من صغري و أنا مهوس بالعربيات. أنا عشت في السعودية كتير و تقريبا سوقت كل الموديلات الجديدة من أول 2011 لحد دلوقتي في فورد و كيا و هيونداي و نيسان و بيجو و تويوتا الخ... test drive طبعا لا أحسن تفتكروا اني عند كل الماركات دي :D
أول عربية اشتريتها هي الفورد فوكس 2012 سيدان و أول عربية سقتها كانت الفيرنا, طبعا مفيش مقارنة لكن لتوضح الأمور فقط.
اخويا من كام يوم -ربنا يباركله فيها - جاب كيا سيراتو الشكل الجديد موديل 2014 الفئة التالتة EX Full Option. و طبعا لاني شخص فضولي جدا خصوصا لما يبقى الكلام عن العربيات, فـأنا سقت العربية مسافات كبيرة, عملت 500 كيلو في أول يومين بيها و هو طبعا هيتجنن بس سايبهلي برضو لانه ميقدرش ينكر الجميل و خصوصا إن أنا اللي علمته السواقة و على الفورد كمان.
سيبكم بقى من الرغي ده و نخش في الموضوع, أنا هكون سريع جدا في المقارنة و هتبقى في شكل نقاط, و ده طبعا وجهة نظري أنا ممكن بل أكيد في ناس هتختلف مع كلامي. اليكم مزايا و عيوب كل عربية.
ميزات العربية:
1- ثابتة على الطرق السريعة.
2- مريحة في المسافات الطويلة.
3- الهاندلينج بتاعها ممتاز و أحسن كمان من الجيتا و الاوكتفيا و عن تجربة.
4- صوت السماعات فيها نقي جدا.
5- انورها هادية جدا و شيك بليل.
عيوب العربية:
1- الجير الجديد اللي طورته فورد "Dual Clutch" محتاج لسة تظبيط كتير أكيد في الموديلات الحديثة 2013 و 2014 اشتغلوا عليها. في تردد في نقل الجير من الأول للتاني كده بتاع ثانية أو ثانيتين و بتحس برجة خفيفة لو ماشي على سرعة بطيئة بين الجير الأول و التاني بسبب تردد الجير يفضل في الأول ولا ينقل للتاني.
2- صوتها عالي لما بتجري. و لكن ده طبيعي في العربيات الامريكان مع إنها معمولة في ألمانيا, لكن الماركة تحكم برضو. زي مابيقولوا "American Muscle" و كده.
3- التوكيل حرامي في قطع الغيار.
4- التوكيل حرامي حتى في الكماليات بتاعة العربية, يعني الفئة التانية بتاعتي تقريبا مفيهاش أي كماليات غير السنسور اللي ورا. غير كده الكماليات كلها موجودة في أعلى فئة اللي هي معدية ال 200 ألف جنيه دلوقتي. الفئة التانية بره مصر بتنزل بـ فوج لايت و تكييف اوتوماتيك و 6 سماعات بدل من 4. يعني لو بتحب الكماليات أكتر يبقى تخليك في السيراتو الشكل الجديد 2013/2014 "عربية تحفة و أحسن كتير من الشكل القديم و كمالياتها محترمة في سعر و معقول بـأمانة لو كانت نزلت في 2012 كنت جبتها بدون تردد بدل الفوكس.
5- مساحتها, بالرغم إنها في نفس حجم الالانترا و السيراتو لكن التابلو واخد مساحة كبيرة جدا من العربية و مقصر في حق المساحة اللي ورا اوي, الالانترا و السيراتو اوسع كتير.
6- التكييف أي كلام.
ثانيا: كيا سيراتو الشكل الجديد
ميزات العربية:
1- العربية ناعمة جدا على الطريق.
2- مريحة على الطرق السريعة.
3- الإنتقال بين السرعات في الاوتوماتيك سريع و مفيهوش تردد يذكر.
4- واسعة جدا من جوه و مساحة كبيرة في الخلف و المسافة بين الرأس و السقف كويسة.
5- هادية و هيا بتجري, تقريبا ملهاش صوت.
6- تكيفها قوي جدا ما شاء الله.
عيوب العربية:
1- العربية تبدأ تتهز عند سرعة 160 كم/س و متبقاش ثابتة زي الأول خالص, بس ده لا يمنع إنك ممكن تسيطر عليها لكن هتحس إنها طايرة مش ماشية على الأرض.
2- الصاج ضعيف مقارنة بالفوكس, لكن أقوى من الهيونداي عامة.
3- قطع غيراهـا تعتبر غالية نسبيا لعربية معمولة في كوريا.
4- العربية بترجرج شوية و هي واقفة و التكييف شغال.
5- سعرها غالي جدا في الوقت الحالي مقارنة بالعربيات اللي في نفس الفئة , يبدأ من 148 ألف للاوتوماتيك و مفيهاش أي حاجة غير ايرباج واحدة.
المقارنة في النقاط المهمة:
1- الثبات على السرعات العالية.
الفائز: الفوكس
2- الكماليات و الجاذبية من الداخل و قوة التكييف:
الفائز: سيراتو
3- أسعار قطع الغيار:
الفائز: سيراتو
4- الهدوء و الراحة:
الفائز: سيراتو
5- المساحة:
الفائز: سيراتو
6- الاستمتاع بالقيادة:
الفائز: الفوكس
7- الهاندلينج و التحكم في السيارة بشكل كبير:
الفائز: الفوكس
8- قوة الصاج:
الفائز: الفوكس
9- سعر اعادة البيع:
الفائز: سيراتو
10-توفير استهلاك الوقود:
الفائز: سيراتو
يعني من الآخر لو أنت واد سويق و بتحب تجري و تتحكم في عربيتك بكل قوة يبقى الفوكس هي افضل اختيار. لكن لو أنت عايز عربية شيك و مريحة و كمالياتهـا كتير و واسعة و تجري معاك برضو و تقضي بيها مشواريك يبقى خليك في السيراتو. و في الحالتين أنت فايز في أي اختيار "Win-Win Situation" أنت و ذوقك بقى.
أتمنى اني أكون افادتكم و ارحب بجميع التعليقات :)
