الموضوع: محاوله تثبيت على الاوتوستراد خلوا بالكم

السلام عليكم ورحمه الله وبركاته

امبارح كنت فى مشوار انا واقاربى فى وسط المدينه
وفى رجوعى عن طريق الاتوستراد
تحت الكوبرى الدائرى عند المعادى ( قبل طلعه الدائرى مباشره ) اللى توديك اتجاه كارفور
فى كشك بيبيع عصائر وماكولات
فوقفت اجيب مياه وعصائر لينا وكانت الساعه فى حدود تقريبا 10.30 الى 10.45
واللى يعرف الحته ده الحته ده حيويه وبيبقى فى ناس كتيير واقفه منتظره مواصلات فيها
المهم اشتريت اللى انا عايزه والحمد لله ما كملتش دقيقه ومفتاح السياره كان معايا
وركبت العربيه وافاجا بعربيه اوبترا نبيتى متفيمه بتقفل عليا بهدوء جدا
انا فى اللحظه ده ما عرفش انتبهت للعربيه
وحسيت بحاجه مش طبيعيه ودورت بسرعه وفى لحظه التدوير
كان نزل اللى سايق الاوبترا وجى عليا وده اللى خلانى انتبه اكتر
لانه لو نازل يشترى حاجه كان راح الجهه التانيه
وبيقولى اقف اقف اقف بصوت فيه خشونه
لكى يخيفنى ويربكنى
ولكن الحمد لله ربنا الهمنى انى اكسر الدريكسيون على الاخر فى هذه اللحظه
واجيب الاول واكبس بنزين واطير من امامهم لان كان فيه اتنين بينزلوا من البابين التانيين
واول ما عديت اللى كان عندى حدف مش عارف طوبه ولا ايه على العربيه
وجت فى السقف والشنطه
وخلوا اولاد اقاربى الصغيريين يتفزعوا (حسبى الله ونعم الوكيل فيهم)
بس انا ولا سالت طرت
والحمد لله ان ربنا نجانى
وياريت تخدوا بالكم وما تقفوش فى اى حته على الطرق السريعه
الا فى اماكن ان جربتها قبل كده وتكون امان امان امان لابعد الحدود وانت واثق فى كده
وخصوصا لو معاكم احد من اسركم
واياكم وترك مفتاح السياره عند نزولكم فى السياره
وبردك وانت نازل تشترى حاجه ما تخدش معاك اطفال
على شان لو ياقدر الله حصل حاجه تقدر تتصرف بسرعه ومش يعطلك الطفل
والحمد لله على كل شى