لانسر شارك واللا نيو سيراتو فاضيه

**Mohamedgam** · 19-10-2013 06:28 PM

الموضوع باختصار انا اشتريت شارك فاضيه ب ١٣١٠٠٠ وكان قدامي نيو سيراتو ب ١٣٨٠٠٠
المشكله ان العزل بتاع اللانسر وحش جدا والعربيه خاماتها الداخليه وحشه اوي فرش السقف نوعيه رديئه جدا تدوس عليه من ناحيه القوايم كده تلاقيه يروح ويجي معاك مش حاجه محترمه كده زي اللي كان في موديل ٢٠٠٩
مكنه الزجاج الخلفي باظت والعربيه لم تكمل ٣٠٠٠ كم المشكله ان كل الكلام ده اداني انطباع سيئ جدا علي العربيه وخلاني اققول كان المفروض اشتري سيراتو الجديده لان لم رحت اتفرجت عليها لقيت تقفيل ماشاء الله حاجه محترمه فمش عارف هل ليه حق اني اندم فعلا واللا انتو رأيكم ايه؟

**2CODE** · 19-10-2013 07:34 PM

بصراحة السيراتو الجديدة حاجة تانية شكل افخم اداء اقوي ونظام تعليق جديد زي اللي موجود في الريو

بس غريبة انا قبل ما ادخل الموضوع هنا كنت واخد انطباع كويس عن الشارك !!!!
للدرجة دي خاماتها باظت ؟؟؟؟؟

**devil_storm** · 19-10-2013 08:07 PM

اللانسر شارك طول عمرها صوت ماتورها عالي و عزلها وحش من ايام الماتور ١٥٠٠ غير قطع غيارها غاليا جدا
السيراتو الجديدة ممتازه و عربيه محترمه جدا بس فئة sx حتلاقي جوده الخامات و الفنش عالي جدا و نواكل في كل مكان تحفه تحسسك بالفخامه ... اما اول فئة اللي بتكلم عليها فخامتها وحشة جدا و كلها بلاستيك ردئ و انصحك بلاش منها
خلاصة لفي الايام اللي فاتت السيراتو تتركب sx فقط و بردو قطع غيارها غاليا جدا

**toty_305** · 19-10-2013 09:42 PM

-بالنسبة ليا كفايه الفرق في عفشة الشارك والشاسيه عن السيراتو هحس انك خسرتها لما تركب السيراتو غير كده السيراتو أروش وكل واحد واحتياجاته

**Mohamedgam** · 19-10-2013 10:25 PM

انا بتكلم في فرق التحمل مع النعومه
انا كان معايا سيفيك ٢٠٠٩ وبعتها حادثه للاسف كنت فاكر ان الشارك زيها كده في القوه مع النعومه بس الحقيقه غير كده خالص

**Dr.M_baz** · 19-10-2013 10:36 PM

الخيره فيما اختاره الله..... في الفئات الفاضيه ديه اعتقد انت مخسرتش كتير .... مش الفروق إللي انت متخيلها .

**sonybony** · 20-10-2013 01:04 AM

لا تندم فالخيره فيما اختاره الله وربنا يكفيك شرها

**2CODE** · 20-10-2013 01:10 AM

المشاركة الأصلية كتبت بواسطة toty_305

-بالنسبة ليا كفايه الفرق في عفشة الشارك والشاسيه عن السيراتو هحس انك خسرتها لما تركب السيراتو غير كده السيراتو أروش وكل واحد واحتياجاته

يبقى حضرتك مركبتش السيراتو الشكل الجديد

انا مجربتش الشارك فمقدرش احكم لكن ركبت السيراتو الشكل الجديد حاجة تانية خالص عن الشكل القديم

انت جربتها علشان عرفت ان عفشتها وحشة ؟؟؟؟؟ شكلك جربت الشكل القديم بس

والجديدة حاجة والقديمة حاجة تانية خالص !!!!!!!!!!!!!!!!!!!

**Mohamedgam** · 20-10-2013 01:41 AM

الحقيقه الشارك دي شكلي شربتها بصراحه

**toty_305** · 20-10-2013 02:25 AM

المشاركة الأصلية كتبت بواسطة 2CODE

يبقى حضرتك مركبتش السيراتو الشكل الجديد

انا مجربتش الشارك فمقدرش احكم لكن ركبت السيراتو الشكل الجديد حاجة تانية خالص عن الشكل القديم

انت جربتها علشان عرفت ان عفشتها وحشة ؟؟؟؟؟ شكلك جربت الشكل القديم بس

والجديدة حاجة والقديمة حاجة تانية خالص !!!!!!!!!!!!!!!!!!!

-الصراحة مركبتش السيراتو بس منطقيا عفشة لانسر Multi-link و بتاخد أعلى درجات في ال Reviews و شاسيه بيشيل مواتير 2.4L Mivec ...السيراتو Torsion beam يعني أخرها أيه ! هتبقى زي اي Torsion beam محترم مش زي القديم بس عمرها ما هتوصل لل Multi-link و ياباني ياباني