3 شهور مع السيينا

**megoghanem** · 12-09-2008 11:46 PM

سلامو عليكو
أولا أحب أقولكوا رمضان كريم وكل سنة وانتوا كلكوا يارب بخير وسعادة

ثانيا .. حبيت أعمل مشاركة أوضح فيها وجهة نظرى (الشخصية جدا) بالنسبة للعربية السيننا بعد حوالي 3 شهور من امتلاكي لها و التجربة اللى كانت ومازالت فعلا ممتعة وياريت من باقي الأعضاء المالكين لها (ذوى الخبرة) يعلقوا على الكلام ده لأنها ممكن تكون ظروف خاصة للعربية نفسها ومايكونش كلام عام

عامة دى أهم المميزات والعيوب والملاحظات عليها بالنسبة للفترة القصيرة دى

المميزات:
بصراحة العربية دى فى ركوبها ما حصلتش .. حاجة كده ما شاء الله زى الكورولات الجديدة وصدقوني فرق كبير جدا بينها وبين الكورى خالص مستوى أعلى لأنى جربت قبل كده الهيونداى الاكسيل والاكسنت واللانوس (1 و 2) والبرايد وحتى الاتوماتيك منه مفيش مقارنة خالص لا فى النعومة ولا متعة القيادة ولا حتى فى شكل التابلوه والدركسيون وأناقة العربية بشكل عام (مع بعض الألوان بتفرق جامد زى النبيتى والكحلى) ..
عزم العربية جيد وبتجمع سرعة وسحبها ممتاز والباور بتاعها كويس إلى حد كبير (أحسن من باور الهيونداى والدايو على الأقل) والشنطة واسعة جدا فوق العادة والصالون مش بطال ..
وكمان العربية ارتفاعها كويس بالنسبة للمطبات (حتى مع المطبات المؤذية البلدي بس تعديها براحة خالص) حتى لو محملة وده مالوش تأثير كبير على ثباتها لأنها تقيلة بشكل عام وثابتة جدا فى السرعات العالية (لحد 140 ما بتحسش بيها)
.. بعض الناس كانت اشتكت من الحرارة لكن انا ملاحظ العكس تماما ومش هاتصدقونى ان قولتلكم ان العداد معداش النص نهائي نعايا طول الفترة اللى فاتت (بسم الله .. الله أكبر) ده حتى بتشلنى ساعت التسخين خاصة الصبح لأنها بتقعد فترة طويلة وأنا خلقي ضيق وغالبا باطلع بيها بسرعة وده بيخليها تنتش فترة كده لحد ما تسخن (طبعا سلوك خاطئ انما معلش)

بشكل عام العربية ممتازة بالنسبة لسعرها فى السوق مقارنة بالكورى وما شابه

العيوب:
أول وأكبر العيوب فيها هو التكيييييييييف اللى للآسف مالوش لزمة الأيام دى .. بيبقى كويس بالليل وفى درجات الحرارة المعتدلة واللى قاعد ورا تقريبا مالوش نصيب فى الهوا الساقع (طبعا عاملي احراج مع اللى يركب معايا) .. طبعا انا عربيتى 1400 وفى ناس بيقولوا انوا مش بطال فى الـ1600 لكن صراحة مش متأكد .. بس هو أحسن بالتاكيد من البرايد والريو
فلتر التكييف برضه مش عالي الكفاءة غالبا جميع الروائح اللى فاى الخارج بتشمها وكأنك فاتح الشباك

- غطاء تانك البنزين هو الوحيد بلاستيك (مش عارف ايه الحكمة) وده بيخليه عرضة للكسر باستمرار وحصلت قبل كده ما ناس أعرفهم وبشكل مستمر .. الـ28 اللى كانت معايا قبل كده كان غطاءها صاج مش عارف ليه فيات عاملاه هنا بلاستيك!!!!!!!!!!
- طبعا قرش الملح اللى بعض العربيات تتضيع الطبخة علشانه .. اقصد طبعا الزجاج الخلفى يدوى .. كانوا كملوا جميلهم وحطوه كهربا ما كانش هايخسر كتير لكن معلش ملحوقة هو عموما خفيف جدا فى القفل والفتح انما الشكل العام بس مش حلو
- سرعة الزجاج الكهربا تشل خصوصا فى الرفع .. ممكن تدوس على الزرار وانت صغير وتستني لحد ما تكبر على ما ينقفل
- النور بتاعها مش عالي خاصة فى العالي اللى بيرمي قدام عجل العربية بشبر .. وبخصوص النقطة دى ارجو من اصحاب الخبرة نصيحتى اعمل ايه فيه انا كنت بافكر اغير اللمبات واجيب لمبات زينون اللى بحوالي 50 جنيه .. او زى ما تشوفوا

ارجو اكون وفقت فى طرح ملاحظاتي على السيينا وتقديرى العام ليها انها عربية ممتازة بغض النظر عن التكييف الأقل كفاءة وإن شاء الله لما أغير مش هايكون اللى فى الكورولا مش اقل من كده

