الموضوع: بيجو ٥٠٨ و لا سيفيك ؟

انا مركبتش دى ولا دى الحمد لله لانى لو ركبتهم هبقى حاقد على الوزة اللى حيلتى
بس هو فى حركة ابتدت بيجو تعملها انها بترخص قطع الغيار فى التوكيل بطريقة ارخص من المحلات فأنا مش عارف اقولك دى او دى ويارب باقى الاعضاء يفيدوك
تقبل مرورى

عزيزي أنا كنت محتار زيك
فية سيارات كتيرة محترمة في السوق
وطبعاً ال ٥٠٨ والسيفيك علي رأسهم

متدورش علي عربية علي قد فلوسك
الاول شوف انت محتاج سيارة في أي فئة
- بناءً علي سنك وشخصيتك وحالتك الاجتماعية -
وبعدين شوف اية أحسن سيارة كقيمة مقابل السعر في الفئة دي

لو عايز سيارة صغيرة فكر في ال٣٠٨ والرابيد وال٣٠١ والابيزا والسيتي
لو عايز سيارة متوسطة فكر في الاوكتافيا والليون والجيتا والسيفيك والفلوينس وال بي أم ٣
لو عايز سيارة كبيرة فكر في السوبريب وال٥٠٨ والباسات والهوندا أكورد والبي إم ٥

معني كدة إن لو عاوز عربية متوسطة قدامك الاوكتافيا و السيفيك
بس أنا شايف إنهم غاليييييين مقابل قيمتهم
العربيات دي مفروض متعديش ١٨٠ ألف ( دة رأيي )

ولو عاوز عربية كبيرة قدامك حالياً ال ٥٠٨ وبس
السوبريب ممتازة بس لسة منزلتش ومش عارفيين سعرها هيكون كام
بس أكيد هيعدي ال٥٠٨ لأن الاوكتافيا نازلة بسعرها تقريباً

ال٥٠٨ تتقارن بالهوندا أكورد مش بالسيفيك
ودول فعلاً مع الشيڤرولية ماليبو كانوا اللي بختار منهم لما كنت بشتري (في السعودية )
- مع ملاحظة إن ال٥٠٨ فيها ميزة جبارة وهي إن موتورها ١٦٠٠ وممكن أنزلها مصر -
بس قلت أنحي الميزة دي جانباً، مين عالم هنزلها ولا لأ، المهم السيارة كقيمة وآداء
خاصة إن الثلاث سيارات بنفس السعر تقريباً
المهم أجرت الأكورد والماليبو يومين وكانوا زيرو وجربت ال٥٠٨ في ٣ معارض

نيجة التحربة بكل أمانة
ال٥٠٨ هي الأقوي والأمتن والأجمل والأفضل في التعليق والفرش الداخلي والتوجية والتسارع الرهيييب

بعد الإستخارة - ولله الفضل كلة والحمد - إشتريتها، في مايو الماضي وعامل بيها حتي الأن ١٢٥٠٠ كيلو
ال allure وفيها الآي درايف
أنا كنت عامل موضوع قبل مشتريها موضح فية المواصفات بالتفصيل

بعد تجربة ٦ شهور السيارة ممتازة وأنصح بها كل من يريد سيارة كبيرة أو متوسطة
لإن سعرها بإختصار سعر السيارات المتوسطة

حالياً ال٥٠٨ هي أفضل سيارة مقابل قيمتها في مصر كلها
مش تحيز لإني إشتريتها بس لإني فعلاً حاسس إني راكب بي إم ٥ أو مرسيدس ٥

المشاركة الأصلية كتبت بواسطة psycholain

انا لو مكانك بدون تفكير بيجو 508 بس الحاجة الوحيدة اللي ممكن تقلقني البنزين 95 و ليس اعادة البيع و عندى دايما رأى اركب اللي يعجبك مش اللى يعجب الناس لما تيجى تبيع ، استمتع يا باشا انت دافع قرب الربع مليون متفكرش خالص في البيع العربية وهمية

اللي مشجعني كمان إن في التوكيل قالوا لي إن من موديل ٢٠١٣ و الموتور بيشتغل ببنزين ٩٢

المشاركة الأصلية كتبت بواسطة sherifffff

نيجة التحربة بكل أمانة
ال٥٠٨ هي الأقوي والأمتن والأجمل والأفضل في التعليق والفرش الداخلي والتوجية والتسارع الرهيييب

بعد الإستخارة - ولله الفضل كلة والحمد - إشتريتها، في مايو الماضي وعامل بيها حتي الأن ١٢٥٠٠ كيلو
ال allure وفيها الآي درايف
أنا كنت عامل موضوع قبل مشتريها موضح فية المواصفات بالتفصيل

بعد تجربة ٦ شهور السيارة ممتازة وأنصح بها كل من يريد سيارة كبيرة أو متوسطة
لإن سعرها بإختصار سعر السيارات المتوسطة

حالياً ال٥٠٨ هي أفضل سيارة مقابل قيمتها في مصر كلها
مش تحيز لإني إشتريتها بس لإني فعلاً حاسس إني راكب بي إم ٥ أو مرسيدس ٥

أشكر حضرتك جداً علي التفصيل...فعلاً الأوكتاڤيا و الهوندا سعرهم مبالغ فيه..أنا رحت إتفرجت علي ال ٥٠٨ و فعلاً العربية مبهرة و كل الناس بتشكر فيها و واضح إن بيچو بتحاول تستعيد أمجادها بالعربية دي ..فعلاً أنا مقتنع إنها أفضل قيمة مقابل السعر في السوق حالياً ..
علي العموم أنا قدامي حوالي ٣ شهور لحين توفر السيولة و تقريباً أنا مقتنع تماماً بال ٥٠٨ ..كده فاضل الإستخارة لحين عملية الشراء

