ميدو باشا انا متفق معاك فى كل اللى حضرتك بتقوله بس الفكره فى الشغل مثلا ان الاساس اللى بنقيس عليه غلط يعنى الشباب دلوقتى "نسبه كبيره منه علشان ابقى اكثر دقه " بيتخرج من الجامعه واخد قلم انه مش المفروض يشتغل شغل مهنى او زراعى او تجارى "كبائع" لانه معاه شهاده عليا فبالتالى الوظائف دى اقتصرت على فئه معينه "غالبا" غير متعلمه تماما بالرغم ان الاعمال المهنيه بتكسب اكتر بكتير من اى وظيفه تانيه ولكن لقناعه خاصه لدى الاهل والتى تنتقل بالتبعيه للشاب ان الاعمال دى دون المستوى فالشاب واهله على استعداد يقعد على القهوه عاطل عن انه يشتغل صنايعى "بالرغم ان الصنايعيه ممكن يبقى بيشتغل بادوات حديثه وطريقه غير مهينه"
وبالتالى لان برضه عرض الشباب الخريجين اكتر من اللى سوق العمل عايزه فالشركات اما بتطلب شروط تعجيزيه او تقلل فى المرتب فيبقى الحاسب الشاب بيقبض 850 جنيه والصنايعى المهنى بيصفى فى الشهر 2500 جنيه والاكثر عجبا ان الخريج اللى بيشتغل ده بيبقى لسه عايز يتعلم ازاى يشتغل "كانه كان فى الجامعه بيلعب تنس " فالحل ان الدوله لازم تلغى دعم التعليم الجامعى وبالتالى تقلل المعروض من خريجين الجامعه وتدعم التعليم المهنى وتطور التعليم الاساسي فبعد 15 سنه تلاقى الموضوع بقى افضل وصاحب المهنه بيتعامل زى دكتور الجامعه لانه متعلم والناس كلها محتاجه له فيتعامل باحترام زى بره بالظبط .
عارف يا ميدو باشا انا سافرت امريكا فتره ولما شوفت الصنايعى هناك بلبسه وادواته وحرفيته واسلوبه فى التعامل عرفت ان الصنايعى ده هو اللى بيفرض على المجتمع يعامله زى الدكتور مش فرض من الحكومه على المجتمع علشان كده دايما بحس ان المشكله فينا مش فى الحكومه .
ثانيا الجواز اللى انا بعتبره فى مصر بالنسبه للشباب اللى زى حاليا ضياع للمستقبل الواحد اصبح بيشترى اسره بباقى حياته وده علشان اهالى البنات حاليا "اغلبهم علشان منعممش" اصبحوا بيتعاملوا مع بنتهم على انها مشروع استثمارى هو اكلها وشربها وصرف عليها مبلغ مستنى المغفل اللى حييجى يعوضه عن تعبه ويشتريها منه علشان كده الطلاق فى مصر ماشي زى الفل
واذا ربنا كرمك بناس طيبين تلاقى نفسك خطبت ودخلت فى سباق بتجرى فيه مجبرا واستفادتك منه تكاد تكون 0 فتبدأ تسدد اقساط الشقه وتوضبها وتحضر للفرح ولما تتجوز وتقول حرتاج تلاقى نفسك بتصرف على 2 كمان معاك وتتفتح ابواب جديده للمصروف انت مش عامل حسابها فمهما جبت فلوس فى حياتك حتتشفط فى بلاعه الحياه ولما توصل لسن الاستقرار بعد 45 سنه ويكون مرتبك بيكفيك ويفيض شويه مش حتتدلع بالباقى لانك لازم تحوش لعيالك علشان تسترهم وتساعدهم فى الزمن اللى يعلم بيه ربنا وهكذا الى ان تنتهى حياتك بسلام دون بصمه او ان تقوم بأى دور لخدمه البشريه او ذكرى ليك ....................شوفت اخرتها ههههههههههههههه
بالرغم ان المفترض عمليا ان البنات اكتر من الشباب القادر على الزواج وبالتالى المعروض اكتر من المطلوب فيحصل تيسيرات الا ان ده مبيحصلش متعرفش ليه ؟؟
فالعيب فى النظام "ومقصدش الحكومه لان الحكومه مننا " اللى هو التركيبه الاجتماعيه نصلح ترس واحد رئيسي فيها الباقى يتعدل تلقائيا .
وعلى فكره يا ميدو باشا كل اللى انا قولته ده ميجيش ربع اللى جوايا انما اللى وصلتله ان لو احنا متغيرناش وعملنا حاجه الوضع حيبقى اسوأ لان مفيش غيرنا كشباب اللى تعبانين ومحدش حيساعدنا فلازم احنا اللى نتغير ونغير لعلنا نعمل ثوره اجتماعيه زى معملنا ثوره سياسيه بس المشكله ان الثوره الاجتماعيه دى اصعب واهم .
لنا الله .
المفضلات