايل بس لما بتحط الموبايل فيه مش بتشوف اي حاجه لو حد اتصل او جالك اي notification
نظام الصوت انا شايفه هايل و مش محتاج إضافات و المفاجأة ان الكاسيت الجديد (اللي فيه ال usb و ال aux فوق مش تحت) بيدعم الآيفون و الأيبود ب كابل ال usb العادي مش محتاج كابل مخصوص زي الكاسيت السابق. و كمان مود ال BT Audio إختراع الحقيقة من غير اسلاك تقدر تسمع اللي انت عايزه من الأيفون او الآيباد أو اي حاجه فيها A2DB Bluetooth و كمان تقدر تنقل ما بين التراكات عيبه الوحيد بس ان اسم التراك مش بيظهر علي الكاسيت زي لما بتوصله بالكابل و بس برضو هايفضل الموضوع دا احلي حاجة اكتشفتها في الكاسيت.
التكييف الأوتواتيكي هايل و بالرغم من الشكاوي اللي علي مكان الفتحات المنخفضة و اللي عدلوها في ال facelift انا مش شايف انها مضايقاني خالص
بالنسبه للموتور و التسارع و قوه العربيه و الحاجات دي للأسف مش قادر احكم اوي علشان لسه في التليين و لكن واضح انها بتتلكك علشان تجري :new:
مجال الرؤيه الخلفي من المرايه و المرايات الجانبيه مش احسن حاجه لكن مقبول.
العفشه يمكن هي فعلا اسوأ حاجه في العربيه دي مش عايز ابالغ بس انا مش حاسس بأي فرق ما بينها و بين اللانوس بس علي العموم مش متضايق و خصوصا ان الناس حذروني من الموضوع دا قبل و اشتري و مقارنه بالخيارات التاني اللي كانت قدامي كانت الالنترا افضل خيار و انا مؤمن ان مافيش ربيه مافيهاش عيب.
ناقل الحركة الوتوماتيك انا شايفه ممتاز و تقريبا مش باحس بالنقلات. بس لغايه دلوقتي ماجربتش الوضع الرياضي.
بالنسبه لتأمين العربيه المفروض هيا فيها اموبيليزر و دا عرفته من اللمبه اللي علي شكل عربيه جواها مفتاح. بس اللي فهمته ان مافيهاش جهاز الانذار العادي. و كمان مافيهاش وحدات لرفع الزجاج و غلق المرايات و ربنا يستر من الموضوع دا لان عربيتي القديمه كان فيها و متعود عليه و خايف مره انسي الزجاج مفتوح و امشي :ask: طبعا موجود عند السجان بس لو ركبته راح ضمان الضفيره.
و طبعا بسبب ان الموديل دا مشهور عند الحراميه بسهوله سرقته بقي عندي هاجس ان في حاد هايكسر الإزاز علشان يحاول يكسرها فا قررت اجيبلها القفل بتاع الفرمله مع الدركسيون علشان الحرامي لما يشوفه يكسل يحاول. و عموما ربنا هو اللي يحافظ عليها