سيب عربيتك و جرب تمشي مواصلات .. تجربة مفيدة جدا
السلام عليكم
انا عارف طبعا ان تجربتي مش حتنفع مع كل الناس بس حابب احكيلكم التجربة
انا بقالي اسبوع بمشي من غير عربية و بركب المترو او ميكروباص و بتمشى 10 او 15 دقيقة كل يوم
بس طبعا في ايام مثلا بكون حعمل كذا مشوار حروح الموقع مثلا بعدين اروح المكتب فباخد العربية
نقول بقى المميزات
1- شوية مشي كدا يخلوا الواحد شباب و يخلصونا من الكرش و فعلا الواحد حاسس انه بقى انشط في الاسبوع ده
2- توفير رهيب في المصروف اليومي
3- توفير اهلاك السيارة بمشوار روتيني سخيف زي الشغل بالذات اذا كان في مواصلات كويسة لهذا الشغل اللعين (دلع عربيتك و ستتها )
4- صيانة العربية مش حتلاقيها بتغب عليك كل فترة قريبة و عداد الكيلومتر بتاع العربية ميبقاش عمال يعد و يجري و تلاقيها عاملة رقم كبير و تعجز منك
5- توفير الوقت و دي نسبية من شخص لاخر انا بتمشي شوية 10 دقايق لمحطة المترو و باخد المترو من المعادي للملك الصالح في 10 دقايق و انزل اتمشى 5 دقايق اكون في معهد الاورام مشواري كده اخد 25 دقيقة و مفيش تدوير على ركنة ولا غيره
لو بالعربية 15 دقيقة لو الطريق فاضي خالص لكن مع زحمة الكورنيش اديني 45 ل 60 دقيقة و خاصة الحتة اللي عند مستشفى السلام و الحته اللي قبل الملك الصالح و في الرجوع بالعربية الطريق بيكون عادتا كويس
6- و دي اهم نقطة عندي الركنة و راحة البال , يا سلاااااام تروح كده و لا تدور على ركنة ولا تتخانق مع سايس و لا تقلق على حاجة و قاعد كده في الشغل في بطنك بطيخة صيفي , و مفيش فلوس محطوطة في الشارع و انت قلقان يا ترى حصلها ايه طب اروح ابص عليها , يااااااه ياااه
7- الراحة من ارهاق السواقة في شوارع مصر المحروسة و التمتع بالفرجة عالشوارع و الناس . الواحد بيشوف حاجات مكانش بيعرف يشوفها و هو سايق
8- و انت بتتمشى كده عندك مطلق الحرية انك تشوف حاجة تعجبك تقف تبص عليها تشتري شوية فاكهه حلوة اي حاجة في السكة انما لو معايا العربية بكسل ادور على ركنة و لو لقيت ركنة حتلاقي سايس و حياخد منك فلوس برضه . والله ساعات بشتري فاكهه او اي حاجة بضعف سعرها لمجرد ان المحل في حته سهلة بالنسبالي و انا معايا العربية و الركنة سهلة قدامه
و طبعا العربية برضه الواحد جايبها عشان يدلع نفسه , يخرج بيها مع الاولاد او مع الاصدقاء باليل او سفرية كده , لكن المشاوير الروتينية اللي مواصلتها سهلة نريحها شوية .
العيوب بقى
1- ممكن لو انت من الناس اللي بتحب تكون على سنجة 10 تلاقى نفسك بقيت سنجة 8 مع المشي شوية و الاحتكاك بالناس . على حسب بقى انت حتقابل مين في الشغل :grin28:
2- برستيجك بيقل في الشارع لانك بقيت من عامة الشعب و ماله انا عايزه يقل في الشارع انا مش نازل اتجوز
3- لو جالك مشوار مفاجئ و انت في الشغل حتبقى محتاس شوية بس حلها عندي حاجة من 2
-حروح اخد العربية و اروح المشوار فيها نص ساعة زيادة مثلا
- حاخد تاكسي و تاكسي تاني و انا راجع و خلصنا , حتقولي تكلفة , و ايه يعني ما انا موفر طول الشهر و بعدين دي مش بتحصل كل يوم
4 - لو عندك ابن كبير شوية خبي منه مفتاح العربية لحسن تكون مفكر نفسك موفر العربية و هو بيتشقلب بيها كل يوم :B4_282:
عموما في الاخر انا كنت واحد من الناس اللي رافض فكرة المواصلات بس جربت و بصراحة انا في قمة الانبساط من الموضوع , ادعو كل واحد يجرب يوم او يومين خاصة لو مواصلاتك سهلة و شوف هل حتفرق في وقت او غيره و ربنا يوقنا جميعا