الموضوع: تقييم الأمبريزا 2013

السلام عليكم جميعا , الأعزاء اعضاء الأسوبارو تحيه عطره لكم جميعا , النهارده حبيت اعمل تقرير عن اداء امبريزتي العزيزه يعني تقييم مبدئ كده , العربيه حاليا عامله معايا حوالي 2250 ك في فتره حوالي 70 يوم

اولا مواصفات العربيه

العربيه امبريزا 2013 سوداء فئه الهاي لاين - الوكيل هو اللي مسميها كده - و هي تعتبر الفئه المتوسطه فيها تقريبا كل الأوبشنز اللي في الفئه الأعلى منها عدى فتحه السقف و الفرش الجلد و الجنوط 17 بدل ال 16 اللي عندي

قبل ما اشتري الأمبريزا كنت بقارن بنها و بين عربيات كثير و مع الوقت المقارنه وصلت اساسا بين الأمبريزا و الفورد فوكاس و القيت نظره على الأوبل استرا , الأوبل استبعدها سريعا لأني حسيت العربيه من جوه اضيق كثير من الامبريزا و محستش ان فرق الأوبشنز بينهم يستحق فرق 15 الف بالعكس المفروض في رأي ان السوباروا هي اللي تكون اغلى عربيه 4wd ياباني 100% مش بولندي و اوسع من جوه , فضل الخيار بين الامبريزا و الفورد كانت كل واحده تتفوق في حاجات عن التانيه بس مشكلتي مع الفورد اني عشان اجيب عربيها فيها تقريبا نفس الأوبشنز كنت هجيب الفئه اللي في النص كانت بحوالي 200 الف الفارق كده كان عامل اساسي في اني استبعد الفورد رغم انها طبعا عربيه لا غبار عليها بس اتمنى تبقى مع وكيل قوي و تستمر معاه فتره

بس النهارده و بعد فتره مش قليله من قياده الأمبريزا بمنتهى الامانه اي حد بيتكلم معايا و بيكون بيفكر في عربيه في رنج ال170 - 190 الف هنصحه وش بالأمبريزا بعيدا بقى عن الكلام بتاع اسعار قطع الغيار و عدم الأنتشار و الكلام ده بجد لما تلاقي النترا عامله 160 الف و امبريزا عامله 170 يبقي ده تهريج مع احترامي للهيونداي و محبيها بس الفارق الميكانيكي بين العربيتي و وسائل الامان في الامبريزا و فارق الأيدي العامله ميخليش ابدا الفارق بيقي 10 الاف فقط , ممكن اكون متحيز لعربيتي جايز ؟؟ بس الأكيد ان الكوري حاليا في مصر و العربيات الهجين اللي متعرفلهاش بلد بقى فيهم مبالغه غير طبيعيه في سعرهم

ثانيا ايجابيات اداء العربيه الفتره اللي فاتت

1\ عزل العربيه ممتاز , صوت الماتور نادرا ما بحث بيه او بسمعه, الأصوات في الطريق بردو بتقل جدا مع غلق النوافذ

2\ الثبات ع الطريق بسم الله ما شاء الله , عربيتي القديمه كنت لما بجيب 110 او بقرب من 120 بحس العربيه خفيفه جدا مني لكن الامبريزا وصلت بيها ل 140 ولا كان في اي حاجه حصلت الظروف بس مسمحتليش اجرب اكثر من كده

3\ استهلاك البنزين , في العادي و جوه البلد الفول تانك بيقراء 380 كيلو و فتره اجازه العيد لما فولت و كانت البلد فاضيه قراء لحد 420 كيلو , على الطريق بسم الله ما شاء الله الفول تانك قراء لغايه 760 كيلو بدون مبالغه , طريق القاهره الغردقه رايح جي حوالي 1000 كيلو استهلك تفويله واحده فقط , اعتقد انه استهلاك ممتاز و خصوصا ان العربيه لسه في الأول و مع الوقت المفروض الأداء يتحسن عن كده

4\ وجود الأيموبيلايزر طبعا مش محتاج كلام و خصوصا في الأوضاع الحاليه للبلد و مش فاهم ازاي واجد يدفع و لو 70 الف في عربيه مفيهاش أيموبيلايزر ألا لو ضامن انه طول اليوم في بيته و شغله و فسحه بيركن العربيه جوه جراج

5\ التكيف لا تعليق غير بسم الله ما شاء الله ثلاجه بمعنى الكلمه

6\ الأضائه الديجاتيل و اضائه التابلوه بليل لونها احمر مميز اوي

7\ البلوتوث و المالتي بيريحوك كثير و انت ع الطريق

ثالثا بعض الملاحظات الغير ايجابيه عن حتى الان

بصراحه مينفعش اقول عيوب لأنها فعلا مينفعش يتقال عليها اكثر من ملاحظات

1\ و انا ع الطريق كنت بحس بحاجه غريبه لما العربيه تقرب من 100 و لغايه 110 كنت بحس زي ما يكون الكاوتش ماشي على اسفلتش خشن نفس صوت الزنه ده بس متقطع يشتغل من خمس لعشر ثواني و يقطع زيهم و يرجع يشتغل و يرجع يقطع اول ما العربيه تتجاوز ال 110 او تكون لسه موصلتش لل100 الموضوع ده مبيكنش ليه اي وجود , مش عارف ايه تفسير الموضوع ده الصراحه

2\ في في العربيه اوشن بيزود صوت الكاسيت مع زياده سرعه العربيه , انا كنت جربت الأوبشن ده قبل كده في بي ام بس لما شغلته عندي مس حاسه بنفس الدرجه مش عارف بقى هل هو كده فعلا ضعيف او مش محسوس قوي ولا انا اللي في عندي حاجه محتاجه تتظبط , يا ريت اللي معاهم امبريزا 2013 يجربوا الموضوع ده و هل بيحسوا بفارق فعلا و لا لأ

3\ طبعا العربيه مش عاليه و ده شئ معروف بس بأمانه نادرا جدا ما العربيه بتحك مني في اي مطب حتى و هي محمله , الأسبوع اللي فات مطب واخده براحه اوي بس لقيته للأسف حك في المصفحه تاني يوم مريت على نفس المطب مع واحد صاحبي معاه كيا كارينز الاولد شيب و المفاجئه ان عربيته هو كمان حكت في نفس المطب , مطب عالمي و الله ربنا يسامح اللي عمله

في النهايه اتمنى يكون التقرير نقل صوره كويسه عن العربيه و انا تحت امركم في اي استفسار و يا ريت اي حاجه كتبتها الأمبيرازاوين القدماء ليهم تعليق عليه يتفضلوا يقلوه مشكورين عشان الكل يستفيد

المشاركة الأصلية كتبت بواسطة kareem.elaraby

أيوا ما انا عارف بس في أنهي فئه ؟!

الهاى لاين والاسبيشال ايديشن (الثانيه و التالته)