العربية دي هي الوحيدة في مصر اللى ممكن تترخص ملاكي أو أجرة أو نقل

وطبعا كلنا عارفين إن السيارات الأجرة أو النقل بيكون من ضمن الفلوس اللى بتدفع أثناء ترخيصها الضرائب والأقساط بتاعة النقابة بتاعتهم سواء أجرة أو نقل ... والملاكي مش بيدفع الكلام ده كله (لأن سائق الملاكي المفترض إن له وظيفة أخرى بيخصم من دخلها الضرائب بأسلوب آخر)

وكان لية فقط نصيحة بشأنها ... لو ناوي ترخصها ملاكي وتشغلها أجرة ... لازم تبقى عارف إن ده مخالف للقانون وهاتكون كدة متهرب من الضرائب والرسوم المفروضة على السيارات الأجرة وإنك كدة وضعت نفسك تحت طائلة القانون ورشاوي أفراد الشرطة أو المخالفات الى مالهاش لازمة عشان ترضيهم ويسيبوك .. أو هاتقع مع واحد عنده ضمير وبرضه هايعملك مشاكل من نوع آخر

وفيما بعد كمان لما نظام كروت البنزين يتم تطبيقه هاتكون الكمية المسموح لك بيها بداخل الدعم هي الكمية المسموح بها للملاكي وليس للأجرة وطبعا الفرق هايكون كبير

أنا عارف إن الموضوع بقى منتشر في مصر بالكامل وبقى خارج السيطرة .. ولكن انتشار الغلط مش مبرر للغير في ارتكاب نفس الغلط

عشان كدة أتمنى لما تيجي ترخصها .. ترخصها أجرة وتخليك ماشي سليم ... ولو مافيش تراخيص أجرة في المحافظة اللى انت فيها ... يبقى أكيد المحافظة مليانة ومتخمة بالسيارات الأجرة ومش مستحملة أكتر .. ويبقى الحل إنك تشتري ترخيص أجرة من واحد مرخص قبل كدة وده لوحده ليه ثمنه ..

لو ما فيش يبقى ربنا يرزقك سبيل آخر لكسب الرزق بالحلال


ربنا يرزقك ويرزقنا ويهدينا ويحفظنا يارب