فلوانس 2014 من القاهرة لشرم ثم القاهرة ثم شرم
سافرت بالعربية الجديدة e2 من القاهرة لشرم المسافه حوالي 500 كم فقولت اعمل تقرير على قد فهمي في العربيات يمكن يفيد حد
المميزات
1- ثبات روعه في المنحنيات انا أخدت منحنيات ابو زنيمه بسرعه 106 كم/س ومكنتش قلقان ابدا وممكن كنت ازود عن كده ودي منحنيات جبليه صعبه جدا
2- هدوء ونعومه خطيرة بجد كنت حاسس اني واقف
3- استهلكت بنزين 34 لتر بسرعه 120كم/س معظم الطريق عدا 60 كم مشيت بسرعه 180 كم/س وطبعا طول الطريق تكييف
4-السحب فعلا فوق ال 50 كم/س شديد جدا وال كيك داون روعه وانصفني في كل المواقف
5- مثبت السرعه وحدد السرعه كويسين في السفر
6- واسعه جدا ومريحه جدا
7- التكييف كان كويس جدا بس درجة الحرارة بره كانت 32 يعني مش هنقدر نحكم عليه غير في الصيف بس انا كنت جايب بكرة الفريون على نصفها عشان عندي تكييف عادي.
8-سرعة ال 160 كم/س فيها هادي جدا ومفيش صوت لموتور او عفشه
9- تاني مرة سفر لشرم كنت ماشي على سرعه 150 كم /س ووصلت ب 45 لتر مع تكييف برضو.
10- كمبيوتر الرحلات دقيق في معدلاته. بس بعد ما فهمتها.
11- باور خفيف جدا وبيتقل مع السرعات فبتحس بثبات الدريكسيون معاك
12- البلوتوث جميل وواضح وكمان ممكن تشغل الملفات من الموبايل بدون وصلة AUX عن طريق البلوتوث.
13- كاسيت زكي لا يغلق مع كونتاكت ولكن مع فتح أي من البابين الأماميين وكمان بيعلى مع الدوشه بسبب السرعه .
14 -نور الشبورة الخلفي مهم جدا في السفر في الطرق الجبليه ليلا انا كنت بتفاجئ بسيارات امامي بسرعه بطيئة كالمتوقفه بالنسبة لسرعتي خصوصا لو حد مقابلك مديك العالي او زينون
15 - النور العالي تحفه وقوي جدا ومش محتاجه زينون خصوصا ان العالي ما بيفصلش الواطي.
16 - وحده امان في وحدات رفع الزجاج لو حد احطط ايده الزجاج بيفتح تاني ودي مهمه جدا للاطفال.
العيوب : -
1- السحب قبل ال 50 كم/س وحش شويه.
2- وانا راجع كنت عايز الحق الحظر مشيت على 180 كم/س في سيناء و 170 كم/س في طريق السويس استهلكت 60 لتر
3-صوت الموتور بيعلى بعد 5000 لفة/الدقيقه اوي
4-مؤشر البنزين لما بيجي للنصف العربيه بتحتاج 20 لتر فقط مع ان التنك 60 لتر في حاجه مش فاهمها في مؤشر البنزين . مع العلم انه ديجيتال.
5- كمبيوتر الرحلات مفيهوش غير trip واحده.
6- قفل الاطفال بيقفل البابين اللي ورا بس وبيقفل زجاج وفتح داخلي للباب
7- لو مش عامل قفل الأطفال الباب الخلفي يفتح حتى لو السنتر مقفول. وبكده انت مش محتاج lock اللي بيبقى في الباب نفسه وده في نظري عيب.
8- تحكم الكاسيت مستخبي بس بعد ما تحفظه هتاخد عليه
9- زراير R/O بياخه كان ممكن يحطهم جنب ال +/- وكمان مكان زرار تشغيل مثبت ومحدد السرعه ويحط الناحية التانية تحكم الكاسيت والبلوتوث.
10- البلوتوث بيتعامل مع 1 تليفون فقط مع وجود ذاكرة ل 5 تليفونات مع اني معايا سماعه جابرا بلوتوث بتشغل حتى 5 تليفونات في نفس الوقت.
11-لما بتقفل الكاست وتشغله تاني الملف اللي شغال سواء فلاشه او اسطوانه لازم يعيد من الأول يعني مثلا سورة البقرة لازم كل مرة تعيد من الأول ومابتخلصش غير في السفر
12- اماكن التخزين مش عجباني ومكان الفلاشه هيخلي ابني يتعبني وبعدين المفروض اني استغل المساحه تحت مسند اليد
ختاما العربية عجباني جدا ومفيش حاجه كامله ولو رجع بيا الزمان اكيد مش هشتري غيرها بعد ما كل يوم بيعجبني فيها حاجه جديده وكمان شكلهاعاجبني اوي.
اتمنى ان تعم الفائدة وساعدت احد في اتخاذ قرار بشأن السيارة
ياريت توضيح القفل الكهربا والقف الميكانيكي
- لو مش عامل قفل الأطفال الباب الخلفي يفتح حتى لو السنتر مقفول. وبكده انت مش محتاج lock اللي بيبقى في الباب نفسه وده في نظري عيب.
برده مش فاهم النقطة دى كويس....لو حضرتك بتنسى تقفل القفل الكهربا بتاع الأطفال...أستخدم القفل الميكانيكى الدائم اللى فى جنب الباب و هتستريح من الموضوع ده على طول
لا كده انا توهت منكم ايه قفل كهربا وميكانيكي ده هو فيه سنتر لوك بيقفل الابواب اول ما العربيه تتحرك وده لتامين الابواب من الخارج عشان محدش يفتح العربيه عليك من بره وفيه قفل ف باب الساءق عشان قفل الابواب الخلفيه للاطفال انما مش فاهم يا استاذ بوكلا تقصد ايه بانه لو نسي يقفل القفل الكهربا يستخدم القفل اللي في الباب ياريت توضيح بعد اذنك انا معايا فلونس 2011 e3 وكان معايا قبلها ميجان كان نفس النظام وشكرا