المشاركة الأصلية كتبت بواسطة leitosr

أولا أهلاً بيك أستاذ عمرو,,
بالنسبة لسؤالك عن عفشة العربية وقولك


أحب أقولك إن دي أساطير مالهاش أساس من الصحة,, زي ما معظم ثقافة شعبنا إن الاوروبي قطع غياااره نار ومعقد وكله حساسات.!
واللي يركب أوروبي أو يشوف أسعار قطع غيارة مقارنة بالكوري والياباني هيعرف إن كل الكلام اللي بيتقال دا وهم,

هديك مثال علي موضوع العفشة, ممكن تركب بيجو ٤٠٦ أو ٤٠٧ موديلات ٢٠٠٤ ل ٢٠٠٧
وتنزل منهم تجرب السيفيك نفس الموديل وتحكي أنت بنفسك ساعتها عن فرق الراحة والثبات,, وهتعرف أنهي عربية فقطت قيمتها وأتبهدلت عفشتها أسرع,, وهيكون الفرق لصالح البيجو,,

مثال تاني علي موضوع العفشة بس دا أبعد شوية, البيجو ٥٠٤ و ٥٠٥ موديلات ٨٠ واهر السبعينات,,
لو ركبت حاجة منهم أنهارده وهيا بقالها أكتر من ٣٠ سنة شغالة علي الطرق المصرية الغير أدمية دي,, هتنزل موهوم من الراحة اللي هتحس بيها في العربيتين دول, ومش هتصدق أنهم أريح من عربيات التسعينات والالفينات.

دا بغير أن مفيش موتور ياباني ولا كوري في نفس عمر مواتير البيجو,, يعني ال ٥٠٤ لحد أنهارده شغالة علي الطريق السريع ما بين القاهرة لأسكندرية والعكس,, بتقطع أكتر من ٣٠٠ كيلو يومياً, موتورها بيدور من أول تكة,, سحبها عامل زي الفراشة وممكن تلاقيها بتشد جنب عربيات جديدة وبتطلع عليهم لو صاحبها أيده فيها, الكلام دا ينطبق علي ال ٥٠٤ وال ٥٠٥ اللي نزلو بمواتير المليون كيلو,,
واللي مفيش مواتير موديل سبعينات في يومنا هذا بيطلعو نفس عزم وأداء وسحب مواتير البيجو,,

والبيجو ال ٥٠٨ مع زمايل لينا هنا منهم إسلام elanor وممكن يفيدك أكتر عنها وعن أدائها مع المطبات في الصعيد,
وطبعاً أستاذ شريف تكلم عنها باستفاضة أكتر مني,, بس هوا مش أول واحد يأكد أنها في فئة العربيات الفئة الخامسة من بي أم دبليو, أو المرسيدس أي كلاس,, معانا هنا أستاذ masaken معاه بيجو ٥٠٨ و بي أم ٥٢٥ وقال إن الاتنين نفس الثبات والراحة وأنه محسش بأي فرق بين العربيتين ومستمتع في البيجو, ممكن ابقي أجيب لك لنكات مشاركاته
ومن هنا بنقول إن البيجو ثفقة أقيم وافضل مقابل المبلغ اللي هيدفع فيها والتجهيزات اللي بتنزل بيها واللي أعلي من السيفيك,,

بالنسبة لسعر أعادة البيع, زي ما قال أستاذ psycholain أنك المفروض تستمع بالعربية اللي هتعجبك وتشتريها لأنك دافع قرب الربع مليون,
وأزود لك حاجة علي الكلام دا,, بعد ال ٥ سنين مثلاً لما تفكر بالبيع, العربية اللي فيها كماليات أكتر وأوبشن أكتر بتمسك سعر أحسن في السوق عن العربيات اللي مفهاش كماليات كتير,,
لأن كدا كدا بيكون نزلت كماليات أجدد وأعلي كمان ٥ سنين في كل العربيات زي الاوتو باركنج مثلاً,
اللي أقصده إن المستهلك ساعاتها بيدور علي العربية اللي هتدي له مواصفات أعلي بالمبلغ اللي هيشتري بيه مستعمل,, وساعتها البيجو هتمسك سعر كويس وفي رينج السيفيك إن مكانش أعلي منها,,

العربية من رأيي ممتازة جداً, وأفضل عربية ممكن تشتريها في رينج السعر اللي انت بتفكر فيه,,

نصيحة مني حاول تجيب تاني فئة منها علي الأقل عشان تستمتع بيها لأطول فترة ممكنة ومتحسش أنك ناقصك حاجة بعد ما تدفع المبلغ دا في عربية.

وبالتوفيق في الشراء.

أشكر حضرتك جداً...و فعلاً إحنا عندنا مشكلة في مصر إن الناس بتفتي و خلاص ماينفعش حد يقولك ماعرفش..كل ما أستقر علي عربية و أقعد مع حد يفتي و يطلع القطط الفاطسة ....
شكلي كده رايح لل ٥٠٨ إن شاء الله

المشاركة الأصلية كتبت بواسطة wael61

انا مركبتش دى ولا دى الحمد لله لانى لو ركبتهم هبقى حاقد على الوزة اللى حيلتى
بس هو فى حركة ابتدت بيجو تعملها انها بترخص قطع الغيار فى التوكيل بطريقة ارخص من المحلات فأنا مش عارف اقولك دى او دى ويارب باقى الاعضاء يفيدوك
تقبل مرورى

يا باشا ربنا يرزقك الأحسن منهم إن شاء الله