حل مشكله تركيب السماعات الخلفيه

**hanyelwaly2010** · 13-09-2008 02:45 AM

بالنسبه للافيو و النيسان وعربيات اخري مكان السماعات الخلفيه ضيق مما يجعلك ترضي بكلام ألي بيقول نقطع في الصاج لاكن هذه مشكله في حد زاتها انا نزلت انهارده و اطقست عن الحوار ده و كانت النتائج كلاتي:
1 عند التقطيع في الصاج و تركيب السماعات الجديده الصوت هيسمع في الصاج و مش هيبقا واضح

2 في حاجه بتتركب تحت السماعه بترفعها 8 سم و دي سعرها 35 للسماعتين{بلاستيك}

3 في حوار تاني بيتعمل عشان يرفع السماعات بس دا غالي ب 120 جنيه واحد ألي عليه في شارع دمشق بس مشعارف شكله عامل ازاي بس خايف يكون زي البلاستيك الي ب 35 جنيه بس عنده غالي ب 120 جنيه

انا حبيت اعمل الموضوع ده عشان الاعضاء الكرام و اعرض نتائجي عند محلات كتير رحتلها
و حرام نقطع في صاح العربيه بس في حوار الرفع ده ميزه انه عندما تبيع العربيه و عاوز السمااعات ممكن تاخدها بسهوله و في نفس الوقت حافظت علي العربيه

و شككككككككككرراااااااااااا اااااااااااااااا

**محمد فريد** · 13-09-2008 02:55 AM

ياريت صور الحاجات اللى بتقول عليها
والعلايات دى بتتباع فى محلات الاكسووارات ب 10 جنيه بس -
فيه حاجة حبيت اقولها
الناس اللى بتسوق بخشونيه مينفعش معاهم الحلول دى عشان من اول مطب هيلاقى السماعتين فى حجره لازمهم معاملة حنينة فاهمنى طبعا

**hanyelwaly2010** · 13-09-2008 03:19 AM

فاهمك طبعا بس انا لسا ماجبتهمشي اول ما هاجبهم هارفع صورهم علي طول
بس انا هخلي الراجل يربطهم جامد جداااا عشان كل خروجاتي بال افيو فيها غرز و اكيد ساعات بالبس مطباط

بس خايف يكونو بيمصلحوا عليا وتكون فعلا هيا هيا الي ب عشره جنيه

**محمد فريد** · 13-09-2008 04:05 AM

طب ما كدا بالعلايات دى الصوت مش هيطلع خالص عشان الشنطة بتخلى الصوت يرن ويرجع اعلى انما كده الصوت مش هيرن وهيبقى ضعيف
ممكن تشيل الرف اللى ورا بالغطيان اللى عليه وتوسع فى الفتحة المدورة على قد السماعتين البيضاوى مكان المدورة وتركب سماعاتك عادى وتثبتهم كويس بمسامير وتحت السماعة (حوالين الفتحة) تحط عازل لزق دبل فيس عشان الاهتزاز وبعدين ترجع الرف مكانه تانى ولا كأنك عملت حاجة ولا حد هيعرف انك مركب سماعات كبيره

ثانيا عشان لما تحب تبيع العربية هاتجيب جوز سماعات صينى من ابو 40 جنيه بيضاوى وتركبهم مكانهم

**hanyelwaly2010** · 13-09-2008 04:48 AM

شكرا علي الرد الممتاز ده بس تعرف حد في مصر الجديده بيعمل الكلام ده

**nader makram** · 13-09-2008 12:54 PM

المشاركة الأصلية كتبت بواسطة hanyelwaly2010

1 عند التقطيع في الصاج و تركيب السماعات الجديده الصوت هيسمع في الصاج و مش هيبقا واضح

مين اللى قالك كدة انا مقطع فى الصاج بتاع اللانسر 2007 عشان اوسع للسماعات و الصوت تحفة المهم واحد نضيف هو اللى يعملهالك انا عملتها عند كلاريون احمد عرابى

**hanyelwaly2010** · 13-09-2008 04:08 PM

الي قالي كده واحد في شارع دمشق عاوز يركبلي حوار رفع ب 120 جنيه

**KoDaK_Gti** · 13-09-2008 04:18 PM

المشاركة الأصلية كتبت بواسطة hanyelwaly2010

الي قالي كده واحد في شارع دمشق عاوز يركبلي حوار رفع ب 120 جنيه

ده مبيفهمش سيبك منه
روح توكيل كلاريون اللى فى احمد عرابى ممتازين وناس بتفهم اوى
وافتح فى الصاج علشان متعملش حوار العلايات ده وترجع تندم وهتفتح فى الصاج بردو
واعمل زى منا عامل شيل الرف الخلفى ووسع الفتحة اللى فى الصاج المدورة واعملها بيضاوى
بس حاول تخلى السماعة اللى هتركبها متوسطنه على الوش اللى فى الرف بتاع السماعة القديمة
وبعدين خليه يلفلك الحرف بتاع الصاج بدوبل فيس (لزق) واربط السماعات كويس عليه
وركب بوردة الفابريقة تانى

وشيل وشاش السماعات بقة لأنها ملهمش لازمة

**bmya** · 13-09-2008 06:38 PM

انا كان معايا لانسر 99 وكنت شايل الرف الاصلي بالسماعات الاصليه
وروحت عملت رف تاني جديد ووسعت شويه في الصاج وكنت مركب سماعتين سوني اكسبلود 300 وكان الصوت ماشاء الله زي الفل
ولما جيت ابيع العربيه روحت شايل الرف بتاعي بالسمعات وروحت مركب الرف بتاع الفابريقه بالمساعات الاصليه بتاعت العربيه ولا كأن حصل اي حاجه