الموضوع: ما مدى الثقة فى قدرة تحمل الفليشيا

المشاركة الأصلية كتبت بواسطة أحمد جودة

ما مدى ثقتك و اعتماديه الفليشيا
ثقة كبيرة جدا
بعد الاصلاحات اثق انها لن اعيد اصلحها الا بعد فترة طويله
فى شك من اعتماديتها (طلعت عينى)
لا اثق فى اعتماديتها نهائيا

أنا شخصيا شايف ثقة كبيرة بس مش جدا لان اى عربية ليها دقات نقص

ودي مشاركة لاحد الاعضاء بيتكلم علن العربية اكيد هتلاقي معلومات تفيدك فى الاختيار

السلام عليكم ورحمة الله و بركاته
بصوا انا عارف ان اي حد عايز يشتري عربية و حاطط عينه على نوع معين هايتجنن و يعرف قراره صح و لا غلطة هايندم عليها طول عمره

انا قولت اعمل ثواب و اقول خبرتي عن الاسكودا فيليشيا و اجري على الله .

الاسكودا اتعملت من سنة 1995 الى 2001 ووش الاوكتافيا بادئة من 1998 الى 2001 ودة بخصوص الشكل , و على فكره العربيه دي من مصانع فولكس فاجن او على الاقل خالص تحت اشراف فولكس الالمانية بس هي طبعا عربيه تشيكي و التشيك من الدول المتقدمة في صناعة السيارات و يكفيها فخرا انتاجها لافضل السيارات الاوروبية و هي الاوكتافيا و كمان هي بلد قوية في صناعة الموتسيكلات و متقدمه فيها و اسئلوا اصحاب الموتسيكلات القديمة

العربية تعد من السيارات الحديثة لان التابلو بتاعها فيبر و حته واحدة و متماسك جدا و شكله انسيابي و كمان شيك و الكراسي مريحه الى حد كبير و متفنشه كويس اوي و الابواب جميله يعني مش زي عربيات زمان

العربية تقيله اوي على الطريق و مش قصدي تقيله يعني بطيئة اقصد انها ثابته و مش بتعوم بسهولة الا طبعا لو السرعة زادت عن 140 كيلو و بالنسبه لحجم العربيه دي فهي سرعه كويسة ( هو في طريق في مصر يخليك تجيب اعلى من كدة ؟؟ ) اول مطب هوائي ممكن يقلب البي ام نفسها هههههههه

ماعلينا

بالنسبه لصاج العربيه فهو قوي و العربيه حديدها حلو و محمل و انا مجربها شخصيا في كذا حادثه هههههههههه و الحمد لله جت سليمة بس بجد لو عربيه تانيه كان زمان الموتور جه قعد على الكرسي اللي جنبي ههههههههههه


بالنسبه للكبوت بمحتوياته فدة الاهم , بصو مش هاكدب عليكم العربيه بتولع و بتسخن اوي بس ممكن تتجنب العيب دة لو غيرت الرادياتير و حطيت واحد نحاس 3 ماسوورة لان الرادياتير اللي فيها 2 ماسورة , عموما لو جيت تغير الرادياتير لاي سبب ابقى هاته نحاس 3 ماسورة احسن , اما المروحه فممكن تجيب اتنين مروحه جنب بعض و بلاش مروحه الشاهين لانها شديده اوي اه بس بتبوظ بسرعه انا بتكلم عن الناس اللي ناوية تغير في سيستم التبريد , عموما العربيه دي بيركب لها مروحتين واحدة اماميه قدام الرادياتير و دي بتكون مروحه المرسيدس الالماني و المروحه الداخليه الخاصه بتبريد الموتور بتكون بتاعة بلادها الاصليه التشيكي و في ناس بيغيروها لمروحه الشاهين عشان اقوى بس في الصيف من شدتها كهربائيا بتسيح السلوك و ممكن تعمل قفله فبلاش منها احسن دة غير انها بتعمل صوت عالي شوية

