الموضوع: اسعار ومواصفات اوبل انسيجنيا 2015 (متجدد)

المشاركة الأصلية كتبت بواسطة abdo taha

بصو بقى يا رجالة ده تقريري للعربية بعد ما شفتها

اولا الشكل الخارجي : شكلها في منتهى الجمال احلى من ال 508 و على حظي ان كان لونها احمر و كان فعلا تحفة عليها و مخلي شكلها شبابي مش عارف حسيتها من ورا رياضية جدا و من قدام الى حد ما فاللي عاوز شكل شبابي على العربية دي يختار احمر فعلا كان منطق العربية جامد و مع الجنوط ال 18 و عرضها تحفة .
ثانيا المقصورة الداخلية : العربية لو دخلتها من الوهلة الاولى هتحسها ديقة لكن لو قعدت فيها سواء كرسي السائق او الراكب امامي فهتفرد رجلك و ده اكثر من الفكترا سي و اعتقد السبب عرض العربية لكن كراسي الفيكترا من حيث الظهر اوسع و اريح حاجة بسيطة اما بالنسبة للكنبة الخلفية فدي اكثر حاجة عاجبتني مريحة جدا جدا عشان الناس اللي بتقول انها ديقة لأ دي كانت لماني و اريح كثير من الفيكترا سي ده بالنسبة للقاعدة نيجي للخامات عجبني جدا تطعيمات الكروم اللي في التابلوه و الفتيس فخم فخم يعني و عجبني الفرش حاجة فخيمة نص جلد على قماش و كذلك خامات الابواب و التابلوه المطعم بجلد فيه و الهوايات احلى من الفيكترا سي و مسند اليد جلد و واسع و برح كده .
نيجي للتكنولوجيا الداخلية لقيتها نازلة بمفتاح start stop و العدادات بشاشة في النص عجبتني و متجاوبة اما الشاشة الرئيسية ال 4 بوصة خيبت امالي شوية كنت فاكرها هتبقى احلى ال resolution بتاع الشاشة اللي في العدادات احلى و انقى من بتاعة الكاسيت و لكنها مش سيئة بالنسبة للشاشة اللي كانت نازلة في الفيكترا سي و لكنها سهلة في الاستخدام و الميزة ان كل حاجة قدامك في الدركسيون و العدادات و مش هتحتاج تودي عينك في نحية تانية عن الطريق و مفيش اللخبطة من كثر الزراير اللي موجودة في الاسترا و دي صورة بسيطة ليها






نيجي لبعض النقط بقى زي الاضاءة ال led اللي كانت رائعة فعلا الشكل الرياضي جدا على اللون الاحمر اللي فعلا انصح ان اي حد يجيبها باللون ده و بالنسبة للشنطة حجمها كويس و مش شايف انها تتحتاج موضوع الهاتش باك و اللي عجبني انها خفيفة و اللي أكثر حاجة عجبتني الكبوت اللي بمساعد و لما شفت الموتور مقلتش غير بسم الله ما شاء الله حجمه مخيف فعلا بالنسبة ل 1600 و دي صورة صغيرة ليه



نيجي للمجمل في الاخر العربية جميلة و استمتعت بمقصورتها الاكثر من رائعة المطعمة بكمية من لمسات الفخامة مع تحفظي على الشاشة الصغيرة و شايف ان في بعض التشابه بينها و بين الفيكترا سي طبعا مع فرق التصميم الاجمل للانسجنيا و العربية تكنولوجيتها سهلة في الاستخدام و تتعود عليها بسرعة و بصراحة مش هتزهق منها ابدا و بصراحة افضلها عن ال 508 لأن الانسجنيا جمعت بين الطابع الشبابي الرياضي و الفخامة و دي كانت وحهة نظري تجاه العربية كان معكم في هذا التقرير العبد لله عبدالرحمن طه .

الله ينور يا كبيير،،،،،،انا صحيت من النوم مخصوص عشان اشوف نزلت تقريرك ولا لسه،،،، معنى كلامك انى استبعد تماماً الاليجانس من اختياراتى بسبب فقر الشاشه مش كده،،!؟

وبعدين شوفتك كاتب على الاضاءه الليد،،هل تقصد بيها الفوانيس الخلفيه ولا فى اضاءه تانيه انا معرفهاش،،!؟

بس التقرير كان ناقصه كام صوره لشكل العربيه من بره عشان نشوف اللون الاحمر عليها عامل ازاى

المشاركة الأصلية كتبت بواسطة Abdo Taha

اولا افضل تخليك في فئة اعلى من الاليجانس لأن في فرق كبير جدا بينها وبين ال intellink لو امكانياتك تسمح اما مثلا لو حد اخره 250 الف خلاص مبروك عليه برضه و مش هيتضايق من حاجة اما بالنسبة للليدات اللي في الفانوس الخلفي كانت شكلها سحري كده و اللون الاحمر عليها من ورا مخليها زي ال opc بس ناقصها حليتين شكمان و بالنسبة للصور حاولت ارفع كمان صورتين للأسف مش عارف ارفعهم بيهنج على طول و يديني error و عموما الاحمر مكانش هيبان لو كنت صورته لأن معظم العربية كانت متغطية باللزق الابيض يدوب مناطق معينة اللي لما تقف جنبها كده و بعد كده خاولت اجمع شكل العربية في دماغي و كذلك والدي قالي اللون ده تحفة فلازم تشوفه انت بنفسك افضل انا حاسس ان الالوان الفاتحة ظابطة عليها اكثر

الف شكر على التقرير
هل اللون الى شوفته الاحمر العادى ام الاحمر الغمق اوى الى هو dark mahogany