الموضوع: اشتريت اسد فرنساوى 207

شتريت 207 موديل 2007 من شهرين, ماشية 115000 كيلو, مانيوال و فول اوبشن "أعلى فئة" فيها مثلا تكيف dual zone, فتحة سقف, حساسات ركن, ........

ا/حسام HOSSAM99 عمل معايا واجب جامد و قالى اكشف عليها فين و كدة
كشفت فى توكيل غمرة و طلعت محتاجة صيانة كاملة (سيور و فلاتر و زيوت) و طقم دبرياج كامل و حاجات تانية بسيطة

اشتريت اغلب قطع الغيار من التوكيل و كانت رخيصة بالمقارنة بباقى الماركات الأوروبى (سيات, أوبل, ....) و حتى الفيات بونتو اللى كانت معايا و توكيلها مطلع عينى لما اشتريتها زيرو فى 2007


بعد كدة رحت محل فى التوفيقية ا/حسام قالى عليه اسمه "بديع دسوقى" اشتريت منه طقم الدبرياج (ديسك و اسطوانة و بلية) فاليو فرنساوى ب 800 جنيه (فى التوكيل بحوالى 1600) و لما سألت البياع على اسعار القطع اللى اشتريتها من التوكيل , اكتشفت ان أغلبها أغلى عنده!!!
ا/حسام قالى التفسير ان توكيل بيجو مرخص اسعار قطع غيار ال301 الجديدة علشان ينافس بيها فى السوق (اللى 207 اللى معايا فيها نفس الموتور ال1600 بتاع 301 و 307 مع فروق بسيطة و كذلك فى قطع مشتركة فى العفشة)

ركبت القطع كلها عند ميكانيكى عارفه و غيرت الزيوت كلها (شيل الترا للموتور و زيت فرامل dot4 و 2 لتر زيت فتيس)

الحمد لله العربية عجبانى جدا كشكل و خامات و ثبات على السرعات بالمقارنة بعربيات كتير نفس الفئة

مشاكل قابلتنى و حليتها:
1- العربية سخنت منى مرة على أخرها و اكتشفت ان قربة الردياتير مخرومة و اشتريت واحدة ب200 جنيه من التوكيل

2- نور الصالون و نور الفوانيس بيرعش مش ثابت, بعد البحث اكتشفت ان البطارية مهيسة و هتحتاج تتغير قريب


مشاكل لسة قدامى حاليا :
1- العربية بتسخن جامد بس فى الزحمة, و الموضوع بيزيد قوى لما اشغل التكيف
و مجرد ما تبدأ تسخن التكيف بيطلع هواء سخن بدل بارد
بعد ما غيرت قربة الردياتير المخرومة لسة مش عارف المشكلة من اية ! و دورة التبريد مش واخدة هوا !

2- استهلاك البنزين عالى قوى : 9 لتر/100 كيلو فى الطرق السريعة و 12.5 لتر/100 جوة البلد

3- الموتور بيعمل رعشة خفيفة محسوسة جوة العربية سواء ماشية أو واقفة , ممكن تكون قواعد الموتور محتاجة تتغير ؟!

4- و أنا بركن مثلا و بعمل Reverse الغيار مش بيرضى يجى , لازم اشيل رجلى من عالدبرياج و أجيب مور N و أبدا من أول و جديد !
و كمان حركة الفتيس مش مظبوطة كدة مش عارف اوصف بس كأنى بحرك عجينة , حركته تقيلة و الحارات مش واضحة

5- فى عندى 2 حساس parking sensor بايظ, تمن الواحد فى التوكيل 400 جنيه تقريبا و مش موجودين عند "بديع دسوقى"!

6- علامة الأسد الأمامية و الخلفية عندى مسروقين و مبوظين شكل العربية, العلامة الامامية فى التوكيل بحوالى 400 جنيه مش عارف ليه!!! و الخلفية ب140 تقريبا, و طبعا ممكن يتسرقوا اول ما أغيرهم, و مش موجودين برضو عند "بديع دسوقى"
اشتريت علامة صينى من التوفيقية ب7 جنيه بس مطلعتش نفس المقاس. هلاقيهم عند مين؟؟؟!