الموضوع: عيوب جيلى الى قابلتنى

بسم الله الرحمن الرحيم

انا حبيت اكتب موضوع عن عيوب الايمجراند7 الى قابلتنى عشان فيه ناس كتير بتتدور عالعيوب عشان تتطمن قبل ماتشترى ...
انا عربيتى ماشيه 5700 كم لغايه دلوقتى و العيوب الى قابلتنى نشوفيه كرسى السواق و دى فعلا اكتر حاجه مضيقانى فالعربيه و طبعا ليها حلول كتير ابسط حاجه شالته عشان الكرسى ناشف .. تانى عيب صوت علبه البيئه و ده عيب فالشكمان المصرى الى راكب فده ظالم العربيه لكن اهو عيب برضه و بتشتريها بيه ... لمبه التشك انجن طبعا عند اغلب الناس الى شايفها عيب نحسبها عيب هى نورت عندى يومين و طفت لوحدها و طبعا التوكيل بيحل الموضوع ده .. هبو تيل الفرامل عالجنط القدام بيخلى شكله وحش و محتاج غسيل مستمر ... التكييف ضعيف فالحر و ده هشوفه لما اروح الصيانه الجايه ... طبعا التوكيل سىء لان العدد المتباع كبير و الحمد لله لاقيت الحل فيه مركز معتمد جنبى عند المطار ناس محترمه جدا جدا جدا اسمه مودرن وفر عليا مشوار ابو رواش و هتعامل معاهم عالطول .
عيوب قابلت ناس تانيه زى البويه و مشكله فى واير الفتيس و الفرامل لكن فالمجمل نصيحه للى عاوز يشترى يعمل زيى لو العربيه الى معاه مريحاه بلاش يشترى الا هو لو واثق من العربيه يعنى انا كان معايا نوبيرا 2006 شاريها من الزيرو والحمد لله مكنش فيها اى مشاكل و كنت محافظ عليها لما فكرت اغير عشان اركب اوبشن اعلى قولت لنفسى بعد ماسالت وشوفت العيوب و المميزات ان ممكن يطلعلى عيب من الى حصل لكن انا شوفتها عيوب بسيطه واى عربيه فيها عيب لكن بنسب طبعا وانا شفت المميزات قصاد العيوب بالسعر و الشكل ده قلت اتوكل على الله و اشترى والحمد لله مبسوط بيها جدا جدا جدا ...
ده تقرير بما يرضى الله للى كان بيسألنى عن العيوب يارب اكون قدرت افيدكوا