مأساه البحث عن شريكة الحياه للمغتربين

**hitman235** · 20-10-2013 05:36 PM

انا عضو جديد معاكم و عندى مشكله و قولت اعمل عنها موضوع يمكن يكون حد مر بنفس التجربه دى يقدر يدينى نصيحته
بأختصار ان بشتغل خارج مصر بقالى سنتين و بنزل مره واحده فى السنه اجازه مدتها شهر
انا مسافر طبعا لأسباب ماديه زى اى شاب متوسط الحال عايز يكون نفسه مكنتش بفكر فى الارتباط قبل ما اسافر لأن امكانياتى الماديه كانت ما تسمحش و دلوقتى بعد ما الوضع اتغير بقت المشكله فى انى الاقى الى يناسبنى فى الفتره القصيره دى ... انا من النوع الى فى حاله شوية و مكنتش اعرف بنات و كده فمش عارف اساعد نفسى و برضه عائلتى فى مصر مش قداره تساعدى فى الموضوع
اتعرض عليا كذا بنت نصهم غير مناسبين و ماكانش فيه قبول .....و النص التانى مرضيش بالسفر و فتره الخطوبة القصيرة او كان طلباته الماديه تعجيزية من نوع شقة فى التجمع بمليون جنيه و عربيه و دهب و معرفش ايه ....( من منطلق واحد مسافر بره يعنى المفروض معاه مفتاح مغاره على بابا )
انا دلوقتى بين مجموعه حلول اصعب من بعض اولهم انى استنى و اصبر و ده فيه مخطاره انى اعدى التلاتين و ده ناس كتير بتشوفه عيب و فى نفس الوقت هيصعب الموضوع اكتر بالاضافه ان العيشه فى الغربه مصعبه الموضوع اكتر خصوصا فى دول خليجيه مافيهاش اى ترفيه خارج اوقات العمل ...
او اسيب شغلى بره مصر و اضحى بيه و انزل مصر اقعد فى البيت لحد ما الاقى شغل و ده صعب برضه لأن الوضع فى مصر زى ما انتم شايفين و برضه ممكن ما اعجبش الى اتقدمله ماديا ...بالاضافه ان الاسعار فى مصر السنه الى فاتت زادت بصوره كبيره لدرجه انها بقت غاليه حتى على المغترب
او انى اقبل بواحده مش مقتنع بيها تحت ضغط انها راضيه بظروفى و قابله تعيش بره مصر بس ساعتها معرفش هبقى مبسوط بالوضع ده ولا لأ.... و انا مريت بتجربه خطوبة قبل كده استعجلت فيها بسبب ضيق و قت الاجازه و ماكانتش عن اقتناع اوى و استمريت سنه كامله مش مبسوط فى الاخر انتهت بالفشكله ....

ياريت اى حد عنده نصيحه او مر بتجربه مشابها يفيدنى ....

**abou-yahia** · 20-10-2013 05:49 PM

مبدئيا كل بديل من اللي حضرتك ذكرته ليه تكلفته

الوحيد اللي عارفها ويقدر يعرف انسبهم ليه حضرتك

مبدئيا السن مش عيب خصوصا للراجل المهم لما تبدء تكون واقف علي ارضيه صلبه ماديه واجتماعيه ونفسيه خصوصا ان فكره الجواز نفسها بتكون اتبلورت مع مرور الوقت في ذهنك

حضرتك لازم تحدد انت حتكمل في الغربه ولا فيه هذف اول لما يتحقق حترجع (كأنك مثلا تحوش مقدم شقه )

ايه مصاعب الغربه معاك

خلي بالك الترفيه اللي حضرتك مستصعبه وشايف حله زوجه معاك حيحللكجزء من المشكله وحيوجد مشاكل تانيه اكتر

ذي زياده العبء المادي وزياده العبء النفسي لزوجه معندهاش اي وسيله ترفيه غير انها قاعده محبوسه وبعيد عن اهلها طول النهار ولمده طويله وخصوصا في اول الزواج .

شوف انت عايز ايه من الدنيا

فكر وحدد واستخير وربنا ان شاء الله يهديك للخير

**saddam** · 20-10-2013 09:03 PM

صديقي المواطن
مفيش داعي للإستعجال والمناسب حاليا الزواج للرجل في مصر بعد ال 32 يكون هدي وتمتع بالحكمة وإبتدى يعرف يجيب الفلوس منين وتقل سيطرة أمه عليه وباباه يبتدي يفكر يحترمه وكل مشكلتك قلة المعروض عليك
وبما إنك عندك أوقات فراغ فلو إنت جاد ولا تلعب ببنات الناس وتدخل البيت من بابه
فخش الموقع ده وحتدعيلي ولكن شعار المرحلة الصدق ومتزعلش لو كذا بنت صدقت معاها ورفضتك
وبالتوفيق وإلى اﻷمام
ومن نصر إلى نصر
ودمتم للنضال
مـودة . نت - موقع زواج عربي مجاني اسلامي

