السلام عليكم يا شباب
من فترة كدة حصل معايا حاجة فقولت لازم تعرفوها
كنت بحس وانا بلف الدركسيون ( يمين أو شمال ) وبعدين وانا برجعه تانى للنص بحس بخشونة فى الدركسيون وهو بييجى على النص تماماً وبعد فترة تانية تبدأ تحس فى المطبات بصوت دبدبة زى ما يكون حديد فى حديد اللى بيخبط مع المطبات
ونظراً لأنى مهسهس عفشة وأصوات تحديداً فقولت أروح أشوف فى أيه....روحت التوكيل وقالولى أن بطاحة المساعد الشمال عاوزة تتغير وكانت المفاجأة أنها غالية أوى فى التوكيل ( 1050 جم ) المهم مغيرتهاش وبعد أسبوعين تلاتة لما فضيت روحت لواحد أعرفه يشوفللى القصة دى
الراجل فك وقاللى أن البطاحة المفروض بيكون فيها شحم وعندى الشحم بتاعها نشف تماماً وبقت عبارة عن كاوتش ناشف جداً + رلمان بلى من غير شحم
المهم قاللى أحنا هنجرب نشحمها ونشوف أيه الأخبار بس لو فضلت الحكة موجودة هنجيب واحدة جديدة ( سألت عليها فى شارع دمشق لقيتها ب 190 جم بس ) المهم الراجل شحمها يوم السبت بليل وجربت لقيت الخشونة راحت بنسبة 95% قاللى سيبها شوية كمان عشان لسه الشحم مدخلش لكل حتة بس مع المشى هيدخل ويشحم الأجزاء الداخلية وأن شاء الله هتروح..... وقد كان
الحمد لله الخشونة راحت تماماً
أنصح كل الناس اللى ظهر معاهم عيب زى ده يشحموا البطاحات
الراجل فك جوز المساعدين وشحم البطاحات بتاعتهم ب 100 جم ( على فكرة ده مهندس مش ميكانيكى )