الموضوع: السن المناسب للزواج

المشاركة الأصلية كتبت بواسطة ramymechanics

نسخن بقا الموضوع وأقول لكم على السبب اللى خلانى اعمل الموضوع دة ... هل الزواج المبكر زى حالاتى كدة ممكن يورث الملل والزهق من المسؤولية بعد كام سنة ؟؟؟ يعنى واحد زى حالاتى كدة متجوز من 8 سنين وعمرى دلوقتى 32 سنة والطاحونة شغالة ما بين شغل ومسؤوليات البيت من مذاكرة لطفلة فى 2 ابتدائى و زن طفل عنده سنة ومتاعب الحياة الطبيعية ... طبعا احنا فى نعمة من الله لا ينكرها الا جاحد ويتمناها كتير من الناس .. لكن سؤالى هل الزواج المبكر هو سبب مباشر للزواج التانى بعد فترة من الزمن نتيجة كثرة المسؤوليه مع صغر العمر ؟؟؟

لا ياباشا مش السن المبكر ولا حاجة,, الروتين هوا اللي بيولد الملل والزهق..

ممكن أديك أمثلة علي ناس كتير متجوزة في أول التلاتينات ونص التلاتينات وبيحصل ملل في العلاقة في أقل من سنة واحدة,,
ونفس المثال ممكن أديهولك علي ناس متجوز في نفس السن اللي أنت أتجوزت فيه وحصل ملل برضه بعد كام شهر,,

الموضوع نسبي زي ما قلت, ومالوش علاقة بالسن,
ضغوط الحياة والخوف من بكرة هما اللي بيخلو الحالة النفيسة مش تمام, ودا اللي بيولد الملل والزهق,,
حاول في يوم أجازة زي الجمعه أو أي يوم ممكن تخرج فيه خد مراتك وبنتك ربنا يخليهم لك ويبارك لك فيهم,,
وأنزل بيهم علي الأزهر بارك مثلاً لو من القاهرة, أو المنتزه لو من الأسكندرية,, أو أي مكان أنت شايفة رايق وفيه خضرة وهوا نضيف عشان يحسن الحالة النفسية والمزاجية ودا عامل مهم للأنسان اللي الدنيا بتطحنة في الشغل والبيت ضغط,, لأزم يشوف أخضر ويشم هوا نضيف,,

خروجة خفيفة ومش مكلفة ولا متعبة,, بس هتفرق كتير,
وأعمل حسابك وأنت خارج المشوار دا أنك ترمي ورا ضهرك أي تفكير متعلق بالشغل لحد ما يجي معاد الشغل, واي مشاكل أو مشاحنات قديمة في خلال الأسبوع اللي عدي سواء في البيت أو برة البيت,

وأنت هتعرف أن الموضوع مالوش علاقة بالسن ولا بأتجوزت بدري ولا متأخر.