**amrnader** · 13-09-2008 12:16 AM

المشاركة الأصلية كتبت بواسطة megoghanem

- سرعة الزجاج الكهربا تشل خصوصا فى الرفع .. ممكن تدوس على الزرار وانت صغير وتستني لحد ما تكبر على ما ينقفل

جامدة اوى الجملة دية

**yahyanaabil** · 13-09-2008 03:00 AM

عربيه محترمه بس ساعات بتعمل مواقف بايخه زى مثلا كانت مع واحد قريبى حاه يدورها الصبح ما درتش طبعا جاب ميكانيكيه كل واحد افتى فتوى لغايه ما يأس وداها التوكيل كشفوا عليها بالكمبيوتر لاقوا فى حاجه اسمها حساس الحراره كان بايظ اول ما غيروه ب180 تمنه العربيه دارت وبقت زى الفل بس هيه عربيه احلى من الدايو والفيرنا بكتيير كفايه ان فيها abs

**hazem_khidr** · 13-09-2008 06:23 AM

ربنا يباركلك فيها يا رب
السيينا من العربيات الكويسه جدا اللي مش واخده نصيبها في السوق
و افضل بكتير من اللانوس و العك دا

**megoghanem** · 14-09-2008 04:13 AM

السيينا من العربيات الكويسه جدا اللي مش واخده نصيبها في السوق
و افضل بكتير من اللانوس و العك دا

فعلا وأنا أعرف واحد بيشتغل فى العربيات دايما يقولى ان العربيتين البترا والسيينا مظلومين ومش واخدين حقهم فى السوق المصري اللى بتحكمه دايما مسلمات غريبة

**fahd_628** · 14-09-2008 05:56 AM

- سرعة الزجاج الكهربا تشل خصوصا فى الرفع .. ممكن تدوس على الزرار وانت صغير وتستني لحد ما تكبر على ما ينقفل

والله انا كمان التعليق دة ضحكنى جامد جدا :) :) :) :) :)

شكرا على التقييم المحايد

**ahmad--ezzat** · 29-09-2008 11:33 AM

دى انهى سيينا حضرتك بالظبط؟؟؟؟؟؟؟؟؟؟؟؟؟؟؟؟؟؟؟ ؟؟؟؟؟؟؟؟؟؟؟

**motoxp** · 29-09-2008 01:59 PM

اعتقد بيتكلم على سيينا 2001 او 2002 تقريبا

**Mostafa** · 29-09-2008 11:30 PM

ألف مبروك ياباشا وربنا يديك خيرها ويكفيك شرها ..

العربيه تكييفها رائع بالليل او فى السفر .. لكن هو فعلا ضعيف حبتين فى الزحمه وقت الحر الشديد (ده سببه ان فى السرعات العاليه الهواء بيبرد السربنتينه فالعربيه بتبرد والتكييف بيكون احسن كتيييير حتى لو كنت فى عز الصيف ) المهم متكونش ماشى ببظئ جوه البلد .

* موضوع الزجاج والنور بقى اعتقد انك محتاج تظبط الاتنين .. هتحتاج تظبط النور عند اى كهربائى (بس يكون عنده مفتاح النجمه بتاعها عشان ميبوظلكش الرجلاش بتاع النور)

* والزجاج ممكن يتراجع عند السمكرى ممكن تكون محشور فيه حاجه او المكنه ضعيفه

* أنا كان معايا سيينا 1400 وحاليا معايا 1600 - وفى فرق كبير جدا سواء فى الاداء او فى التكييف ..

- بالنسبه لموضوع الحراره : السيينا من العربيات الغير ثابته درجه الحراره يعنى :

* شتا او صيف صبح او ليل حر او برد على طريق سفر : الحراره بعد الصفر بشويه وده بيكون وقت احلى اداء للعربيه واحسن سحب و انا مش بستمتع بالعربيه دى الا فى السفر بصراحه.

* فى الظروف العاديه داخل المدينه : حراره عند الربع

* فى الحر الشديد بالنهار بدون تككيف داخل المدينه : عند التلت

* فى الحر الشديد بالنهار بتككيف داخل المدينه : اكتر من النص بشويه

-- بس كل ما العربيه بتكون بارده كل ما ادائها بيكون احسن

وألف مبروك ياباشا :)

**pippon** · 03-10-2008 03:45 AM

يا جماعة انا احب اعلق على الموضوع الرائع ده ..
انا عندي سيينا 1400 .. هي عربية قوية جدا ومتينة .. والتكييف على فكرة بتاعها ثلاجة بمعنة الكلمة احسن من الفيرنا والنترا .. وكمان النور بتاعها قوي .. بس اللي بيوجهني مشكلة السخونة .. وعلى فكرة مكتوب في الكتالوج بتاعها انه مش من المفروض انك تسخن العربية وهي واقفة المفروض انك تمشي بسرعات قليلة في الاول لغاية لما تسخن . وكاتبين كمان في الكتالوج انك ما تسبش العربية وهي واقفة ويكون الموتور شغال علشان ده بيزود سخونة العربية وانا جربت الكلام ده وللقيته فعلا صح . واقتصادية فعلا في البنزين . وشكرا ليكم