السخونة بسبب انه وش السلندر معمول من مادة بتسخن بسرعه و دة العيب الوحيد اللي في الاسكودا بس نفس العيب دة سهل التغلب عليه لو عملت نظام تبريد زي ماقولت سابقا لان التشيكيين مع الاسف ماعملوش حسابهم ان عربيتهم اللي بتمشي في الجليد في اوروبا انها في يوم تروح جهنم هههههههه . . . ماتفهمونيش غلط . . . الجو هنا اصله بيكون نار في الصيف اعذروني

عشان كدة العربيه دي مش موجودة في دول الخليج

نرجع لقوة الموتور و بصراحه فهو قوي مع انه 1300 سي سي , بس هي عربيه مش سريعه اوي بس مش بطيئة برضه يعني السرعه القصوى زي افي الكتالوج 145 كيلو في الساعه , و على فكره الفيرنا مثلا مكتوب في الكتالوج ان السرعه القصوى حوالي 165 كيلو و الفيرنا 1600 سي سي يعني برضه الاسكودا مش في الضياع يعني

اما عن العفشه فهي قوية اوي و بصراحه العربيه مش ناعمة زي الهيونداي مثلا بس برضه مش خشنه زي الفيات او العربيات القديمة مثلا بس عفشتها قوية و تستحمل بس اغلس عيب في العفشه علبه الدركسيون , لو اصلي بتقعد مثلا في متوسط 4 سنين تمام و بعد كدة تطبل و لو صيني تقعد سنتين و للعلم فان معظم العفشه بتكون الماني

بالنسبة لقطع الغيار فهي معمرة بصراحه لانك اكيد هاتجيبها اصلي (و لا انت ليك رأي تاني ؟؟ ) و هاقول امثله للاسعار عشان الناس تستفيد

الموتور استيراد 2000 لو حالته كويسة و دي اسعار المتوسط على فكره
الفتيس 1500
طقم الدبرياج الاصلي 420
الفانوس 100 جنيه
الاشاره 20
المساعد طقم امامي 400 و الخلفي نفس السعر تقريبا ودة سعر الألماني

اعتقد اني قولت اهم الاسعار لقطع الغيار اللي الناس بتقلق على اسعارها
فادي الاسعار و انت قرر

العربيه مطلوبة اوي اوي اوي اوي في السوق و اكبر دليل اني لما بمشي بعربيتي في مدينة نصر في العاشر بلاقي الناس توقفني غصب عني و يترجوني ابيع مع اني ممكن اكون رايح لأخويا و مش عايز ابيع اصلا ههههههههههههه و دة حصل فعلا كتير معايا لان حظي ان اخويا ساكن هناك . . . هابقى اطلب منه يعزل هههههههههههههه

اخيرا سعر العربيه تقريبا بيتراوح من 26 الف لغااااااااااااااااااايه 34000 طبعا حسب الحاله و الموديل

شكرا جزيلا و انا مع الاسف مش بدخل كتير بس لو حد ساب سؤال يعذرني لو اتأخرت في الرد

شكرا ليكم جدا و اتمنى اكون افدتكم و انا عارف ان العربيه دي ليها راغبين كتير اوي لان سعرها في الجووووووول و بصراحه هي عربيه كويسة و انا مستريح معاها طالما قدرت اني اعرف عيوبها و اعالجها و اعتقد اني قولت طريقه العلاج فيما سبق

شكرا و السلام عليكم و رحمه الله و بركاته

الف شكر على التقرير دا يا استاذ احمد بس اسمحلى اسعار قطع الغيار دى منيين ؟؟؟ انا لسه سال عن طقم الدبرياج النهارده يتراوح مابين 520 و 550 الفانوس 120 و 130

ياريت لو حضرتك تعرف حد بيبع بالاسعار اللى قلت عليها تعرفنا عليه