الموضوع: نيسان صني الشكل الجديد..... ممتازة

يا جماعة لازم كل اللي شايف ان عربيته النيسان الصني الشكل الجديد فيها ميزة ما يذكر لنا الميزة ...

انا عن نفسي شايفها ناعمة جدا ... و الباور جامد جدا و انعم من الشكل القديم بكتير

المشاركة الأصلية كتبت بواسطة grumby78

مزايا العربيه ياسيدي كالاتي :
- اولا سعرها بنتكلم في الفئه الاتوماتيك بتاعتها حوالي 114000 جنيه وده تقريبا اقل من السيارات الاخرى في فئتها - سيدان اتوماتيك اقتصاديه - من 10000-14000 جنيه فرق .
- سعر اعادة بيع ماسك نفسه جدا يعني لما تفكر تبيعها لاي سبب مش بتخسر كتير وكمان المستهلك المصري مش بيخاف منها زي عربيات تانيه فرنساوي او ايطالي . النقطه دي مهمه للناس اللي بتغير عربيات بصفه دوريه . يعني حتبيع بسعر كويس وبسرعه .
- عربيه ياباني . تتجمع في مصر او تتجمع في الهند او بلاد ماوراء النهر فهيا ياباني الماركه . واعتقد ان صناعة السيارات تخطت موضوع بلد التجميع والقطع جايه منين والكلام بتاعنا ده . ده ماليزيا بتصنع سياره -بروتون - ولها سعر وبتبيع في مصر ولولا توكيلها -عز العرب - سيء السمعه كانت حتكتسح برضو عشان سعرها مناسب .
- عربيه بتشيل 5 افراد بالغين -بالسواق - مرتاحين وبدون ماتحك في اي مطب فيكي يامصر ودي مشكله عربيات مميزه كتير في مصر . يعني انا مش جايب عربيه عشان معديش مزلقانات او في طرق معينه ممشيش فيها عشان المطبات والنقر اللي ملت الشوارع .
- محرك هادي جدا وتكييف ممتاز واستجابة العربيه كويسه جدا وبتتحسن بشكل ملحوظ بعد 5000 كيلو .
- استهلاك بنزين ممتاز . انا عن نفسي مش بسيب المؤشر يقل عن النص ومع كده فهيا موفره ومش بتحسسني ان البنزين عبء في الاستهلاك سواء داخل المدن او السفر . ودي انا حسيتها مقارنة بالشكل السابق اللي استهلاكه اكبر بشكل ملحوظ .
- الثبات كويس لحد ال 140 . فيه ثبات احسن ايوه اكيد بس بسعر اعلى . قيادتك سريعه على طرق السفر يبقى العربيه دي مش ليك . جيب عربيه اغلى = ثبات اعلى .دي عربيه اقتصاديه وكمان عربية مدينه في رأيي .
-الفرامل كويسه جدا وعمري محسيت بمشكله فيها - في ناس اشتكت من موضوع ان مشوار الدواسه طويل شويه لحد ماتربط - لكن انا محسيتش بكده . لكن ككفاءة الفرامل وال abs ممتازه وبتكلبش العربيه وتسعفك في الطرق السريعه جدا .
- مساحة شنطه في رأيي كبيره جدا وفي السفر وتحميل الشنط وحاجات الاطفال ممتازه جدا . وبدون اي مشكله في المطبات مع اي تحميل .
باور العربيه حرير ومش محتاج تعليق عشان الباور الكهربا مجرب قبل منها في التيدا بون اي مشاكل لكيلوات كتيره جدا.
- نظام سمعي نقي بدون تشويش حتى مع تعلية الصوت .
- توكيل سمعته محترمه بين توكيلات مصر اللي مليانه بلاوي وظلمت معاها عربيات ماركاتها عاليه جدا . يعني عز العرب بهدل ستروين وبروتون ودودج و اوماترا ظلم فيات واباظه مع بيجو وفي اسكندريه هنا 3 مركز صيانه 2 منهم يعتبروا داخل البلد ودي ميزه كبيره جدا بالنسبه ليا ولكل سكندري . معاملتهم محترمه ومش بيقاوحوا مع العميل . ووجود اكتر من مركز خدمه عامل تنافسيه بينهم .
- عوامل الامان فيها مش بيستغلوها 3 فئات من العربيه وكلهم بتجهيزات سلامه وامان من ايرباجز اماميتين و abs وغلق اتوماتيك للابواب مع السرعه اساسيه في فئاتها الثلاث
- كشف الطريق واضاءه الفوانيس الاماميه ممتازه والقياده الليليه بلا مشاكل .
- ايموبلايزر ودي ميزه مهمه في ظل السرقات المنتشره بين العربيات الكوري اللي بتكسر ال 120000 بدون هذه الميزه المهمه جدا .
- ممتعه في القياده ومبحسش اني تعبان او مجهد بعد قيادتها لمده طويله وزواياها واضحه ومراياتها كاشفه ابعادها ومن ورا شنطه مش كبيره في الشكل الخارجي ودي ميزه في الركنه ومع ذلك كبيره جدا من جوه .
- بالنسبه ليا اسم نيسان حاجه محترمه عالميا وقدمتلي عربيه بسعر مناسب جدا . اللوجان المغربي بقت بحوالي 100 الف اللي معليهاش جمارك وكانت من كام سنه اول ماطرحت للمانيوال حاجه وستين الف تقريبا .
دمتم بصحه

مفيش حاجة تانية ممكن تتقال.....يسلم فومك.....قولت المفيد.....وهزود من عندي.....العربية بجد تحفة ومع الوقت تحس إنها صاحبتك.....صالون واسع وباور حرير وشنطة بتشيل فيل.....واللي عاجبه العربية وداخل يبوظ سمعتها علشان عربية تانية أحب أقوله ابعد ياد من هنا