**أحمد كمال** · 20-10-2013 11:16 PM

وصولك التلاتين لا يعيبك في شئ

جوازك من واحدة رافضة السفر مالوش لزمة .... اوعى تعمل زي اللي متجوزين بالبلوتووث دول هو في بلد و هي في بلد عشان ما تقدرش تبعد عن "مامي"

لو بنت مش عاجباك ما تعصرش على نفسك لمونة ده مش جاكيت و لا قميص مش عاجبك هتلبسه لبستين تمشية حال و تقلبه

لو بنت من اولها مادية ....... اقلب ...... خليها تصدي جنب الحاج غير ان اصلا طبع العين الفارغة و طبع المقارنة مع صاحباتها و قريباتها يدل على دناءة مالهاش حل اساسا .....

ما تسيبش شغلك ...... تبقى مجنون لو سبت شغلك

اخيرا و ليس اخرا ممكن تدور في بنات الجالية المصرية في بلدك (او غير المصرية ....... انت خسران ايه؟؟؟)

**mr_vampire** · 21-10-2013 12:14 AM

نفس الماساة بتاعة كل المغتربين.
ممكن علي ماتنزل تبقي الحاجة او اخواتك البنات محضرينلك كذا بنت تشوفهم . ً وممكن برده لو معارف او جيران او زوجات اصحابك.

ولو بعد ده كله برده محصلش يبقي ربنا لسة مازنش بقي ولسة نصيبك مجاش.

انما تسيب شغلك وترجع عشان مش عارف تتجوز او عشان البنت مش عايزة تتغرب عن اهلها ده الجنان بعينه.

سيبها لله وتوكل علي الله وانوي لله انك عايز تتجوز وخليها زي ماتيجي بقي.

**fares_311** · 21-10-2013 12:19 AM

السلام عليكم

بص انا مش حقولك تعمل ايه بس حديلك شويه نقاط وانت على اساسهم تقرر:

- موضوع السن ده عادي جدا ولا في الدماغ يعني مش مهم تتجوز على 30 علشان كلام الناس لأ انت تتجوز لم تلاقي الانسانه اللي تعجبك وتناسبك ومخك يجي على مخها وكده يعني مش علشان وصلت لسن الجواز لازم تتجوز

- حكايه انك من النوع اللي في حاله وكده برده عادي انا كنت زيك بس لم حسيت ان دي الانسانه المناسبه ليا وكنت متأكد انها حتكون زوجتي كلمتها كل حاجه عادي جدا فإنت نفس الحاجه لم تلاقي الواحده المناسبه لوحدك حتعرف ان هيا دي وحتلاقي نفسك بتتصرف وبتتعامل فمتقلقش

- سيبك من موضوع البنات اللي بتتعرض عليك وسيبك من ان الحاجه او حد من قرايبك يشوفلك ... لازم انتا اللي تختار وتكون مقتنع علشان دي جوازه العمر ان شاء الله

- وسيبك من اللي مترضاش بالسفر علشان انتا اكيد عايز تتجوز علشان تعيش معاك مش تقضوها مكالمات وكمان سيبك من الناس اللي تحس ان عينهم فارغه او طلبات مبالغه يعني فيه ناس محترمه وكل حاجه بالمعقول

- اوعى تسيب شغلك وتنزل مصر

- بص نصيحتي ليك انك تصبر شويه لحد ما تلاقي واحده مناسبه لكل الكلام اللي قلناه وبقولك تاني موضوع السن بالنسبه للراجل عادي جدا ده انتا محسسني انك عندك ميت سنه يا راجل

ربنا يوفقك

**Survival** · 21-10-2013 12:33 AM

يا عزيزى لا تقلق دا حال كل المغتربين و اللى مش مغتربين انك تلاقى نصيبك بياخد وقت اهم حاجة الاستخارة - لما نصيبك يجي هوبا هتلاقى نفسك متجوز.

**samyyousef** · 21-10-2013 12:47 AM

مشكلتك ليس لها علاقة بعملك بالخارج...حتى لو كنت تعمل في مصر كنت ستواجه من لها طلبات مادية مبالغ فيها و من لا تقبلها و هكذا
فاصبر و ابحث

-

الموضوع: مأساه البحث عن شريكة الحياه للمغتربين

LinkBack

أدوات الموضوع

عرض

-

-

-

-

المواضيع المتشابهه

7مميزات يفضلها الرجل في شريكة المستقبل

مأساه صغيره

مأساه الجمب اليمين!!

الكلمات الدلالية لهذا الموضوع

المفضلات

المفضلات

ضوابط المشاركة