كيفية ضبط ساعة الكاسيت فى الاكسنت ار بى و تقرير اولى ؟؟؟؟
السلام عليكم ورحمة الله وبركاته
الحمدلله اشتريت اكسنت ار بى 2012 طبعا بعد الكشف فى التوكيل و الحمدلله العربية طلعت سليمة و مفهاش اى مشاكل و التقرير كان ممتاز و المهندس قالى اشترى العربية
بعت الالنترا 2008 من اسبوع و ربنا يبارك للى اشتراها
العربية كمجمل كويسة و حاسسها انعم من الالنترا مع الاتنين نفس الموتور و الفتيس معرفش ازاى ؟
طبعا احساس انك راكب عربية فخمة دة انا مش حاسه من بعد مانزلت من النترا لاكسنت ار بى
بس التابلوه و العدادات شكلهم احلى بكتير من الالنترا طبعا ازواق
الشكل من برا احسن طبعا و ان كان صغير عن الالنترا
مسند اليد مريح جدا
الكراسى مريحة جدا جدا
كمبيوتر الرحلات كويس و بيدك معلومات عن البنزين و الاستهلاك و كمية البنزين اللى فى التانك هاتمشيك قد ايه
الخامات اقل شوية من اللى فى الالنترا
التسارع ممتاز و الفتيس سلس جدا
الموتور هادى جدا مالوش صوت خالص
العربية ناعمة جدا فى المطبات مابتحسش بيها
السقف واطى شوية و ممكن يضايق اى حد طويل
مساحة الزجاج الخلفى صغيرة و مقرف فى الركن بس الموضوع هايتحسن لما تتعود على ابعاد العربية و ان كان ممكن يتحل بتركيب حساسات ركن
الاضاءة الامامية ممتازة و قوية جدا بتفرش على الطريق
التكييف فريزر
عزل العربية جيد جدا
الباور جميل جدا وناعم و دقيق هو هو بتاع الالنترا
الصالون اتساعه متوسط يعنى مش ضيق و مش واسع و اوسع من الفيرنا
مافيش مصباح قرائة مع جراب نضارة بس فى اقرب زيارة للحرفيين هاجيبه استيراد ان شاء الله و اركبه انا كنت جيبته للالنترا و ركبته بس كان لونه بيج و الصالون عند كان رمادى و وديته لوحد بتاع دوكو رشهولى بنفس لون الصالون بالضبط بدون اى اختلاف و تم التركيب و كان جميل جدا و تركيبه فى منتهى السهولة
الكاسيت شيك جدا و شاشته كبيرة و واضحة الصوت ممتاز تقريبا نفس سيستم الالنترا
المشكلة فى الساعة اللى فى الكاسيت مش عارف اضبطها خالص
انا بدوس على زرار الـ clock و بعديت بدوس عليه دوسة طويلة و يعلملى على رقم الساعة عشان اغيرها لكن مش عارف تتغير ازاى ؟؟؟