السلام عليكم ورحمة الله وبركاته طيب الله اوقاتكم واسماعكم بذكر الله وبكل الخير
غيرت طلمبة المياه للفليشيا .. واليكم تقرير سريع لعل الله ان ينفع به الجميع
البداية والاعراض :-
1- صوت حكه وبحه اثناء ادارة المحرك .
2- سير الدينامو المفترض به اربعة مجارى تم عمل ترحيل له من على طارة الطلمبه وبالتالى بدأت تخرج منه سلخه التى لاتلبث و سرعان ماتمتد للسير كله ثم يحدث انهيار وهرى للسير.
3- صوت تكتكه يحدث لك التباس فى الامر هل هو صوت نقر تاكهات او بلى دينامو او جلبة طلمبه او صوت كاتينه تقسيمه.
4- مرجحه فى طمبورة الطلمبه ولكن الغريب مفيش ولا نقطة مياه بتتسرب .
القرار :-
تغيير الطلمبه والسير.
المشتروات :-
طلمبة مياه صينى ماركه نضيفه شويه تكنولوجيا المانى تصنيع صينى معاه الجوان 160 جنيه طبعا كان فيه الاسبانى 350 جنيه والتركى 200 جنيه لكن انا لى فلسفه غريبه شويه هو انى مش ضامن نفسى هابيع امتى واغير فمش عايز قطعة غيار غاليه مع ان العربيه ممتازه ولم يصدر منها اى مضايقات تماما ومدوخه معايا ومستحمله .
النتيجه :-
اختفاء كل الاصوات تماما ونعومه فى المحرك
الاستنتاجات :-
يبدو من فحص الطلمبه القديمه انها الاصلى والمالك القديم قام باصلاحها سابقا ولكنه عند تثبيت الطمبوره بالاكس بتاع الطلمبه اتعوجت الطمبوره فاصبح بها رفه ولكن غير مؤثره فى الاكس طبعا الحشو بدأ يعمل صوت وعضه فى الدواره والرفه فى الطمبوره بدأت تعمل للسير مع الزيادة المفاجئه لعدد لفات الموتور تعمل للسير نتر وترحيل
كدا انا خلصت ولكن مازال هناك مشكله ابحث لها عن حل
نقص المياه فى القربه
طبعا انا اتخذت كل الاجراءات (غيرت القربه وغيرت الغطاء وحطيت مياه خضرا وكشفت على كل الخراطيم والقفزان والكوعات ) مفيش حاجه ظاهره
النقص عباره عن ربع كوب مياه فى 100كم طوالى واكتر شويه فى الزحام وممكن تخلص القربه كلها فى خلال اسبوعين
يعنى مشغول يوميا بالتتميم على مياه القربه
الحرارة لاترتفع عندى نهائيا فى جميع الظروف والمروحه والثرموثتات يقوموا بدورهم بلا مشاكل بمعنى فى اشد ساعات الزحام تقترب من 70 لأنى مغير لها الثرموثتات (محرك انجكشن)
طولت عليكم بارك الله فى الجميع ودمتم فى كامل العافيه