الموضوع: سؤال فى ال 508

زي ما أستاذ عمرو قال هيا مش بعدد لفات الموتور الأعلي,
قد ما هيا بعزم الموتور ودي الحاجة الأولي,,
ونسب السرعات (ratios) اللي في الفتيس ودي الحاجة التانية,,

هديك مثال علي دا عن تجربة في عربية لانسر بموديلات مختلفة,,
عدد لفات موتور 8000 طبعاً في كل الموديلات اللي هذكرها.

في الانسر بومة مانيوال (5 غيار) 1300 كانت بتجيب 100 كم علي الرابع علي 3000 لفة موتور في الدقيقة,,
لانسر بومة أوتو (4 غيارات) 1600 كانت بتجيب 100 كم علي الرابع علي حوالي 2600 لفة موتور,,
لانسر بومة أوتو برضه 1600 بس فتيس CVT بتجيب 100 كم علي عدد لفات موتور 2000 بس !!
لأن ال CVT النسب فيه متغيرة طول الوقت,, وعزمة أعلي.

نفس الكلام هتلاقيه مع البيجو لأن عزم موتور ال 508 عالي, والفتيس 6 سرعات بيدي سرعة أعلي علي أستهلاك بنزين أقل ورينج RPM أقل.



هديك مثال تاني بس مختلف شوية عن عدد لفات الموتور, وهيكون عن العزم والهورس باور,,

الهامر H2 موتورها 6200 سي سي والهورس باور بتاعها حوالي 380 حصان.
من 0-100 في 8 ثواني. معقول مش وحش صح ؟؟؟
أقصي سرعة 200 كم,



طيب مازدا Rx-8 موتورها 1300 سي سي روتاري الهورس باور بتاعها حوالي 230 حصان بس,,
من 0-100 في 7 ثواني. :-)
أقصي سرعة 240 كم.


الموضوع مش موضوع العداد أخرو كام,, الموتور والفتيس هما الأساس, وأمثلة الأنسر هتوضح لك الفرق,
أتمني تكون الفكرة وصت.

المشاركة الأصلية كتبت بواسطة amr_basiony

العفو يا باشا على ايه

بالنسبة للعربية ممتازة باستثناء بعض الحاجات اللى انا من وجهة نظرى الشخصية شايفها عيب زى مثلا

1- صوت انذار السرعة فوق 120 كم / ساعة قمة فى الازعاج ومابيفصلش يعنى تخيل انا رحت بيها مكة المكرمة اعمل عمرة انا واولادى من الرياض يعنى 950 كم رايح وزيهم راجع وطبعا الطرق هنا بتمشى عليها 180 او 190 وانتا مرتاح جدا لكن طول الطريق الانذار مابيفصلش وصوته مزعج جدا لدرجة انى فكرت اسأل فى التوكيل لو ينفع فى السوفت وير بتاعها يلغو الانذار ده بس رجعت فى كلامى وخفت لو لعبت فى حاجة اى حاجة تانية تبوظ

2- برضه صوت انذار الحزام شغال بالوزن يعنى لو اللى قاعد جنبك اتحرك او عدل نفسه على الكرسى او شلت طفل او نزلت طفل من على رجلك يفضل يزن وازعاج لكن طبعا اكيد الحزام امان بس نعمل ايه بقى احنا المصريين مش متعودين عليه قوي

3- عزل التكييف بمعنى انه يعمل تدوير للهواء من داخل العربية ولا يجيب من الهواء الخارجى بحسهم زى بعض اوقات كتير قوى بكون مشغله على اعادة تدوير الهواء الداخلى واكون مثلا فى اشارة واشم ريحة العادم او الدخان اللى بره فا معرفش هل ده عيب عندى بس ولا عند كل الناس او انا اللى حساس زياده لموضوع الريحة بتاعة العادم مش عارف

اعتقد دى الحاجات اللى انا شايفها من وجهة نظرى عيوب لكن غير كده العربية سحبها ممتاز واستهلاكها كويس متوسط جوه البلد وممتاز على الطرق السريعة

واهم ميزة فيها ان شكله ماشاء الله ممتاز وتصميمها انسيابى جدا وثورى وهايعيش كتير زى الــ 406

بالنسبة لصوت أنذار السرعة فهوا بيتلغي بسهوله من علي السوفت وير بتاع بيجو,,
هوا أوبشن بيتعدل ممكن تخليه يدي أنذار علي سرعة أعلي أو تفصله خالص لو بتمسك خط طوالي علي طوول,
ومتخافش مفهوش ضرر ولا هيبوظو حاجة لأنه مش هيفك ولا يركب ولا يعدل في السوفت وير,
دا هوا أوبشن في قايمة زي enable/disable

وبالنسبة لأنذار الحزام بالوزن أنا مفهمتش قصدك فيها,, دي علي الحزام بتاعك كسايق, ولا حزام اللي راكب جبنك,
وعموماً أنا برضه بلبس الحزام علي طول سواء جوا البلد أو برة البلد عشان برتاح فيه أكتر,
برة البلد أمان طبعاً,, وجوا البلد بيثبتني في الكرسي من كتر التنطيط مع المطبات,, :)
لكن لو حابب تسوق من غيره هوا المفروض بيفضل يزمر دقيقتين وبعدين يسكت,,

بالنسبة لموضوع أعادة تدوير الهواء في واحد معانا هنا معاه 508 قال إنو لما بيرفع الأزاز للأخر من الزرار بتاع الأزاز بيفضل فيه حتة صغيرة في أخر الازاز من فوق ما بيكون مقفول كويس,

المشاركة الأصلية كتبت بواسطة eleanor

7-موضوع الهواء مش بيضايق للدرجه دى ولما حضرتك بتقفل الازاز بخاصيه الاوتو ارجع ودوس تكه تانى هاتسمع زى صوت تكه صغيره وهاتلاحظ ان الازاز رفع سنه صغيره وده معمول علشان ضغط الهواء جوه العربيه مع التكيف

http://www.nilemotors.net/Nile/38208...post3875223279

فأبقي أبقي أقفل الأزاز كدا مرة بضغطة واحدة اللي هيا أوتو, وبعد ما يقفل خالص كله أبقي أضغط ضغطة كمان وشوف كدا هيقفل حتة تاني ولا لأ,,
وأبقي عرفني هتظبط معاك ولا لأ, ولو مظبطش ممكن تبقي تقولهم يشوفو البوابات اللي بتقفل مع زرار أعادة التدوير بتقفل مظبوط ولا لأ,

وأنت مش حساس ولا حاجة أنا بحس بنفس الموضوع برضه في ال 307 وأعرف واحد بيحس بيه في 508 فاممكن يبقي طبيعي,,